Umiarsuaq takornariartaat aamma sikusiutaasinnaasoq Le Commandant Charcot, franskit umiarsuaatileqatigiiffiannit Compagnie du Ponantimit pigineqartoq, Kitaani ukiup taamaalinerani siullermeerluni angalavoq, tamannalu umiarsuup illoqarfiit nunaqarfiillu tikitaani takornarialerisunut innuttaasunullu isertitaqarnissamut periarfissiivoq.
Umiarsuit takornariartaatit illoqarfinnut nunaqarfinnullu tikittartut amerliartornerat ilutigalugu maannakkornininngarnit qanoq aningaasarsiutigineqarnerulersinnaanerat eqqartorneqartariaqartoq, Le Commandant Charcotip tikinnerani suleqataasut isumaqarput.
Umiarsuaq takornariartaat aamma sikusiutaasinnaasoq Le Commandant Charcot, franskit umiarsuaatileqatigiiffiannit Compagnie du Ponantimit pigineqartoq, Kitaani ukiup taamaalinerani siullermeerluni angalavoq, tamannalu umiarsuup illoqarfiit nunaqarfiillu tikitaani takornarialerisunut innuttaasunullu isertitaqarnissamut periarfissiivoq.
Umiarsuit takornariartaatit illoqarfinnut nunaqarfinnullu tikittartut amerliartornerat ilutigalugu maannakkornininngarnit qanoq aningaasarsiutigineqarnerulersinnaanerat eqqartorneqartariaqartoq, Le Commandant Charcotip tikinnerani suleqataasut isumaqarput.
Qimussimik sukkaniuttut isiginnaaraat
Umiarsuaq takornariartaat Le Commandant Charcot Issittumi sikulimmi angalanissamut immikkut tulluussagaasuusoq Canadamiit Kujataanut Tunumullu februarimi angalavoq, tamaanngaanniillu Islandimi Reykjevikkimut ingerlaqqilluni. Kujataanut tamatuma kingorna uteqqippoq, tassanngaanniillu Sisimiunut ingerlaqqippoq, tamaani Avannaata Qimussersuata marsip naanerani aaqqissuunneqarneranut atatillugu qimussimik sukkaniunnerit isiginnaarnissaat siunertaalluni.
Takornarianik angallassisartoq umiarsuarmilu inuttaasoq Julien Caquineau taama oqarpoq. Taanna Oqaatsuni Ilulissanilu ukiuni 19-ini najugaqarnikuuvoq, Le Commandant Charcotimilu ukiuni kingullerni marlunni inuttaalluni.
- Takornariartaatit allat ukiut siuliini qilalugarniarnerup nalaani akornutaasarsimapput, tamannalu uagut angalanitsinni pinngitsoortinnissaa pingaartissimavarput. Taamaammat angalanitsinni ornitassatsinnut aallartinnata tamaanga angalanissarput ajorineqannginnersoq illoqarfinni nunaqarfinnilu attassuteqarfigisavut apereqqaartarpagut, takornarianik angallassisartoq umiarsuarmilu inuttaasoq Julien Caquineau oqarpoq.
Privatfoto
- Takornariat qimussimik sukkaniuttunik isiginnaarput, tamatumalu saniatigut qimussimik qamuteralannillu angallanneqarlutik, tamannalu assut nuannaraat.
- Sisimiuniinnitsinnilu Qeqqata Kommuniata borgmesteria Malik Bertelsen umiarsuarmut pulaarpoq, taassumalu siunissami suleqatigiinnerunissarput kisaatigigini oqaatigaa, taanna oqarpoq.
Sulilu sikuugaluaqisoq umiarsuaq avannamut ingerlaqqippoq.
Qasigiannguaniinneq iluatsilluartoq
Le Commandant Charcot Qasigiannguanukarpoq, sulili sikuummat umiarsuaq illoqarfiup ungasinngisaanut sikumut kiggigussaalluni ingerlariaqqissinnaajunnarpoq. Takornariallu innuttaasunik naapitaqarnissartik pingaartittaraat, Julien Caquineau oqarpoq.
- Takornariat tikitaminni innuttaasut qanimut naapikkusuttarpaat, taamaammat innuttaasut umiarsuarmut takornariarnissaannut periarfissittarpagut, tamannalu soqutigineqaqaaq.
- Qasigiannguaniinnitsinni inuit 350-it umiarsuarmut takornariarput. Umiarsuup eqqaani sikumi kalaaliminernik aamma sassaallertoqarpoq, takornariallu qamuteralannik nunamut angallanneqarlutik.
- Angalanitsinni innuttaasunut attaveqarluarpugut, tamannalu tamatsinnut assut nuannerpoq, taanna oqarpoq.
Umiarsuaq Qasigiannguaniit Ilulissiartussaagaluarpoq, taamaatiinnarneqartariaqarsimallunili.
Ilulissanut tikinngitsoq
Umiarsuarnik takornariartaatinik Ilulissanut tikittoqaraangat takornarialerisut nunaqavissut atorneqarneqarpiartanngitsut, akerlianilli takornariartitsiviit avataaneersunit pigineqartut atorneqarluartaqisut, Ilulissani takornarialerisut nunaqavissut qasseeriarlutik oqariartuutigisarpaat. Tamannarpiarlu peqqutigalugu Ilulissani takornarialerisut talittarfimmi allagartarsualisaarlutik akerliussutsimik siorna takutitsipput.
Le Commandant Charcotillu Ilulissanut tikinnissaanut atatillugu akerliussutsimik takutitsisoqarnissaanik ilimasaarisoqarnera pissutaalluni, umiarsuaq Kalaallit Nunaanni takornariaqarfiit annersaannut tikinnani Avannamukaqqiinnartariaqarsimasoq, Julien Caquineau oqarpoq.
- Umiarsuup Ilulissanut tikinngitsoornera soorunami uggornarpoq. Umiarsuarnillu takornariartaatinik Ilulissanut tikittoqaraangat, takornarialerisut nunaqavissut suliassangaartarnatik oqaatigisarpaat, taamaattumik akerliunerat paasilluarsinnaavara.
Umiarsuaq Kullorsuarmiimmat takornarianik qimussiussisut allallu ikiuuttut kusanasaakkanik sassaasartumut akeqanngitsumik neriartorsimasut, assimi saarlerni saamerlermiittoq Timotheus Petersen oqarpoq.
Privatfoto
- Tamatumali siunissami ajornartorsiutaajunnaarnissaa qularutiginngilara, taamanikkussamullu Ilulissanukartalernissarput qilaanaaraarput, taanna oqarpoq.
Umiarsuup Qasigiannguaniit Qeqertarsuup avannarpasissuani nunaqarfik Kangerluk tikittussaagaluarpaa, nunaqarfiulli taassuma eqqaani siku piniarfiummat tamannalu qimussimik qamuteralannillu aamma aqqutaammat, umiarsuaq nunaqarfiup avataani sikumiiginnarpoq.
Le Commandant Charcot tamatuma kingorna tassa sapaatit akunnerata siuliani ullualunni Kullorsuarmiippoq.
Periarfissaq atorluarneqarnerusariaqartoq
Umiarsuup Qasigiannguaniinnera sivisuallaanngikkaluartoq isertitaqaataalaarfiusoq, Johannes Mathæussen oqarpoq. Umiarsuup tikinnissaa sioqqullugu attavigineqartoq, taamaammallu umiarsuup eqqaani sikumi nerrivilerluni kalaaliminernik sassaallernissaminut periarfissaqarsimasoq, taassuma oqaatigaa.
- Kalaaliminernik sassaallernerma saniatigut takornariat qamuteralannik illoqarfimmut angallappakka, tamannalu 3.000 koruuninik isertitaqaatigaara.
Umiarsuarmi takornariartaammi aamma sikusiutaasinnaasumi Le Commandant Charcotimi ilaasut amerlanerpaartaat Tysklandimeersuupput, Amerikameersuupput Frankrigimeersuupput Canadameersuullutillu, taakkualu illoqarfinni nunaqarfinnilu ukiup taamaalinerani tikilluaqqusaanertik nuannaarutigeqigaat, Julien Caquineaup oqaatigaa.
Foto: Johannes Mathæussen.
- Periarfissat taamaattut amerlanerusariaqarlutillu atorluarneqarnerusariaqarput, Johannes Mathæussen oqarpoq.
Taanna takornarianik qimussiusarnikuuvoq, ilaatigut Jonathan Motzfeldtiugaluaq kunngikkormiutullu ataqqinassusilik prins Joachim qimussiunnikuusimallugit.
Le Commandant Charcotip Kullorsuarmiinnerani takornariat qimussimik angallanneqartut, nunaqarfimmi aqutsisunut ilaasortaq Timotheus Petersen oqarpoq.
- Taama ukiuutigisumi sikuutigisumilu umiarsiarmik takornariartaammik tikittoqarnera eqqumiilaarpoq. Tikinnerat pilersaarusiugaavallaanngilaq, taamaattumik sanaluttartut assassortartullu tuniniiaanissaannut periarfissinneqanngillat.
- Taamaakkaluartoq takornariatat qimussiunneqarput, qimissusiussinerlu 2.000 koruuninik akeqarluni. Tamannalu soorunami iluaqutaavoq, taanna oqarpoq.
Umiarsuit takornariaqartaatit tikittartut amerliartornerat ilutigalugu, taakkua maannakkorniit pilersaarusiorlugaanerusumik aningaasarsiutigineqarsinnaanerat eqqartorneqartariaqartoq, taanna isumaqarpoq.
Le Commandant Charcot aappaagu Sikuiuitsoq Kujallermukassaaq, ukiullu marluk qaangiuppata nunatsinnukaqqissalluni.
