”Sila” Tyskisut
Tysklandimi naqiterisitsisarfik Inuit Verlag sapaatip akunnerani kingullermi Frankfurtimi atuakkanik saqqummersitsivimmi Nunatsinni Atuakkiortut Peqatigiiffiat peqatigalugu nittarsaassivoq.
Frankfurtimi atuakkanik saqqummersitsinermi siullerpaamik kalaallisut atuffassisoqarpoq. Lana Hansenip atuakkiaa ”Sila” naqiterisitsisarfimmi Milik Publicingimit saqqummersinneqartoq, maannalu Inuit Verlagimit tyskisuunngorlugu saqqummersinneqartoq, atuakkiortup Lana Hansenip (talerperleq) Inuit Verlagimillu piginnittup Laali Lyberthip nittarsaappaat.
Assi: Kalaallit Atuakkiortut
Inuit
Verlag kalaallimit naqiterisitsisartumit aqunneqartoq aamma Kalaallit
Atuakkiortut Frankfurtimi atuakkanik saqqummersitsinermi oktobarip 15-iannit
19-iata tungaanut ataatsimoorlutik nittarsaassipput. Inuit Verlag, kalaallimit naqiterisitsisartumit Laali Lyberthimit aqunneqartoq,
Tysklandimi illoqarfimmi Daunimi naqiterisitsisarfiup Kraterleuchtenip ataani
pilersinneqarsimavoq.
Inuit Verlagimik piginnittoq Laali Lyberth ilaquttanilu Tysklandimi Daunimi najugaqarpoq. Taanna kalaallinit kingoqqisuugami kalaallit atuakkiaat tyskit oqaasiinut nutsernissaat pingaartippaa.
Foto: Sven Nieder
Atuakkanik
naqiterisitsisarfiup kalaallit atuakkiaat Tyskisut oqaasilinnut
pissarsiarineqarsinnaasunngortittarpai, Østrigi Schweizilu ilanngullugit 100
millioninit amerlanerusunut, saqqummiuttarlugit. Kalaallit Atuakkiortut
suleqatigalugit nunani tamalaani nutserinerit amerlanerulernissaat
Issittormiullu nipaannik nukittorsaanissaq aqqutissiuunneqarpoq. Atuakkiortut Peqatigiiffiat tusagassiuutinut
nalunaarummini taama allappoq.
Inuit Verlagimit saqqummersitaq siulleq tassaavoq Lana Hansenimit atuakkiarineqartoq “Sila”.
Inuit Verlagimit tyskisuumut nutserlugit 2026-mi saqqummersinneqartussat tullii marluk tassaapput Maria Bach Kreutzmannip atuakkiaa “GROENLANDICA Bestiarium” aamma Sørine Steenholdtip atuakkiaa “Zombiet Nunaat”. Inuit Verlagsip ilisarnaataa eqqumiitsuliortoq ilusilersuisartorlu Arnajaraq Støvlbæk suleqatigalugu suliarineqarnikuuvoq.
Assi: Kalaallit Atuakkiortut
Kalaallisut
atuffassineq
Frankfurtimi
atuakkanik saqqummersitsineq nunarsuarmi aaqqissuussat annersaasa ilagaat,
tassanilu ullut sisamat ingerlaneranni 250.000-ingajaat takuniaasarput.
Kalaallit atuakkiaat assigiinngitsorpassuit, naqiterisitsisarfimmit
atuakkiortullu peqatigiiffiannit ataatsimoorlutik saqqummiunneqarput, soorlu
meeqqanut atuakkiat, atuakkat qangarnisaanerusut ullutsinnilu atuakkiat.
Inuit
Verlagimit saqqummersitaq siulleq tassaavoq Lana Hansenimit atuakkiarineqartoq
Georg Olsenimillu assiliartalersugaq meeqqanut atuakkiaq “Sila”.
Inuit
Verlagimit 2026-mi saqqummersinneqartussat tullii marluk tassaapput Maria Bach
Kreutzmannip atuakkiaa “GROENLANDICA Bestiarium” aamma Sørine Steenholdtip
atuakkiaa “Zombiet Nunaat”. Taakku tamarmik nunani avannarlerni nutserinermut
aningaasaliissutinit Kalaallit Atuakkiortunit agguaanneqartartunit
tapiiffigineqarlutik saqqummersinneqarput.
Atuakkiortup
Lana Hansenip saqqummersitsinermut peqataanera atuakkiortut peqatigiiffiannit
aningaasaliiffigineqarpoq.
