Aaqqissuisuuneq: Innuttaasut qanillattorniarnermut atorneqarsinnaanerat aarlerinaateqarpoq
Nuuk aamma Sisimiut sapaatip akunnerata tulliani Usha Vance-mit, USA-p vicepræsidentia J. D. Vance-p nulianit tikeraarneqalerput. Innuttaasulli Amerikami pilerisaarinermut ilisimanngisaminnik peqataatinneqarsinnaanerat aarlerinartoqartoq, aaqqissuisuuneq isumaqarpoq.
Innuttaasut mianersortumik Usha Vance-mut, USA-p vicepræsidentianut J. D. Vance-mut katissimalluni, Avannaata Qimussersua sapaatip-akunnerani tulliuttumi isiginnaarlugu tikeraassammat, mianersortumik pissuseqassapput.
Assi: Emil Stach
Usha Vance, USA-mi præsidentip tulliata J. D. Vancep nulia, sapaatip-akunnerata tulliani Nuummut tikissaaq Sisimiuliassallunilu arfininngornermi marsip 29-ani Avannaata Qimussersua isiginnaariartorlugu.
Sermitsiap paasivaa tikeraarneq pisortatigoortuunngitsumik tikeraarnerusoq.
Taamaakkaluartoq maluginiagassaavoq tikeraarneq Kalaallit Nunaanni ulluni pingaarutilinni pimmat, tusagassiorfimmi Sermitsiami pisortaq aaqqissuisuunerlu Masaana Egede oqarpoq:
- Piffissaq tikeraarfiusoq eqqumiiginarpoq, naalakkersuisooqatigiinnissamik isumaqatiginninniartoqarnerata nalaaniummat kommunimullu qinersisoqarnissaa sioqqullugu tikeraartoqalermat. Pisummi taakku tamat oqartussaaqataaneranni pingaaruteqarluinnarput, Masaana Egede oqarpoq.
Siornatigut USA-meersut tikeraartarsimapput
Ukioq manna USA-mi inuit nuimasut Nuummut tikeraartut siullersarinngilaat. 2025-mi januaarip arfineq-aappaanni USA-p præsidentiata ernera Donald Trump Jr. Nuummut tikippoq, illoqarfimmi takornariarluni innuttaasunillu ilassinnilluni. Tikeraarnermi Naalakkersuisut sinniisaat, Donald Trump Jr.-mik ataatsimeeqateqassanngitsoq ilisimatitsissutigaat. Taanna youtuberimik podcasterimillu ilagisaqarluni nunatsinniippoq.
Aamma Amerikamiut youtubekkut suliaqartartut „Nelk Boys“-imik taaguuteqartut januaarip qiteqqunnerani Nuummiipput. Taakku amerikamiut aningaasaataannik dollarsinik teqqianillu MAGA-mik ilisarnaatilinnik Nuummi agguaanertik filmiliarivaat.
- Siornatigut pisortatigoortuunngitsumik taallugu tikeraarnernik takusareerpugut. Ernummatigisinnaavara maanna tikeraarnermi amerikamiut sunniiniarlutik suliaanni innuttaasut akuersitinnagit atorniarneqarnissaat.
- Innuttaasut eqqumaffigisariaqarpaat amerikamiut nittartakkatigut attaveqatigiiffiini sunniiniarnermik imaqarsinnaasunik suliani aperineqaqqaaratik assilineqaratarsinnaanertik, Masaana Egede tusagassiorfimmi Sermitsiami pisortaq aaqqissuisuunerlu oqarpoq.
