MOTOORI
Nunatsinni ATV-mik angallannermi allannguisoqalersoq
Nunatsinni ATV-mik angalassagaanni biilernermut allagartaqaqqaartariaqarpoq. Tamannali nunaqarfimmiunut isumassaqanngitsoq politikerit arlallit tikkuarpaat. ATV-mik arritsumik illoqarfiillu annerit avataanni ingerlanermi biilersinnaanermut allagartaqarnissap piumasaqaataajunnaarnissaa pillugu kiisami aaqqiissuteqartoqarnialersaartoqarpoq.
Allannguut atuutilerpat illoqarfiit arfinillit, biilersinnaanermik ilinniartitsivillit, avataanni ATV-mik imaluunniit ATV-mik sukkanerpaamik 30 km/t-mik ingerlasinnaasumik biilernermut allagartaqarnissaq piumasaqaataajunnaassaaq. Inatsimmut allannguutissatut siunnersuut Inatsisartut 2026-mi upernaakkut ataatsimiinneranni saqqummiunneqarsinnaassasoq naatsorsuutigineqarpoq.
Foto:Oscar Scott Carl
Politikerit
arlallit aqqusinermi angallannermut inatsit allanngortinneqarsinnaanersoq,
taamaalilluni Kalaallit Nunaanni ATV-mik ingerlatsissagaanni biilersinnaanermut
allagartaqartariaaruttoqarsinnaanersoq Naalakkersuisunut aamma Danmarkimi
angallannermut ministerinut ukiuni qulini kingullerni arlaleriarlutik
apeqqutigisarsimavaat.
Nunaqarfiit
ATV-nik pisariaqartitsisut
Nunaqarfinni amerlanerpaani aqquserngit asfalterneqarnikuunngimmata ATV-t
angallatitut pitsaasuullutillu pingaaruteqarput. Sumiiffiit ilaanni ATV-t
napparsimasunik, innarluutilinnik, allakkanik nioqqutissanilluunniit
assartuinermi kiisalu savaateqarfinni allanilu inuussutissarsiutigalugu
angallatitut atorneqartarput.
Inuit
Ataqatigiit sinnerlugit Folketingimut ilaasortaq Aaja Chemnitz naapertorlugu
ATV-mik ingerlatsinissamut biilinik ingerlatsisinnaanermut allagartamik
piginnittoqartariaqarnera inuppassuarnut sivisuumik akornutaasimavoq,
nunaqarfinnimi taamaattunik piginnittoqarsinnaaneq ajorpoq. Innuttaasut
taamaalillutik assigiimmik angallanneqarsinnaaneq ajorput, taamaammallu ATV-t
Kalaallit Nunaanni biilinut sanilliunneqarnatik qamuteralannut
sanilliunneqartalernissaat siunnersuutigisimavaa. Tamannali piviusunngortinneqarsinnaasimanngilaq.
Nutaamik najoqqutassiaqalissasoq
Maanna Demokraatinit Jørgen Rosbach Naalagaaffiup oqartussaasuinik
oqaloqateqarneq qanoq innersoq apeqquteqarpoq. Aamma nunaqarfinni
asfalteqanngitsuni biilersinnaanermut allagartaqarnani ATV-nik
ingerlatsisoqarsinnaanissaanik aqqusinikkut angallannermi inatsimmi immikkut
ittumik atuutsitsilertoqarsinnaanersoq.
Maannalu akissut neriulluarnarneruvoq.
Aqqusinikkut angallannermi inatsit juunip 11-ani nutarterneqarmat Kalaallit
Nunaanni ATV-nik biilernermut nutaamik periusissaliortoqartoq
ilisimatitsissutigineqartoq Ineqarnermut, attaveqarnermut isorliunerusunullu
naalakkersuisoq Aqqaluaq B. Egede (IA) allappoq.
Biilersinnaanermut allagartaqarnani nunaqarfinni asfalteqanngitsuni ATV-nik ingerlasoqarsinnaalersillugu angallannermut inatsimmi immikkut ittumik allannguisoqarsinnaanersoq Jørgen Rosbach Demokraatineersoq aperivoq. Apeqqut maanna akineqarpoq.
Assi: Privat
Periusissaq
nutaaq naapertorlugu illoqarfinni arfinilinni najoqqutassiortoqassaaq. Illoqarfiit arfinillit taaneqartut biilernermut
ilinniarfinnik peqarnissaat siunertaavoq. ATV-sinnaanermilli
allagartartaarnissamik periarfissat assigiinngiiaarsinnaapput,
Attaveqaqatigiinnermut, Ineqarnermut Isorliunerusunullu naalakkersuisoqarfik
Sermitsiamut ilisimatitsivoq. ATV-nik sukkanerpaamik akunnermut 30
kilometerinik ingerlasinnaasunik ATV-iutillit ATV-mut ingerlatsinermut
allagartaqarnissaq piumasaqaataavoq. Aamma illoqarfiit arfinillit
taakkua avataanni ATV-nillu akunnermut sukkanerpaamik 30 kilometerinik
ingerlasinnaasunik ATV-qartunut biilersinnaanermut allagartaqarnissaq
piumasaqaataassanngilaq.
Upernaakkut
ataatsimiinnermi oqaluuserineqarnissaa naatsorsuutigineqartoq
Inatsit
allanngortinneqarpat Kalaallit Nunaanni Angallannermut Inatsit
allanngortinneqartariaqarpoq. Inatsisissatut siunnersuut Angallannermut
ministeeriaqarfiup suliarereerpagu tusarniutigineqassaaq. Tamatuma kingorna
Folketingimi akuerineqartinnagu Inatsisartunut isumaliutissiissutitut
saqqummiunneqassaaq.
Allannguutissatut
siunnersuutip 2026-mi upernaakkut ataatsimiinnermi Inatsisartunut
saqqummiunneqarsinnaanissaa sulissutigineqartoq Aqqaluaq B. Egedep
ilisimatitsissutigaa.
