Kommunip A-skatinik akiliinissani puigorsimavaa

Kommune Kujallermi kommunalbestyrelsi ullumi pingasunngornermi maajip 22-ani ataatsimiippoq. 

Ullormut oqaluuserisassani takuneqarsinnaavoq, kommuni aningaasaqarnikkut annertuumik ajornartorsiuteqartoq, tamannalu annerpaamik pissuteqartoq kommunip akileraarutit A-mik taaneqartartut 2023-mi qaammatini marlunni-pingasuni aammalu AMA (sulisoqarnermut akitsuut, aaqq.) akilinngitsoorsimammagit.

2024-mi januaarimi naatsorsuutini takuneqarsinnaavoq, kommunip akileraarutit A-mut 43 millioni koruunit akiitsorilersimagai.

AAMMA ATUARUK

Kommune Kujallermi innuttaasut akileraarnikinnerulissapput

Nassuiaasoqarnissaa piumasarineqarpoq misissuinerlu aallartinneqarpoq

Ataatsimiinnermi paasissutissat saqqummertut naapertorlugit kommunalbestyrelsip tamarmiusup ilisimasimanngilaa akileraarutigigut kommune akiitsunikkiartulersimasoq, aatsaallu april 2024-mi qinikkanut ilisimatitsisoqarsimasoq. 

Borgmesteri Stine Egede (IA) nassuiaanermini oqarpoq tupatsitaangaatsiarsimalluni paasitinneqarami akiitsoqalersimaneq pillugu, taanna kommunalbestyrelsimut neriorsuivoq piaarnerpaamik qulaajaalluni misissuisoqassasoq aamma nassuiaasoqassasoq aningaasat sumut atorneqarsimanersut:

- Uanga oqaatigisinnaanngilanga qanoq pisoqarsimanersoq misissuinerup naammassineqarnissaa tikillugu, kisianni erseqqissaatigissavara arlaannaatigulluunniit pinerlunniarnermik pisimasoq aallaaveqanngimmat, borgmester Stine Egede kommunalbestyrelsimut nassuiaavoq.

Taarsigassarsiat qaffanneqassapput sipaarniartoqarani

Akileraarutinik A-nik akiitsoqalersimanerup kingunerisaanik akileraartarnermut aqutsisoqarfimmut akiitsut akilerneqarsinnaassappata aningaasat tigoriaannaat kommunip pisariaqartippai. Tamanna isumaqarpoq suliassaqarfiit ataatsimiititaliallu tamarmik missingersuutit malillugit ataallugilluunniit aningaasaqarnikkut ingerlatsissasut, aammalu aningaasanik atuineq sukannersumik nakkutigineqassasoq, iliuusissatut siunnersuummi takuneqarsinnaavoq.

Borgmester Stine Egedep akiitsut pillugit nassuiaanermini qanoq inissisimasoqarnersoq saqqummiuppaa, tassanilu erseqqissaatigaa kommunip akileraarutinik A-nik akiitsoqalersimanerata kingunerisaanik erniatigut 300.000 koruuninik akiitsut ilaneqartartut.

Tamatuma saniatigut nassuiaavoq kommuni 44 million koruuninik isertitaqarsimasoq akiitsunik akiliisitsiniartarneq aqqutigalugu. Isertitat taakku akiitsunut pisoqaanerusunut matussusiissutigineqarsimapput, kisianni kommuni suli Namminersorlutik Oqartussanut akiligassaqarpoq.

Partiit tamarmik isumaqatigiissutigaat, ingerlatsiviit kommunip aqutarisai aningaasaqarnikkut najummatsisimanartorsioreersut sipaarniarnermik eqqugaanissaat pinngitsoortinniarneqassasoq. Taamaattumik kommunalbestyrelsimi ilaasortat isumaqatigiipput, taarsigassarsiat 100 millioner koruuninut qaffanneqarnissaat qinnutigineqassasoq.

Kommunalbestyrelsimi ilaasortaq Kim Ezekiassen (S) apeqquteqarpoq, 1 procentimik akileraarutinik appaaneq kommunimut artorsartitsinersoq, kisianni akissutissaq misissuinerup inernerani utaqqisariaqarpoq.

Ukiup sisamararterutaani siullermi atuivallaartoqalereerpoq

Kommunip nunatta karsianut akileraarutitigut aningaasarpassuarnik akiitsunissimanerata saniatigut, kvartalimi siullermi missingersuutinut sanilliullugu ataatsimut isigalugu 7-8 millionit koruuninik atuivallaartoqarsimasoq aamma ilisimatitsissutigineqarpoq.

Inunnik isumaginnittoqarfik immikkut qissiminneqarpoq, suliassaqarfimmimi tassani atuivallaarneq 10 millionit koruuninik annertussuseqalereersimammat.

Aningaasatigut inissisimanerup killiffiata oqaluuserineqarnerani, kommunip aningaasaqarnermut pisortaa, Arne Ørbæk Skifte Andersen, killiffimmik saqqummiussivoq. Tassani erserpoq, kommunip aningaasaatai tigoriaannaat 3 millionit koruunit missaanniittut.

Borgmesterip aamma oqaluttuarai aningaasartuutit qaffakkiartornerannut isumaginnittoqarfimmi aningaasartuutit qaffakkaluttuinnarnerannik annertuumik pissuteqartoq:

- 2017-imiilli kommunip inunnik isumaginninnermut aningaasartuutai 100 millionit koruuninik ullumikkumut qaffariarsimapput, tassanilu maluginiarneqartariaqarpoq pingaartumik meeqqat angerlarsimaffiup avataanut inissinneqartarnerat aningaasartuutaanerpaanut ilaasoq.