KOMMUNE KUJALLEQ
A-skattit akilinngitsuukkat naatsorsuutillu kinguaattoorutit misissorneqarput
Aningaasaqarnermut akileraartarnermullu Naalakkersuisoq, Erik Jensen (S), Kommune Kujallermi kommunalbestyrelsitulli tupaallaqqatigivoq kommunep nunatta karsianut akiitsoqalersimanera pillugu. - Maannakkut pisoq pillugu annertunerusumik oqaaseqarsinnaanngilanga, kisianni misissuinermik aallartitsereerpugut qanoq pisoqarsimanersoq paasiniarlugu, Erik Jensen (S) Sermitsiamut oqarpoq.
Aningaasaqarnermut akileraartarnermullu Naalakkersuisoq, Erik Jensen (S) ulluinnarni nunamut namminermut pissutsit pillugit aammalu kommunit nakkutigineqarnerannik suliaqartuunngilaq, tamannami Jess Svane (S)-p isumagisaraa. Jensen aamma borgmesteri Stine Egede aamma Kommune Kujallermi kommunalbestyrelsemi ilaasortat allat assigalugit tupigusuppoq kommuni Namminersorlutik Oqartussanut akiitsoqalersinnaasimammat. Aammattaaq kommunip 2021-mi, 2022-mi 2023-milu naatsorsuutinik matusinissaa amigaataavoq, Jensenilu nassuiaammik piaarnerpaamik tunineqassalluni naatsorsuutiginnippoq.
Asseq toqqorsivimmit: Leiff Josefsen
Immaqa pitsaanngilaq, nunami namminermi naalakkersuisoqarfik aningaasaqarnermut naalakkerusisoqarfimmit ungasimmat, kukkunerit annertuut, kommunip taarsigassarsiaanik ilasinissamik pisariaqartitsiviulersimasut pisinnaappata.
- Nunami namminermi naalakkersuinikkut aqutsineq ulluinnarni suliassaqarfimma ataaniinngilaq, aamma kommunit aqunneqarnerat pillugu nakkutilliineq nunami namminermi naalakkersuisoqarfimmi ingerlanneqarpoq.
- Kisianni taamaakkaluartoq uanga akisussaaffigaara pisortat ingerlatsiviini - kommuniuppata namminersorlutilluunniit oqartussaappata - Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaat naapertorlugu ingerlatsisoqarnersoq qulakkeersimassallugu. Isertuutissanngilaralu, taamak kukkusoqarsimasinnaanera uanga aamma tupaallaatigeqigakku, kukkunerimmi taamaattut pisussaanngikkaluarput, taamaammallu piaarnerpaamik qulaajaasoqarnissaa nassuaasoqarnissaalu piumasarinikuuakka, aningaasaqarnermut akileraartarnermullu Naalakkersuisoq Erik Jensen (S) oqarpoq.
Kommune Kujalliup akileraarutit A-skattit akilinngitsoortarsimaneratigut namminersorlutik oqartussanut akiitsoqalersimanerata paasineqarnerata kingunerisaanik Erik Jensen qulaajaasitsilluni ingerlaannaq aallartitsivoq paasineqassammat qanoq ililluni kommune kinguaattoorsimasinnaanersoq aningaasanik nunatta karsianut ingerlateqqitassanik ingerlatitseqqinngitsoornermigut.
Kommunip aamma ukiuni arlalinni naatsorsuutit matusimanngilai
Paasinarsivorli A-skattimik akiliinngitsoornerit kisimik kinguaattorutaanngitsut. Tassami kommunip aamma naatsorsuutit 2021-moortut, 2022-moortut aammalu 2023-moortut matunissaat amigaatigivai.
Borgmesteri Stine Egede (IA) Sermitsiamut oqarpoq, ataatsimoorluni naatsorsuutilereriaatsimut nutaamut kommunip atuilernera aallaqqaamut ajornartorsiutinik pilersitsisimasoq, tamatumalu saniatigut kukkunersiuisumik suleqatiginninnermik kinguaattoornermik pilersitsisimasoq, 2021-mi naatsorsuutit matuneqarnissaat aallarniutaalluni:
- Siullermik 2021-mi naatsorsuutit matusinnaanngorutsigit, taava aatsaat 2022-mi 2023-milu naatsorsuutit matusinnaavavut. Kisianni naatsorsuutigaara qanittumi, kingusinnerpaamillu aasaanerani sulinngiffeqareerneq qaangiuppat naatsorsuutit matusinnaassallugit, Stine Egede oqarpoq.
Kisianni aamma tamanna aningaasaqarnermut naalakkersuisumut Erik Jensenimut (S) tupaallatsitsivoq:
- Soorunami kommunet namminersorlutillu oqartussat missingersuusiortarnermut naatsorsuusiortarnermullu inatsisaat malinneqartussaavoq. Inatsit taanna aamma nalunaarutit tassunga atasut ersarissuupput, taamaattumik naatsorsuutinik matusinngitsoortarnerit pisussaanngikkaluarput, taamaattorlo suliassaq tamanna pillugu annertunerusumik oqaaseqarsinnaanngikkallarpunga, naammaginartumik paasissutissiisoqarnissaa utaqqeqqaartariaqassavara, neriuutigaaralu kingusinnerpaamik sapaatip akunnerata tulliata aallartinnerani pissarsiarisinnaassallugu, Erik Jensen Sermitsiamut oqarpoq.
