MOTOORI

Nuukullammi aqqusernit itersaqarlutillu pitsaanngitsut

Illoqarfiup immikkoortortaa tamanna kommunip 2036-mut pilersaarutaani nutarterneqartussatut toqqarneqarpoq, kisianni Nuukullak inuussutissarsiortunit assigiinngitsunit suli atorneqarluarmat, tamaaniittut containerit qimaannakkat takussaaqaat aqqusernillu iluarsaanneqarnissaannik pisariaqartitsisoqarluni.

Nuukullammi aqqusernit itersarpassuaqarput.

Assi: Trine Juncher Jørgensen

Trine Juncher Jørgensen Trine Juncher Jørgensen TUSAGASSIORTOQ / TUSAGASSIORTOQ

Saqqummersinneqarpoq 7. Juuli 2026 - 10:29

Ussassaarut

Nuukullammi qisuit aqqusinermi toqqavittut atorneqartut aserfallalluinnarsimapput, aqqusinermilu itersarpassuarnik pilersitsisimallutik. Kommunip tamanna iluarsiniarsaralugu saviminernik saattukujuunik qallertarsimavai, aaqqiinerli tamanna pitsaanerpaajunngitsoq, Kommuneqarfik Sermersuumi aqqusinikkut angallannermut pilersaarusiortoq Emil Skat Vejleskov-ip nassuerutigaa.

Qisuit aqqusinermi toqqavigineqartut

Emil Skat Vejleskov, Kommuneqarfik Sermersuumi aqqusinikkut angallannermi pilersaarusiortartoq, qisuit saviminerillu saattukujuut aqqusinermi toqqavigineqartut pillugit aperineqarami oqarpoq, qisuit aqqusinermi toqqavigineqartut nalinginnaasumik erngup aqqutaannut ruujorinut imaluunniit kabelinut assiaqutaasartut.

– Nuukullammili kabelinik imaluunniit kussianik naammattoorsinngilagut, peerneqarluinnarsimammata. Nuummi sumiiffinni arlalinni aqquserngit qisunnik qallerneqartarput, tamakkulu ingerlavigiuminaaqalutik, taamaattumik aaqqiissutissanik sulissutiginnippugut, Emil Skat Vejleskov oqarpoq.

Sullissivimmi atortuusivimmi ulapittoqartoq

Aqqusinerni itersat allat pillugit angallannermut pilersaarusiortartoq oqarpoq, Sullissivimmit illoqarfimmi akuttunngitsumik angalaartarlutik, aqqusinernilu itersanik iluarsaassisarlutik, tamannali suliassarujussuusarluni silap allanngorarneranit aqqusernit ajortinneqartarmata, piffissallu asfaltilersuiffiusartup sivikitsuinnaanera pissutigalugit.

– Aatsaat sila 5 gradit sinnerlugit kiappat asfaltilersuisoqarsinnaavoq, asfaltilu aqqusinermut manissarneqartussaq minnerpaamik 120 gradinik kissassuseqassalluni. Apisarnerata siallertarneratalu ullut asfaltersuiffiusussat ikinnerulersissinnaagai, Emil Skat Vejleskov oqarpoq. Taassuma innuttaasut aqqusinerni itersanik annertuunik naammattoorsigaangamik Sanarfinermut Avatangiisinullu Ingerlatsivimmut allattaqqullugit kajumissaarpai.

NUUKULLAK ILLOQARFIUP IMMIKKOORTUATUT NUTARSARNEQASSASOQ

Kommunimut 2036-mut pilersaarummi, marsip sisamaanni 2025-mi akuerineqartumi, allassimavoq Nuukullak (immikkoortoq 1C6) illoqarfimmi nutarteriffigineqartussatut toqqagaasimasoq.

Illoqarfiup ilaa tamanna 2022-mi ineriartortitsinermut suliniummut annerusumut Sermeq Citymut ilaasussatut toqqagaavoq, tamaani inissiat 350-it angullugit amerlassusillit sanaartorneqarnissaat, umiarsualiviup eqqaani aqqusinermik pisuttuartarfimmik, inuussutissarsiornermilu ingerlatatoqqat pilerinarsarneqarnissaat pilersaarutigineqarput.

Nuukullak illoqarfiup ilaatut nutartigassatut toqqarneqarpoq

Illoqarfimmi nutartigassatut toqqarneqartoq

Nuukullak illoqarfiup immikkoortuisa ilaattut kommunip pilersaarutaani 2036-mi nutarterneqartussatut toqqarneqarpoq. Aamma ineriartortitsinermut suliniummut Sermeq Citymut 2022-meersumut ilaavoq, tamatumani inissianik 350-inik amerlassusilinnik sanaartornissaq umiarsualiviullu eqqaani aliikkusiartarfiliornissaq siunniunneqarlutik.