Kimmernaq Avani nunami misigisassarsiortitsilluni takornariartitsisartoq

Kimmernaq Heilmann Sisimiuniit Kujataani Local Greenlandip Tasermiuni takorniarianut nunanit allaneersunut tammaarsimaartarfiutaani qaammatini tulliuttuni aqutsisutut suliartornissaminut piareersaleruttorpoq.

Taanna nunatsinni pinngortitami aatsaaq angallasseqqajalinngilaq.

Suliffeqarfiutinimi Avani Nuna 2022-mi apriili pilersikkamiulli takornarianik nunatsinni qaqqartuujusumi angallassisarpoq – kulturitta, ileqqutta qanilaartuunittalu oqaluttuassartaanik aallaavigilluinnarlugit. Nunatsinnimi pinngortitami angallassiinnarnani aammali misigisassarsiorluartitsisarnissi, Kimmernaq Heilmannip pingaartippaa.

– Suliffeqarfiutiga inuussutissarsiutigaara, angisoorsuanngortinniarnaguli. Sunniuteqarluarnissara uannullu nuannersuunissaa pingaartippara, taanna oqarpoq nangillunilu:

– Suliffeqarfiutima anginerulernissaa orniginartinnginnakku siunniunikuunngilara, angineruleraluarpammi suliassaqarnerulertussaassallungalu akisussaaffeqarnerulertussaassagama. Nuannariunnaarukku taamaatikkumaarpunga.

Nuannarisaminik aallussaqarnini inuussutissarsiuteqarninilu oqimaaqatigiissuunissaat, Kimmernaq Heilmannip pingaartippaa. Nunnarisaminik aallussaqarnini inuussutissarsiutigisinnaagini, taassuma erseqqissaatigaa – tamannarpiarlu nammineq isumani malillugu ingerlarsuinnarsinnaanissaminut tunngaviulluinnartuusoq.

Kimmernaq Heilmann 16-inik ukioqarlunili takornariartitsisalerpoq, angunnilu takornarianik Maniitsup eqqaani angallassisarlutik. Sisimiuniit ingerlataminik maanna suliffeqarfiuteqarpoq, tassaasoq Avani Nuna – tassanngalu nunanit tamalaaneersorpassuarniit filmiliortartunik attaveqarluarpoq. Misigisassarsiortitsinissamut aalajangersimasunik neqerooruteqarneq ajorpoq;  tassa takornariat kissaataat soqutigisaallu aallaavigalugit misigisassarsiortittarpai. Takornarianimmi nunami, sermersuarmi immamilu angallassisartutut allagartaqarnini pissutigalugu taamaaliorsinnaavoq.

– Suut soqutigineraat paasiniaqqaartuaannarpara. Ilaat soorlu tupilannut oqaluttuatoqaatitsinnullu tunngasunik paasisaqarusuttarput, ilaalu soorlu inuiaqatigiittut aqqusaarsimasatsinnut nunattalu qanoq issusianut tunngasunik. Tassa soqutigsaat aallaavigalugit takornariartinnissaannut ataqatigiissaarisarpunga – taamaalillungalu suut pisariaqartinneraat takorusunneraallu paasilersortarpara, taanna oqarpoq.

Ilisimasaminik ingerlatitseqqeerusuttartoq 

Kimmernaq Heilmann takornarianik ikittukkuutaartunik angallassisarpoq. Tassa angallattagai akissarissaakkajupput angallanneqaqattaarnissaq pinnagu – pinngortitamili – misigisassarsiorfiulluarsinnaasumik angallanneqarnissamik pingaartitsisut. Soorlu pisuttuarneq, qaqqinneq, qulimiguulimmik angallanneqarneq tupermiluunniit oqaluasaarneq angallanneqarnerminni misigisinnaasaannut ilaapput.

– Paquminarsinnaasunik pisariaqaraangat eqqartueqatigisarpakka. Aamma nunatsinni pinngortitaq peqqarniissinnaasoq nunatsinnilu aqqusaakkatta oqaluttuassartaannik oqaluttuuttarpakka. Takornarialerinermi aamma unneqqarittoqarsinnaasoraara, taanna oqarpoq.

Kimmernaq Heilmann ilisimasaminik ingerlatitseqqeerusuttartuuvoq – takornarianut aammali nunatsinni takornarialerisoqatiminut. Takornarianik angallassisarnermi saniatigut Arctic Circle Racep Arctic Soundsillu suliuttaasuini ilaasortaasuullunilu Issittumi misigisassarsiortitsilluni takornariartitsisartunngorniarfimmi Campus Kujallermiittumi ilinniartitsisuuvoq. Suleqatini Arne Hardenberg iluatsilluartumik ilinniarfimmi tassani kalaallisut siorna ilinniartitserngaarput.

– Tuluttuinnangajak atuartitsisoqakkajuppoq, taamaakkaluartoq kalaallisut atuartitsinerput iluatsilluaqaaq, ilisimasatsinnillu takornarianik angallassisartunngornianut nammineq oqaatsivut atorlugit iluatsilluartumik ingerlatitseqqiinerput nuannaarutigisorujussuullutigu, taanna oqarpoq.

Kimmernaq Heilmann Issittumi misigisassarsiortitsilluni takornariartitsisartutut Campus Kujallermi aamma ilinniarsimasuuvoq, ilaatigullu soorlu sermersuarmi annaassiniartartutut allagartaqarluni, aamma piginnaasani ilisimasanilu qaffassarniartuartarpai. 

- Ilisimasaqarnerujartortillunga takornariat misigisassaat pitsaanerulersinniartarpakka, takornariartitsinerillu amerlassusaat pinnagit pitsaassusaanilli pingaarnerutitsinissaq aamma pisariaqarpoq, taanna nassuiaavoq. 

Anginerulernissaq pinnagu suleqateqarnissi pingaartikkaa 

Kimmernaq Heilmannip suliffeqarfiutini Avani Nuna – soorlu Oxen-ambassadøriiffigisaminik tassa Oxen Expedition Engagementimik Issittumi ilisimasassarsiortunut ilitsersuisartunut aamma suleqatigiiffiusuusumik attaveqaqatigiinnikkut ingerlappaa. S

uliffeqarfiutini soorlu nittartakkakkut maannamut suli nittarsaannikuunngilaa. Filmiliortartut, takornariat angalanissanillu tuniniaasut innersuussivigineqarsimasut, piviusulersaarusiamik takunnissimasut tusaamannittullu nammineerlutik attavigisarpaat.

Pinngortitaq uumasulluunniit pillugit filmiliorianik angallassikkajuppoq.

– Filmilioriat misigigaangama ataqqinninngitsut itigartittarpakka. Kikkut tamaasa akisussaaffigisinnaanngilakka. Innarligassaannginnermut tunngavoq, misigisimagumalu ataqqinnillutik filmilioriartortut saqqummiussassaminnulluunniit torrallaassasut, taava pilersaarusioqatigisarpakka kingornalu nalilertarlugu suleqatigiissinnaanersugut suleqatigiissinnaannginnersugulluunniit. Ilarpassui itigartittarpakka takornarialerisunulluunniit allanut suliaannut naapertuunnerusunut innersuuttarpakka, Kimmernaq Heilmann oqaluttuarpoq.

Nunatsinni angallassinissamut angalanissamullu pilersaarusioraangami nunatsinni takornariartitsisartoqatini suleqateqarusunnerusarpoq. Nunatsinni takornariartitsiviit minnerit siuariartorniassammata – neqoorutit misigisassarsiortitsinissallu uppernassuseqarnissaa qulakkeerniarlugu - nunatsinni takornariartitsisartoqatiminik takornariartitsivinnillu allanik anginngitsunik suleqateqarnissi pingaartippaa.

– Nunarput angeqimmat, tamaani takornarialerineq namminissarsiorfiusinnaanngilaq. Attavigineqartillunga periarfissaqanngikkaangama, attaviginnittut allanut innersuuttarpakka. Ikorfartoqatigiinnissarput takornarialerisutut namminersortutut ingerlalluarnissatsinnut ineriartornissatsinnullu pingaaruteqarpoq, taanna oqarpoq nassuiarlugu namminersortutut takornarialerisunngorlaanut inniminniinisarnissaq pingaaruteqartoq. 

- Tassami annikikkaluamilluunniit inniminniiffigaanni taakkununnga aallartinissaataalluarsinnaasoq, siuarsaataasinnaasoq suleqateqarnerulissutaasinnaasoq, Kimmernaq Heilmann oqarpoq.

Pinngortitaq, qimmit oqimaaqatigiissaarinerlu 

Takornariaqaruttortarfik qaangiuppat, Kimmernaq Heilmann ilinniartitsinermut saaqqissaaq – kingornatigullu takornariartitseqqeriarluni qimmini ukioru feeriaqatigissavai. – Maniitsumi qimusserarfiuneq ajortumi peroriartorpunga, taamaammat qimmeqarneq nutaajullunilu qimussiussisalernissannut suli ilikkagassarpassuaqarpunga, Kimmernaq Heilmann oqarpoq.

Kujataani Local Greenlandip Tasermiuni takorniarianut tammaarsimaartarfiutaani – angerlarsimaffittut misigisimaffigisartakkamini suliitigalunilu qasuersaarfigisartakkamini - aqutsisutut suliartornissaminut maanna piareersarpoq.

– Kujataani pinngortitaq eqqissisimaarfigalugu nuannareqqissaarpara. Taqqavani suligaangama sulisutut misigineq ajorpunga, nuannarisannillu inuussutissarsiuteqarsinnaallunga, taanna oqarpoq.

Suliffeqarfiutimi anginerulernissaanut suna tamaat akigalugu inerisarnissaa pinnagu eqqortumilli inerisartuarnissaa Kimmernaq Heilmannip pingaarnerpaatippaa.

– Suliffiga nuannareqaara. Nuannariuarallartillugulu suliariuassavara, taanna oqarpoq.