AATSITASSARSIORNEQ
Kuannersuarni aatsitassarsiorfik Narsami nersutaateqarfimmik pisinissamut piumasaqaatinik isumaqatigiissuteqarnissamut piareersimavoq
– Naaggaarpunga. Aatsitassarsiorfiup Energy Transition Mineralsip piianissamik akuersissuteqalissagaluarpat nersutaateqarfima tuninissaanut isumaqatigiissusioreerlunga pituttorusunngilanga. Narsami nersutaatilik Sofus Frederiksen oqarpoq.
Sofus Frederiksens kvægfarm ligger lidt uden for Narsaq på stien op til Kuannersuit. Råstofselskabet Energy Transition Minerals skriver i en aktuel børsmeddelelse, at de har principgodkendt et køb af Sofus Frederiksens farm og 52 hektarer jorde for 20 millioner kroner. Købet er dog betinget af, at selskabet får en udnyttelsestilladelse til deres projekt i Kuannersuit.
Foto: Leiff Josefsen
Australiamiut
aatsitassarsiornermik ingerlatseqatigiiffiat Energy Transition Minerals –
siornatigut Greenland Minerals – børsimi nalunaarummi allappoq Sofus
Frederiksenip Narsap eqqaani nersutaateqarfianik 20 millionit koruuninik
pisinissamut tunngaviusumik akuersissuteqarlutik. Kuannersuarnili suliniummut
akuersissummik pissarsinissaq pisinissamut piumasaqaataavoq.
Isumaqatigiissitsiniarneq
eqqartuussivilersuussinerlu
Maannakkut ingerlatseqatigiiffik isumaqatigiissitsiniartarfimmi
eqqartuussivimmilu danskit naalagaaffiat Namminersorlutillu Oqartussat
suliassanngortippai, taakku Kuannersuarni suliniummut piianissamik
akuersissummik pisinnaatitaallutik isumaqaramik. Ingerlatseqatigiiffiup
piiaanissamut akuersissummik qinnuteqaataa itigartinneqarpoq, uranimik
misissuinermik, ujaasinermik piiaanermillu inerteqqutaasumut inatsimmut
2021-meersumut naapertuutinnginnera pissutigalugu.
Aatsitassarsioqatigiiffimmut
pituttorsimarusunngitsoq
Suliffeqarfiup aqutsisuisa qanittukkut Narsami tikeraarnerminni pappiaqqat
pisinissamut isumaqatigiissut atsiornissaanut piareersimagaat Sermitsiap
paasivaa. Nersutaatililli Sofus Frederiksen isumaqatigiissummik atsiorusunngilaq, taakku
piiaanissamut akuersissummik pissarsissanersut nalornissutaammat. – Energy Transition Mineralsimut isumaqatigiissuteqareernissaq
piumanngilara. Taakku qaqugu nersutaateqarfiga pisiarerusunneraat naluara,
allanillu pisiumasunik takkuttoqassappat taakkununnga tunerusunneruara, Sofus
Frederiksen Sermitsiamut oqarpoq.
Inuilip nutarterneqarnera
Sofus Frederiksen allamut tuniniaanissamut periarfissaqarpoq, tassami Narsami
inuussutissalerinermik ilinniarfik Inuili nutarterneqassaaq.
Tamanna
nalunaarusiami juulimi 2024-meersumi atuarneqarsinnaavoq, tassani
suleqatigiissitat Ilinniartitaanermut, Kultureqarnermut,
Timersornermut
Ilageeqarnermullu Naalakkersuisoqarfimmit siulersorneqartut Upernaviarsummi
nunalerinermik ilinniarfimmik pilersitsinissamut aningaasat atornagit Narsami
Sofus Frederiksenip nunaateqarfianut 52 hektariusumut aningaasaliisoqassasoq
kaammattuutigimmassuk, taamaalillunilu Narsami nunalerinermik, imminut
pilersornermik piujuartitsinermillu ilinniartitsisoqartalissalluni.
Inuiliulli inuussutissalerinermik ilinniarfiata Upernaviarsuullu qanoq
siunissaqarnissaa suli politikikkut aalajangerneqanngilaq.
Naalakkersuisoqarfik
Sofus Frederiksenip narsaataanik pisinissamik eqqarsaatersuuteqarnerminnik
ingerlariaqqissimanersut Sermitsiap Aqqaluaq B. Egede aperaa,
akissuteqanngilarli.
