Deres Auto ilaasortanut peqatigiiffeqalissasoq

Nuummi Deres Auto Kalaallit Nunaanni biilinik tuniniaasartuni siullersaalluni ilaasortanut peqatigiiffeqalerpoq.

Ilaasortat ilaatigut sullinneqarnermut, biilinik eqqiaasitsinermut, kingoraartissanut biilinullu attartortakkanut akikillisaaffigineqartassapput. Deres Automi tuniniaanermut pisortaq piginneqataasorlu Palle Frederiksen taama oqaluttuarpoq.

– Atuisartugut aalajaatsut qutsavigiumallugit ajunngitsuliorfiginiarlugillu peqatigiiffimmik pilersitsivugut. Maani biilimik nutaamik atornikuumilluunniit pisigaanni ilaasortanngortoqartassaaq, ilaasortaanerlu arlalinnik iluaqutissartaqarpoq, Palle Frederiksen oqarpoq nangillunilu ukiumoortumik, ilaasortanngornermut ilaasortaanermiluunniit aningaasartuutinik akiliuteqartoqartassanngitsoq oqaatigaa.

– Taamatut iliuuseqarnitsigut soorunami aamma nutaanik sullitaqalerumavugut, Palle Frederiksen oqarpoq.

Akikilliliissutit unammisitsinerillu

Ilaasortat ilaatigut nalunaaquttap-akunneranut 30 procentimik, biilinik eqqiaanermi 50 procentimik, biilinut atortussanut 7 procentimik aamma biilinik attartornermut 10 procentimik akikillisaavigineqartassapput. Aammattaaq soorlu biilit akeqanngitsumik misissorneqarnissaannut, assakaasut akeqanngitsumik paaritinnissaannut iluaqutissanullu allanut ataavartumik unammisitsisoqartassaaq. Sammisaqartitsinerni annertunerusuni akeqanngitsumik filmeriarnissamut billetsit aamma unammisitsissutigineqartarsinnaapput.

Deres Autottaaq suliffeqarfiit sullitaannut tunngatillugu atuisut peqatigiiffiannik pilersitsinissaq sulissutigaa.

– Piffissaq ungasinnerusoq eqqarsaatigalugu Deres Auto Pro+-imik atuilerniarpugut, tassani suliffeqarfiit sullitagut iluaqutissanik assigiinngitsunik periarfissaqassapput. Sulinerannut sunniuteqannginniassammat unnukkut ammalluni biilinik misissuinerusinnaavoq, Palle Frederiksen oqarpoq.

Ingerlatseqatigiiffik alliartortoq

Deres Auto illunik biilinik nutaanik atornikunillu tuniniaasarluni attartortitsisarlunilu ukiuni kingullerni Nuummi Industrivejimi alliartorluarpoq.

Saqqummersitsivik angisooq, 400 m2-inik angissuseqartoq biilit 30-t missaanniittut illup iluani inissaqarfigisinnaasaat suliniutit kingulliit ilagaat, tassanilu biilinik nutaanerpaanik saqqummersitsisoqartarpoq. Maannakkut ilaatigut Toyotamit Urban Cruiser Kalaallit Nunaannut tikeqqammersoq aamma Mercedes G-580 nutaaq, G-klassep ilisimaneqarluartup innaallagissamik ingerlasortaa siulleq, saqqummersinneqarput.

Assakaasunik paarsineq

Atuisut nammineerlutik ukiuunerani aasaaneranilu assakaasut nassartannginniassammatigit Deres Autottaaq annertuumik biilit assakaasuinik paarsisarfeqalersimavoq.

Assakaasut ikkuttarfiilu Pukuffimmi toqqorsivimmut toqqorneqartarput, taavalu assakaasunik taarsersuinissaq sioqqullugu aaneqartarlutik. Ukiumut marloriarluni assakaasunik taarsersuisoqartarpoq. Kingullermik maajip 9-10-anni sapaatip akunnerata naanerani tamanna pivoq, tassani kikkulluunniit ukiuunerani assakaasuminnik aasarsiutinut taarseerusuttut ornigullutik sullinneqapallassinnaapput.

– Biilertartorpassuit biilimi assakaasuisa taarserneqarnissaat maajimi juunimilu kissaatigisarpaat, taamaammat ulapiffiusarpoq. Maajip qiteqqunnerani assakaasunik taarsersuiffitsinni biilit 200-nit amerlanerusut sullippagut, taakkulu ukiukkut assakaasunik aasarsiutinut taarserneqarput. Aatsaat taama amerlatigaat, tuniniaanermut pisortaq Palle Frederiksen oqarpoq, taannali pisiniarfiup saavani assakaasunik suli peqarluartoq ilanngullugu oqarpoq.