Royal Greenlandip naatsorsuutai amigartoorfioqqittut

Suliffeqarfissuup Namminersorlutik Oqartussanit pigineqartup 2024-mi angusai “naammaginanngitsutut” nalilerneqartut Royal Greenlandip tusagassiuutinut nalunaarummi ilisimatitsissutigaa.

Angusat suli akileraartigani 196 millionit koruuninik amigartooruteqarfiupput. Kaaviiaartitat 5,6 mia. koruuniupput, tassa annikitsumik ikileriarnerulaarluni.

- Suliffeqarfiup siunissami nukittunerunissaanik qajannaannerunissaanillu qulakkeerinnittussanik 2024-mi ajornakusoortunik pisarialimmilli aalajangiisoqartariaqartarsimavoq, suliffeqarfik allappoq, nangillunilu:

- Nalinginnaasumik ingerlatat siornamut sanilliullugit 116 mio. DKK-nik pitsaanerusumik angusaqarfiuvoq, angusallu pingaarnertut tunisassiat ineriartortinnerunerinit pipput, tunisassiallu tassaasut saattuat snekrabbet, saarullit kiisalu raajat uusut qalipaajakkallu - raajalli qalipallit ilanngunnagit. Angusaq pitsaasutut isigaarput.

Royal Greenland naapertorlugu ingerlatsineq siusinnerusukkut ingerlatsinertut suli peqqinngilaq aammalu ukiumilu angusat nalikilliliinermik ilaqarlutik.

Taamaalilluni 2024 Royal Greenlandip aningaasaqarneranik iluarsaassiffiunngilaq, suliffeqarfissuarmi 2023-mi 211 millionit koruuninik aamma amigartooruteqangaatsiarnikuummat.

Kisitsisit pingaarnerit ataani takukkit:

Royal Greenland naapertorlugu ukiumut naatsorsuutinut sunniuteqangaartut tassaapput nalikilliliinerit:

• Chile: Ingerlatanit iluanaarutissatut naatsorsuutigisavut anguneqanngillat, tamannalu pissaraluanit 220 mio. DKK-nik nalikilliliinermik kinguneqarpoq.
• Norge: Suleqatigisartakkatta saattuniarniarnissamut akuerissut pinngitsoornikuaat, tamatumalu kingunerisaanik 2025-mi aalisarsinnaanatik. Tamanna tunngavigalugu pissaraluavut 57 mio. DKK-nik nalikillilerneqarput.

- Nalikilliliinerit tamakku katillugit 277 mio. DKK-nik nalikilliliiviupput, soorunami ukiumut angusassanut assut sunniuteqarput, pisortaanerugallartoq Preben Sunke oqarpoq. Atorfik taanna tigummivaa pisortaanerugallartoq Susanne Arfelt Rajamand februaarimi soraarsitaammat.

Niuerfinni pingaarnerni tunisaqarnerulerneq

2024-mi pingaarnertut nioqquteqarfiusut angusarissaarfiunerat pisortaanerugallartup nuannaarutigai:

- Saarulliit, qalerallit kiisalu raajat uusut qalipaajakkallu angusarissaarfigigatsigit nuannaarutigaara.

- Nunatsinni saarullinnik nunami tunisassiornerput siullermeerluni oqimaaqatigiissumik ingerlavoq, Europamiit, Asiamiit Amerikallu Avannaaniit pisiortorusunnerup annertusiartornera akillu qaffakkiartornerat nalaapparput. Tamakku 2025-mi angusassatsinnut aallarnisaataalluarput, Preben Sunke oqarpoq. 

Royal Greenland iliuusissatut pilersaarutaa ”Back to Black” annertuumik pitsanngorsaasimavoq, tamatumalu kingunerisaanik 52 millionit koruuninik sipaartoqarsimavoq.

- Iliuusissatut pilersaarut nangittumik 2025-mi ingerlatissavarput, 2025-milu iluanaaruteqarluta ingerlaqqilernissarput naatsorsuutigaarput, Preben Sunke oqarpoq.