Tuukkaaraq illoqarfimmut aqqusaartoq

Sapaatip akunnerani kingullermi pingasunngornermi SAS Københavnimit Nuummut aasaanerani timmisartuussisarnerani timmisartoq Nuummut mimmat Air Greenlandimi sulisut soqutiginninnerulaarput.

Ullormi pineqartumi – siusinnerusukkut pisartut assigalugit – mittarfittaarsuarmi ulloq nuannerpallaarsimanngilaq pujorluni kinguaattoortoqarlunilu. Air Greenlandip Københavnimit Nuummut Tuukkamik timmisartuussinissani kinguartippaa, aqqarnulli missaanni timmisartoq aappalaartoq Nunatsinni illoqarfiit pingaarnersaannut qanillivoq, taamalu aqqanermut minnissaa pilersaarutaasimalluni.

Minniarluni siullermik misiliinera iluatsinneqanngilaq. Tassami Nuuk putsumik oqimaatsumik pujorami. Nal. 11.46 aappassaannik misiliivoq, timmisartumili inuttat minnissartik aamma taamaatiinnarlugu.

Pingajussaanilli misiliigami iluatsippaa. Tuukkap nal. 12.27 assakaasuni kiisami Nuummi mittarfimmut tutsissinnaanngorpai, illoqarfiit pingaarnersaata qulaani nalunaaquttap akunnerisa aappaata affaani qulaavaareerluni.

Timmisartoq taanna aamma Flightradar24-mi malinnaaffigineqarnerpaanut ilaavoq, Inga Dora Guðmundsdottir Markussen Air Greenlandimeersoq oqaluttuarpoq.

Timmisartoq immikkorluinnaq ittoq

Taava SAS-ip timmisartua SK1294 tullinnguulluni mittussanngorpoq – timmisartorlu taanna SAS-ip timmisartuinit allanit allaanerulluinnarpoq. – Air Greenlandimi sulisut timmisartup unammillertup Nuummut minnissaa malinnaaffigilluinnarpaat.

SAS-immi timmisartua taanna LN-RGO-mik taaguuteqarpoq, aappaagulu Air Greenlandip timmisartuutitassaatut A320neo-nngortussanngorluni – tamannalu soorunami Air Greenlandimi sulisut immikkut soqutigisimavaat.

LN-RGO novembarimi 2016-imi SAS-ip timmisartutaannut ilannguppoq. Ukiuni qulini attartorneqarnera aappaagu novembarimi naappat, Air Greenlandip timmisartoq ukiuni arfinilinni attartorniarlugu isumaqatigiissuteqarfigaa, Ilulissani mittarfik nutaaq ammarneqarpat Tuukkamut tapertaasussanngorlugu.

Tuukkaaraq

Air Greenlandimi sulisut timmisartussartik soorunami atseriikatappaat. Tassami atserpaat Tuukkaaraq.

- Timmisartoq tigugutsigu soorunami aappaluttumik qalipanneqassaaq, ilisarnartunillu ”isarussanik” qernertunik toornernillu ilisarnaaserneqassalluni, Inga Dora Guðmundsdottir Markussen oqarpoq.

- Taamanikkussamut timmisartoq ukiuni qulini timmisartuussisareersimassaaq, taamaattumik timmisartup ilua aamma misissortariaqarparput – tamatumunngalu atatillugu qanoq iliuuseqarniarnerluta aalajangissallutigu. 2026-lli naalernerata tungaanut piffissaqarluarpugut, qanorlu pisoqarnissaa suli oqaatigisinnaanngilara.

- Suliassaq suliarileruttorparput, soorunalimi aamma iluata ilusilersornera eqqarsaatigissavarput — issiaviit inissitsiterneqarnerat, wifi aliikkusersuutissallu — suliarineqaleruttorput. Tamakku pillugit kingusinnerusukkut nalunaaruteqarumaarpugut, aatsaammi suliarileruttoratsigik.

Air Greenlandip timmisartussaa Airbus A320neo timmisartortitseqatigiiffippassuarnit atorneqartorujussuuvoq. SAS-iinnarmi maannakkut 67-inik timmisartortitseqatigiiffiup ilusilersorsimasaannik, 180-inik ilaasoqarsinnaasunik timmisartuuteqarpoq.

Timmisartoq suliffeqarfimmi Airbusimi tunisaanerpaavoq. 2023-mi marsimi A320-t 16.873-it inniminnerneqarsimapput, taakkunanngalu 10.798-it tunineqarsimallutik.

Timmisartut Airbus A318, A319/timmisartuaraq, A320 aamma A321, ilaasunik qanittumut akunnattumullu ungasissusilinnut timmisartussinerni atorneqartartut marlunnik motoreqartut mikinerusut Airbusimit ineriartortinneqarsimapput tunisassiarineqarlutillu. A320 marsimi 1984-imi siullermeerluni saqqummiunneqarpoq februaarimilu 1987-imi siullermeerluni timmisartuussilluni. Ukiup tulliani apriilimi 1988-imi Air Francemit atorneqalerpoq – 2026-llu naalernerani Air Greenlandip A320neo atulissavaa.