MOTOORI
Naatsitsiffissanngorlunilu mannissarfissanngortoq
Aasaliinnaqaaq, tassa naatitsivileriffissanngortoq, asimiiffissanngortoq mannissarfissanngortorlu, asimiinnermik nuannarisalik Jan Erik Pedersen oqarpoq.
Aasaliinnaqaaq, taamaalineranilu nunakkut pisunneq nuannersorujussuuvoq, asimiinnermik nuannarisalik Jan Erik Pedersen oqarpoq
Assi: Jan Erik Pedersen
– Naajat
manniinik maannakkorpiaq ulikkaarpoq, naajallu inaannik ataatsimik
marlunnilluunniit mannilimmik nassaaraanni tassannga
mannissakutsoortoqarsinnaavoq. Manniilli amerlanerungaangamik ivaneqareersimasuusartut,
pinngortitami pisuttuarnermik, mannissarnermik piniarnermillu nuannarisalik Jan
Erik Pedersen oqarpoq.
Naajat manniinik mannissarfissanngorpoq.
Assi: Jan Erik Pedersen
– Upernaakkut aasakkullu asimi pisoqattaarfissanngortarpoq, taanna oqarpoq.
Illuaqqani iluarsaraa
Jan Erik Pedersenip Akiani illuaqqani ataatagigaluaminit kingornussani aamma iluarsaleruttorpaa.
Jan Erik Pedersenip illuaraa siuaasami inunngorfiata ungasinngisaaniittuusoq
tasamani 1974-ip 1976-illu akornanni illuaqqiat siullersaannut ilaavoq.
– Illuarara najoruminarpoq, iluarsaatassaallunili. Illu naatitsivik jordbærinik,
radiisinik, ruuanik, musanik tassa kuuloruujunik rubiianillu
naatitsiffigileruttugara aamma iluarsaatassaavoq. Jan Erik Pedersenip illuaqqani ukiuni kingullerni aqisserniartilluni
unnuiffittut atornerusarpaa. Illuaraata
eqqaa ingammik siorna aqisserpassuaqartarpoq. Aamma tuttoqaalullunilu
ukaleqaaluttarpoq.
Saarulliit kusanartut
Ukioq manna nipisanniarneq silap apriilip maajillu qaammataani
nillerpallaarnera pissutigalugu juunip naaneranut sivitsorneqarpoq. Saarulliillu akigissaarmata saarullinniat
aamma imaaginnalerput. Jan Erik Pedersenilu saarullinnianut aamma ilaavoq.
Jan Erik Pedersenip illumi naatitsivitoqqami naatitami naajartornerat nuannaarutigaa.
Assi: Jan Erik Pedersen
– Saarulliit kusatseruttorput. Aamma suluppaagarniartorpassuaqarlunilu
qaleralinniartorpassuaqarpoq, eqalunniarfissarlu juulip 15-iani
aallartissalluni. Aallartinnissaanut qilanaarpunga. Aamma aggustimi
aavarfinngornissaanut. Pisuttuarnerit
Aamma pisuttuarfissanngorpoq.
– Upernaaq manna nillerpoq, inuilli seqinnernerani aneerrattut isigalugit
nuannertaqaaq. Qiimanartarpoq, Quassussuullu qaavanut marlunngornikkut pisuttuaqataasarusuttartut
amerliartuinnartut aamma maluginiarparput, Jan Erik Pedersen, pisuttuaqatigiittartut
peqatigiiffiannik ”Gå væk kræft – livet er en gave”-mik (“Kræfti peerit –
inuuneq tunissutaavoq”, aaqq.) 2017-imi pilersitsisoq, oqarpoq.
Jan Erik Pedersen asimiinnermik nuannarisalissuuvoq. Aamma piniarnermik peqqumaasersornermillu nuannarisaqarluartuullunilu Quassussuup qaavanut pisuttuaqatigiittartut peqatigiiffiannik, tassa inuit katillugit 6.000-nit ikinnerunngitsut peqataaffigisimasaannik pisuttuartitsinermik aaqqissuussiffiunikuusumik pilersitsisuuvoq.
Assi: Jan Erik Pedersen
