Qamuteralannik nuannarisaqartoq: Kiffaanngissuseqarneruvoq, ataatsimoorfeqarneq pissanganartorsiornerlu

23-nik ukiullip Victor Wind Meinelip qamuteralaat timersuutigalugit nuannarai, tallimanillimi ukioqarluni ataatami qamuteralaani ilaasuulluni nunap timaani angalaaqataasalernikuuvoq.

 Taamanimiilli qamuteralannik assigiinngitsunik arlalinnik angalanissaminut piginnaasaqalersimavoq, ullumikkullu qaqqani freerider-it pikkorinnerpaat ilagaat, tamannalu ilaatigut Greenland Hill Climb Championshipimi, ukioq manna apriilip qiteqqunnerani ingerlanneqartumi, normu 2-nngornermini uppernarsarpaa.

 – Aappaagu ajugaajumaarpunga, Victor Wind Meinel illarluni oqarpoq.

 Arctic Catinik atuisoq

Victor Wind Meinel Nuummi inunngorpoq peroriartorlunilu. Mekanikeritut ilinniarsimavoq Deres Automilu sulisuulluni. Sunngiffimmini vandscootererujoorsinnaasarpoq, kisianni ukiukkut qaammatinilu arlalinni qaqqani qamuteralalluni angalasarnini qilanaarinerpaasarpaa.

 – Ski-Doonik, Lynxinik aamma Arctic Catinik qamuteralaqarnikuuvunga. Kisianni Arctic Catinik ingerlaartarnera nuannarinerpaavara. Sukkasuujupput pitsaallutillu, Kalaallit Nunaannilu kingoraartissarsiniarneq pisariitsuulluni. Kingoraartissamaatit Sisimiuni Arctic Starimi pisiarisarpakka, Nuummullu nassiussipallannissaq pikkoriffigaat kiffartuussinerallu pitsaalluinnarluni, Victor Wind Meinel oqarpoq, taanna 2025 Arctic Cat Catalyst 858 turbonik qamuteralaqarpoq.

 Qamuteralannik nutaanik pisaartoq

Taanna ukioq manna qamuteralannik nutaanik pisivoq; Arctic Cat 2026 Catalyst 858 HCR, taakkualu qaqqakkoorutigeqqaarnissaat qallivoq.

– 13-it missaannik ukioqarlunga nammineerlunga qamuteralattalerpunga. Ingerlaartarninni kiffaanngissuseqarneq nuannareqaara, aamma qamuteralattartut allat peqatiginissaat nuannarisama ilagaat. Soorunami pissanganartorsiorneq nuannarisama aamma ilagaat, Victor Wind Meinel oqarpoq, taanna Kalaallit Nunaanni qamuteralannik tinngallannermini ulikarsinnaasut (backflip) ikittunnguit ilagaat, aamma qaarsut sivingarnannit assigisaannillu 22 meterisut portutigisumit silaannakkoorsinnaasarpoq.

 – Nuannariinnarpara, ulorianartuusinnaanera eqqarsaatigivallaarnagu. Soorunami mianersortarpunga, niaqorornaveeqquteqartarpunga, isumannaallisaanermut aaqanngitsoqartarpunga, seeqqorornaveeqquteqartarpunga, manngertunik kamippaqartarpunga, aputip sisoorsinnaaneranut sillimmatinnut nammattagaqartarpunga, siggartaateqartarpunga, nivaataqartarpunga, ikiueqqaarnermut atortunik nassataqartarpunga il.il., tamatigullu arlaliulluta ingerlaaqatigiittarpugut. Tamakku saniatigut anoraa silassarlu eqqumaffigisarpavut, qaqqanilu pissutsit qanoq inneri ilisimallugit. Assersuutigiinnarlugu nittaarujussuarsimappat aputip sisoorsinnaanera eqqumaffigilluartarparput.

 Ataqatigiinneq nuannisaqatigiinnerlu

Nunatsinni qamuteralannik ingerlaartartut ataqatigiingaatsiarput, akuttunngitsumillu nalunaaquttap akunnerpassui atorlugit aqqutissat tinngallaffissat piareersartarpaat, sisoraarfissanillu aqqusinniuutit ikiortigalugit aqqutissiortarput.

 – Amerlanertigut qaqqamiittarsinnaavugut grilleqatigiittarlutalu nuannisaqatigiittarluta. Taamaattumik qamuteralannik ingerlaarneq inuttut pissusinnut ilaasorujussuuvoq, ukiorpassuarnilu ingerlatiinnassavara, Victor Wind Meinel oqarpoq.