Mittarfittaamut biilinut inissiiviit aqqusernillu iserfissat isornartorsiorneqartut

Nuummi mittarfittaaq angalasunit nuannarineqarpoq, taamaattorli novembarimi ammarneqarneraniilli biilit unittarfiini pissutsit pillugit inuppassuit tupigusuuteqarlutik, paatsiveerusimaarkutillu pakatsipput.

Sooq taxat, bussit timmisartoqarfiullu sulisui kisimik aallariartortarfiup tikittarfiullu eqqaani uninngasinnaappat, angalasullu Kiss & Fly-imi minutsit pingasut ataallugit atorlugit angalasunik niutitsisoqarsimanngippat ikisitsisoqarsimanngippalluunniit aallariartortarfiup tikittarfiullu illuatungaani qaqqap naqqani biilinut sivisuumik uninngatitsisarfimmut innersuunneqartarlutik?

Silarluttumi ilungersunartoq

Angalasut mikisunik meerartaqartut kufferterpassuarnillu nassataqartut aamma utoqqaat pitsorluttut, qaqqap naqqanit biilinut sivisuumik inissiisarfimmit majuartarfikkooriarlutik aallariartortarfiup tikittarfiullu illoqannginnersaanut apuunnissartik ilungersunartissinnaasarpaat – ingammik anorlertillugu, quasartillugu issitsillugulu. Aamma angalasut arlallit biilinut inissiisarfik majuartarfiillu aputaajarneqarsimanngitsut ukiukkut upernaakkullu misigaat, tamatumalu kinguneranik aqqutiginissaat suli toqqissisimanannginnerulerpoq.

Aammattaaq majuartarfikkut ammut ingerlatilluni mittarfiup saavani biilinut inissiisarfiit atorneqanngingajattut takullugit sooq tassani biilinut inissiisarfimmik pilersitsinissaq inissaqarsimannginnersoq eqqarsarnarsinnaavoq.

Isumannaallisaanermi malittarisassat

Greenland Airports tusagassiuutitigut sakkortuumik isornartorsiorneqareerpoq, tassa Facebookikkut marsimi erseqqissaramiuk aallariartortarfiup tikittarfiullu eqqaaniittoq illoqannginnersaq, mittarfiup isumannaallisaanermut immikkoortuanut ilaammat, taamaammallu angalasut minutsit pingasut sinnerlugit tassani uninngasinnaanngitsut.

“Upalungaarsimanermi suliassaqalernermi biilit annaassiniartartut aamma upalungaarsimanermi sulisut akornuteqanngitsumik sukkasuumillu terminalimukarsinnaasussaapput. Taamaammat sumiiffimmi tassani biilinik inissisimatitsinissaq akuerisaanngilaq – taamaallaat sivikitsumik uninngasoqarsinnaalluni.”

Biilinik kinaassusersineqarsimanngitsunik – assersuutigalugu terminalip saavani aamma mittarfiup eqqaani aqquserngit sinaanni - isumannaallisaanermut tunngatillugu sumiiffinni aalajangersimasuni uninngatitsisoqartassanngitsoq Greenland Airports nangilluni allappoq. Tamatumalu saniatigut sulisunut biilinut inissiisarfiit terminalip eqqaaniittut, atuisunit isumannaallisaanikkut akuerisanit, tassa mittarfimmi sulisunit, politiinit, ilanngaaserisunit il.il taamaallaat atorneqarsinnaapput.

Ataasiaannarluni isumannaallisaasukkoortarneq

Angalasut pakatsisimanerat pillugu Greenland Airportsimi pisortaq Jens Lauridsen paasinnissinnaalluarluni, mittarfittaalli nunat tamalaat isumannaallisaanermut piumasaqaataat naammassissappagit, ungasissutsimut piumasaqaatit malinneqartariaqartut akissuteqarluni oqarpoq.

– Terminalip saava asfaltimik qallerneqarsimasoq kusanartoq biilinut inissiivigineqartanngimmat inuit tupigusuutigimmassuk paasisinnaalluarpara. Isumannaallisaanermulli akuersissuteqalissagutta timmisartut uninngasarfiannit tamanullu biilinut inissiisarfiit qanoq ungasissuseqarnissaannik piumasaqaateqarpoq.

– Nuummi timmisartoqarfimmut pisoqqamut sanilliullugu allaanerujussuunera isumaqatigaara, taamanimi allaat mittarfimmi uninngasoqarsinnaangajappoq. Tamatumani sungiussiniarnissaq pisariaqarpoq, taamaattorli nunanut tamalaanut mittarfiuniarutta malittarisassat allarluinnaat tamatumani atuupput.

 Majuartarfiit qulisat

Jens Lauridsenilli, biilinut sivisuumik uninngatitsisarfimmit aallariartortarfimmut tikittarfimmullu ingerlaniarneq unammillernartortaqarsimasoq nassuerutigaa.

– Biilinut sivisuumik uninngatitsisarfimmit ammut aallariartortarfimmut tikittarfimmullu majuartarfiit pitsaanerpaasimanngillat. Taamaammat majuartarfinnut qulisanik pilersitsisinnaanerluta misissuleruttorparput, angalasut taamaalillutik majuartarfiit aqqutigineqarsinnaasumik aputaajarneqarsimanersut isumakuluutigisariaqassanngilaat, nassuiaallunilu oqaatigalugu mittarfeqarfimmi ukiuunerani angutinik pingasunik apummik nivattartoqarsimallutik, ajoraluartumilli tamanna naammassimanngitsoq, Jens Lauridsen oqarpoq.

Majuartarfiit qulisat apeqqitsinnagu naammassineqarnissaat pilersaarutaavoq.

Bussinut ilaagit imaluunniit biiliunneqarit

Jens Lauridsenip angalasut biilinut sivisuumik uninngatitsisarfimmit meeqqanik mikisunik meeqqisarluni, kuffertit, aneerussiviit allarpassuillu nassarlugit pisunnissamut taarsiullugu, tamanut angallassissutit, taxalluunniit atorlugit imaluunniit ilaquttanit ikinngutinilluunniit timmisartoqarfimmut biiliunneqartarnissaannik, kajumissaarpai.

Periarfissaq alla tassaavoq, sivikitsumik biilinut unittarfimmut uneriarluni usingiarnissaq tamatumalu kingorna angalaqataasut ilaat sivisuumik biilinut inissiisarfimmit pisulluni timmisartoqarfimmukarsinnaavoq.

– Assersuutigalugu meeqqanik kisimiilluni angalaqateqartunut, immaqa siornatigut sungiusimasamit ajornakusoornerusinnaanera erseqqippoq, Jens Lauridsen oqarpoq.

Sulisut kiffartuussisut

Aammattaaq illoqarfimmi najugallit arlallit aallariartortarfiup tikittarfiullu sioraani sulisunik kiffartuussisunik pitsaanngitsunik misigisaqarsimanerarput. Soorlu ataaseq facebookimi ima allappoq:

“Malittarisassaqartariaqartoq paasivara, kisiannili taakkua qanoq atorneqarnissaat qanorlu oqaatigineqarnissaat pingaaruteqarluinnarpoq. Neriuppunga siunissami kiffartuussineq, naleqqussarsinnaaneq nunanullu tamalaanut timmisartoqarfitsinnik nutaamik atuisunut ataqqinninnerat pingaartinneqarnerulerumaartut.”

Kiffartuussilluarneq attaveqaqatigiilluarnerlu Greenland Airportsimi pingaartinneqarnersut aperineqarami tamanna Nunatsinni mittarfinni tamani maanna immikkut pingaartinneqartoq Jens Lauridsen akivoq.

– Suliffeqarfimmi kiffartuussinermik ingerlatsisuugatta, sullitavut eqqortumik pisussaavagut. Kiffartuussinermi ajornartorsiuteqartoqarpat tamanna iliuuseqarfigisussaavarput. Sullissilluarnerunissarput anguniarlugu mittarfeqarfitsinni tamani kiffartuussinermut pikkorissaalluta aallarteruttorpugut, Jens Lauridsen oqarpoq. Biilinut inissiisarfimmut akiliisalernissaq

Piffissaq ungasinnerusoq eqqarsaatigalugu akunnerit pingasut sinnerlugit sivisussusilimmik biilinut inissiinermut nammineerluni akiliuteqartarnermik aaqqissuussineq atuutilersinneqarumaartoq Greenland Airportsip nittartagaani allassimavoq. Allattukkat naapertorlugit ullormi ataatsimi uninngatitsineq 45 kroneqassaaq, sapaatilli akunnerani ataatsimi uninngatitsineq 295 kroneqassalluni.

- Piffissami sivisuuni uninngatitsisarfiup inaarsarnissaa naammassineqartinnagu, akiliisitsisarnermik atuutilersitsinavianngilagut.

Iluanaarniutiginissaa aamma pineqanngilaq, tassaanerullunili inuit biiliminnik qaammatini arlalinni uninngatitsisarnissaannik pinaveersaartitsinissaq, soorlumi terminalitoqqap eqqaani tamanna takusarsimagipput, Jens Lauridsen oqarpoq.