Air Greenlandip avannaani timmisartuussinerit taamaatiinnarsimasani nassuiaateqarfigigai

Avannaani najugaqartunut 2025-p aallartinnera ajornaatsuinnaanngilaq, tassami Air Greenlandip qulimiguuliutai kinguaattoortarlutillu taamaatiinnarneqartarput.

Qaammatit pingasut ingerlaneranni Uummannamut ilaasut 217-it, Upernavimmut ilaasut 228-t Qaanaamullu ilaasut 187-it taamaatiinnarneqarput.

Timmisartuussinerit amerlanersaat sila pissutigalugu taamaatiinnarneqarput, annermilli Uummannaq teknikkikkut ajornartorsiutinik eqqugaavoq.

Air Greenland Sermitsiamut taama ilisimatitsivoq.

- 2025-p aallartinneraniilli silarluttarnera Air Greenlandimut unammillernartorujussuuvoq. Anorersuartarnerit, nittaarujussuartarnera, isikkivilunnera, qutsinnerulaartukkut silaannaap aalarujussuartarnera mittarfiillu quasattut timmisartuussinernut ajortumik sunniuteqarsimapput. Angalasorpassuit taamaatitsiinnartarnerit angalanissamilu allanngortinneqartarnerat misigisimavaat, Air Greenland allappoq.

Qulimiguulik Uummannap eqqaani timmisinnaanngitsoq

Airbusimi timmisartuliortartut ajoquserneq iluarsaattariaqarmassuk qulimiguulik Uummannap Qaarsullu akornanni timmisartuussisartoq februaarip arfineq-pingajuanniit 27-ata tungaanut nunamiiginnartariaqarsimavoq.

Qulimiguulik Ilulissaneersoq utaqqiisaa aqqutikkut timmisartuussisussanngortinneqarpoq.

Uummannamut timmisartuussinerni januaarimi, februaarimi marsimilu taamaatiinnarneqartuni 217-iusuni 63-it teknikkikkut ajornartorsiuteqarnermik pissuteqarput.

- Teknikkikkut ajoquteqarneq pissutigalugu timmisartuussinissaq taamaatiinnarneqarpat, qulimiguuliup timmisartuusseqqinnginnerani ajoqutaasoq misissorneqaqqaartariaqarmat eqqaamasariaqarparput.

- Timmisartoq piareeraangat sila pissutigalugu timmisartuussisoqanngitsoortoqarsinnaavoq. Taamaammallu angallassinerni taamaatiinnarneqartuni ilaasussaagaluit akornanni "utaqqisunittarpoq", Air Greenland allappoq.

Qaanaap Siorapalullu akornanni silarluttarnera ajoqutaasoq

Upernavimmut Qaanaamullu timmisartuussinerit Uummannamut timmisartuussinertuulli teknikkikkut unammillernartoqartiginngillat. Angallassinerit taamaatiinnarneqartut 187-it akornanni angallassinerit taamaatiinnarneqartut sisamaannaat teknikkikkut ajutoornermik peqquteqarput, 134-llu sila pissutaalluni taamaatiinnarneqarsimallutik.

Air Greenland Qaanaami nunaqarfinnut, pingaartumik marsip 28-aniilli Qaanaamiit Siorapalummut, timmisartuussinermi unammilligassaqarnikuuvoq. Ilaasunik angallassisinnaasimanngillat.

Misiliineq kingulleq apriilip aqqaneq-aappaanni pisoq sila pissutigalugu taamaatiinnarneqarpoq.

Taarsiullugu apriilip qiteqqunnerani qulimiguulimmik nutaamik Qaanaamut tikisitsisoqarnissaata tungaanut qulimiguullit Upernavimmeersut pingasunngornerit arfininngornerillu tamaasa timmisartuussisassapput.

- Air Greenlandip timmisartuussinermut aqutsisoqarfiata sila timmisartuussiffiusinnaanersoq malinnaaffigiuarpaa, timmisartuussinissamullu pilersaarutit piviusunngortinneqarsinnaanersoq nakkutigiuarlugu. Nikingasoqartillugu angallassinissamut pilersaarusiortut nutaanik pilersaarusiortarput.

- Isumannaallisaanissaq pingaarnerpaajuaannarpoq, silarlukkaangallu Air Greenland soorunami timmisartuussineq ajorpoq, Air Greenland allappoq.