2030-mi savaateqarfiit ikinnerusunik savaatillit tapiissutinik annaasaqassapput
Savaateqarnermik inuussutissarsiuteqarnermut nunalerinermullu tapiissutit pillugit malittarisassat nutaat sisamanngornermi akuerineqarnissaat naatsorsuutigineqarpoq. Malittarisassat siunertaraat nunaateqarfiit mikinerit ikilisarnissaat nunalerinerlu aningaasaqarnikkut imminut akilersinnaanerulernissaq anguniarlugu.
Leiff Josefsen
Misissuinerit takutippaat savaatillit aningaasarsiorniarlutik pisortanit ikiorneqarnissaq pisariaqartilluinnaraat.
Inatsissatut siunnersuutip sisamanngorpat akuerineqartussatut naatsorsuutigisap nunalerinermut tapiissutit pillugit malittarisassat sukateriffigissavai, taamaalilluni savaatit piaqqiorsinnaasut ikinnerpaamik 400-t pigineqarpata aatsaat inuussutissarsiutigalugu nunalerisutut isigineqalissallutik, taamaalillutillu tapiissutinik pisinnaatitaalissallutik.
Allannguutigineqartup siunertaraa naasorissaasut ikittunnguit, aningaasatigut imminut akilersinnaanngitsutut isigineqartut, ikilisarnissaat, taamaalillunilu nunalerinerup aningaasaqarnikkut imminut akilersinnaanerusup ineriartortinnissaanut tapersersuineq.
Savaateqartulli piffissaq sivisunerusoq atorsinnaassavaat nalimmassarniarlutik, minnerpaamik 400-nik savaateqarnissaq aatsaat 2030-mi januaarip aallaqqaataani atuutilissammat.
Peqatigiiffiup killigititaq apparusussimagaluarpaa
Naalakkersuisut anguniarpaat 2030-mi savaateqarfiit 20 procentii kisimik 400-t inorlugit piaqqiorsinnaasunik savaateqarnissaat. Ikinnerpaanik arnavianik savaateqarnerup killigititaa ataallugu uumasuuteqarneq pissutsini immikkuullarissuni akuerineqarsinnaasassaaq.
Savaatillit peqatigiiffiat tusarniaanermi tunngavilersuisimavoq 350-inik arnavianik savaateqarnissaq killilerneqartariaqartoq, tamannali Naalakkersuisunit itigartinneqarpoq, naliliinerup takutimmagu nersutaateqarfiit imminut akilersinnaassagunik minnerpaamik 400-nik arnavissaqartariaqartut.
Aammattaaq nersutaatit tuttullu amerlassusaat killiliiffigineqarsimapput.
Inatsisissatut siunnersuutip naasorissaasoqarfinnik nutaanik piginnilernissaq imaluunniit pilersitsisinnaalernissaq aamma ajornannginnerulersissavaa, nutaatullu inuk ataaseq arlalinnik naasorissaasoqarfittaarsinnaalissalluni.
Aalisarnermut, Piniarnermut Nunalerinermullu Ataatsimiititaliap isumaqatigiilluni siunnersuut akuerineqassasoq inassutigisimavaa, siunnersuut sisamanngornermi pingajussaaneerneqarpat akuerineqassasoq ilimanarluinnarpoq.
