Aaja Chemnitz: Danmarkimi atuarfinni Kalaallit Nunaat pillugu pinngitsoorani ilinniartitsisoqartariaqarpoq
IA sinnerlugu Folketingimut ilaasortap ilinniartitaanermut ministerip Kalaallit Nunaat pillugu ilinniartitsinermut tunngatillugu akissutaa naammaginngilaa.
- Oqaluttuarisaanerinnarmi ilinniartitsineq isummiussereernernik nutaanik pilersitsiinnassaaq, tamannalu arlaannattaluunniit kissaatiginngilaa, Aaja Chemnitz oqarpoq.
Assi: Trine Juncher
- Kalaallit Nunaata Danmarkillu naligiinnerusumik suleqatigiinnissaat kissaatigigaanni, meeqqat inuusuttullu Kalaallit Nunaat pillugu ilisimasaqarnerulernissaat pissutsillu imminnut qanoq attuumassuteqarnerannik piviusorsiortumik takorluuisinnaanissaat pingaaruteqarluinnarpoq.
Danmarkimi atuarfinni Kalaallit Nunaat pillugu ilinniartitsinerunissaq pisariaqartinneqartoq Inuit Ataqatigiit sinnerlugit Folketingimut ilaasortaq Aaja Chemnitz oqarpoq.
Kalaallit Nunaat pillugu ilinniartitsissutinik assigiinngitsunik atuartitsisoqartalernissaanik pilersaaruteqarnersoq Kalaallit Nunaat pillugu ataatsimiititaliami siulittaasutut Danmarkimi ilinniartitaanermut ministerimut Mattias Tesfayemut (Socialdemokraterne) apeqqutigaa.
Atuarfimmi Kalaallit Nunaat pillugu ilinniartitsinissamut aningaasat immikkoortinneqartut, aappaagumiillu atuakkiortut naalagaaffeqatigiinneersut ilinniarnertuunngorniarfinni qallunaatut atuakkanut ilanngunneqarumaartut ministerip akissummini nassuiarpaa. Ilinniartitsisulli nammineq Kalaallit Nunaat pillugu assigiinngitsunik sammisaqartitsissalluni aalajangersinnaagaa erseqqissarlugu.
Tamannali naammanngitsoq Aaja Chemnitz oqarpoq.
Annikitsuararsuusoq
Qallunaat partiivisa aqqanillit isumaqatigiissutaanni ukiuni sisamani atuuttussami Savalimmiuni Kalaallillu Nunaannilu inuiaqatigiit pillugit ilinniartitsissutinik sanaartornissamut 6 millionit koruunit Danmarkillu nunasiaateqarsimaneranik, aamma Kalaallit Nunaanni, ilinniartitsissutinik sanaartornissamut 10 millionit koruunit immikkoortinneqarput.
- Danmarkimi qallunaajaqqat atuartut Kalaallit Nunaat pillugu ilinniartinneqarpallaarneq ajornerat eqqarsaatigalugu tamanna annikitsuararsuuvoq. Qallunaat inuusuttut 70 procentii Kalaallit Nunaata oqaluttuarisaaneranik ilinniartinneqarsimanngillat, Aaja Chemnitz oqarpoq.
Meeqqat atuarfii pillugit isumaqatigiissut nutaaq 2024-mi atuutilersussaq naapertorlugu ilinniartitsisut ilinniartitsinerminni aaqqissuussinissamut kiffaanngissuseqarnerulersut Mattias Tesfaye Aaja Chemnitzimut akissummini erseqqissaavoq. Tassalu danskit naalakkersuisuisa atuartitsissutissanik piumasaqaataanni allassimasut ikinneruleramik.
- Atuarfiit ilinniartitsisullu suleqatigiinnissaat pisariaqarfiinni taamaaliortarumaarnerat tatigilluinnarpara, ilinniartitaanermut ministeri allappoq.
Ilinniartitsisut Kalaallit Nunaat pillugu ilinniartitsissutissanik peqarluarumaarnerat, ilinniarnertuunngorniarfinnilu kalaallisut atuakkiat qallunaatuunngortinneqarumaartut Ministeri paasissutissiivoq. Tamanna naammappa?
- Naamik, pisariaqartitsineq annertoorujussuuvoq. Kisitsisimmi takutippaat ukiorpassuarni ilinniartitsisoqarsimanngitsoq. Tamanna ilaatigut Kalaallit Nunaata Danmarkillu naligiimmik suleqatigiinnginnerannik kinguneqarpoq, Aaja Chemnitz oqarpoq.
Oqaluttuarisaaneq ilinniartitsissutigineqartassasoq
Oqaluttuarisaanermi Atlantikup avannaa Naalagaaffeqatigiillu pillugit ilinniartitsisoqartalernissaa ukiut marluk matuma siorna piumasaqaatinngorpoq.
Ilinniartitsissutini allani Kalaallit Nunaanni pissutsit ullumikkut atuuttut pillugit ilinniartitsisoqarnissaa piumasaqaataalernissaa Aaja Chemnitzip taamaattumik kissaatigaa.
- Oqaluttuarisaanerinnarmi ilinniartitsineq isummiussereernernik nutaanik pilersitsiinnassaaq, tamannalu arlaannattaluunniit kissaatiginngilaa, oqarpoq.
Ministerip maannakkut Kalaallit Nunaat pillugu ilinniartitsinerup annertusinissaa pinngitsoorani ilinniartitsissutigineqaqqunngikkaluaraa, Aaja Chemnitzip anguniakkani aallutiinnarpaa.
- Ukiorpassuarni tunniutiinnartannginnerput ingerlatiinnarparput. Danmarkimilu Kalaallit Nunaat pillugu paasissutissiiniarnermut aningaasanik amerlanerusunik pissarsiniarsarivugut, oqarpoq.
