MOTOORI
Nuummi mittarfimmi majuartarfiit qulisalerneqartussanngortut
Angalasut biilinut sivisuumik uninngasarfinnit timmisartoqarfimmut isumannaatsumik qanittukkunni pisussinnaalissapput. Greenland Airportsimmi Permagreen majuartarfiit qulisassaannik sanaartortussatut suliassippaa. Sanaartorneq decembarimi naammassineqartussatut naatsorsuutigineqarpoq.
Biilinut sivisuumik uninngasarfinniit timmisartoqarfimmut majuartarfiit angalasunut unammillernarsimapput, ingammik ukiukkut majuartarfiit apummit sermimillu quasartinneqartarmata. Maanna Greenland Airports majuartarfinnut qulisassamik ikkussuivoq, taannalu decembarimi naammassineqartussatut naatsorsuutigineqarpoq.
Sanaartornermik
ingerlatsivik Permagreen Nuummi mittarfissuarmi biilinut uninngasarfinnit
timmisartoqarfimmut majuartarfiit qulisassaannik sapaatit akunnerisa tulliuttut
ingerlaneranni ikkussuissaaq.
Greenland Airports naapertorlugu qulisamik
ikkussuineq decembarip ingerlanerani naammassineqassaaq.
Uninngasarfinnit
timmisartoqarfimmut isernissamut periarfissat pitsaanerpaajunngitsut Greenland
Airportsip nassuerutiginikuuaa.
Naak ullut tamaasa arlaleriarluni
aputaajaasoqartaraluartoq majuartarfiit ukiuunerani sermimik apummillu
qallerneqartarput.
Angalasorpassuit, ingammik nassatanik oqimaatsunik
meeqqanillu mikisunik tigumiaqaraangamik, utoqqaagunik imaluunniit
pitsorlukkunik majuartarfikkut aternissaq toqqissisimananngitsutut
misigisarpaat.
Permagreen majuartarfiit qulisassaannik sanaartortuussaaq.
Illustration: Greenland Airports
Angalasut
aputaajasoqarsimanersoq isumakuluutigisariaqannginniassammassuk majuartarfiit
qulisalerneqarsinnaanissaat misissorneqalersoq Greenland Airportsimi pisortaq
Jens Lauridsen juunip aallartinnerani Sermitsiamut oqarpoq.
Ilusilersorneqarnera naammassereersoq
Majuartarfiit qulisalerneqarnerat 2025-mi aasakkut aallartinneqarsinnaasoq
Greenland Airports sapaatit akunnialui qaangiummata Facebookimi allappoq.
”Maannakkut majuartarfiusut ajoraluartumik perserfigineqartorujussuusarput,
tamatumalu malitsigisaanik mittarfimmukartunut akornutaasarluni
aputaajaaniartarnerlu ajornakusoortarluni. Qulisalernerani majuartarfiit
tamakkerlugit qulisaqalissapput, tamatumalu terminalimukarnissaq
terminaliminngaaniillu taakunnarnissaq ajornannginnerujussuanngortittussaavaa
toqqissisimanarnerulersittusaallugulu – pingaartumik ukiuunerani. Ilusilersornera
piareereerpoq, aammalu entreprenøriniit neqeroorummik piniarnissaq neqeroorutinillu
akuersissuteqarnissaq ingerlappagut”, Greenland Airportsimi suliniutinut pisortamut tullersorti Christian
Andersen Facebookimi nalunaarummi oqarpoq.
Majuartarfiit aputinittannginniassammata tamarmik qulisalerneqassapput, tassa imaappoq aamma sinaatigut assiaquteqassapput.
Assi: Oscar Scott Carl
Tamatuma kingorna Permagreen suliakkerneqarpoq. Septembarip ingerlanerani
aallartinnissaat naatsorsuutigineqarpoq.
Majuartarfiit qulisaat matunik nammineerlutik ammartartunik
matusartunillu aallaqqaammut pilerneqarsimavoq. Tamatuma kingorna nammineq
ammartartunik matusartunillu matoqassanngitsoq, assiliartaliussallu eqqortut
Greenland Airports Sermitsiamut nalunaarpoq.
