Akisullunilu erloqinartoq

Nunatsinni ungasissumut – soorlu Qaanaamiit Narsarsuarmut utimullu angalaniaraanni - akisullunilu erloqinarpoq. 

Nunatsinni illoqarfiit isorliunerusortaanniit – tassa Qaanaamiit, Nanortalimmiit Tasiilamiillu – timmisartornermut akit misissukkavut Sermitsiami sapaatit akunnerani matumani saqqummersumi sammivagut.

Sapaatit akunneranik sioqqutsilluni nammineq akiliillutik Qaanaamiit 2.000 kilometeritut ungasitsigisumut tassa Narsarsuarmut timmisartorluni angalasartut amerlannginnguatsiarput. Nappaateqalersimasulli ilaquttamilluunniit qanigisamik toqusoorsimasut tassa taamaaliortariaqarsinnaasarput. Taamaammat avannaaniit kujataanut timmisartornermut akit siullertut assersuusiutigaavut.

Tassa akit misissukkavut Air Greenlandip nittartakkamini akigititarai – tassalu septembarip 17-iani uterluni Qaanaamiit Narsarsuarmut sapaatit akunnerani aggersumi septembarip aqqarngani timmisartorluni angalanissamut nalinginnaasumik bilitsisineq 31.786 koruuneqartoq misissuinitsinni paasivarput.

Tamatumali saniatigut allanik aningaasartuuteqarfiusariaqartoq aamma paasivarput. Siumummi utimullu angalaniaraanni Nuummi marloriarluni aamma unnuisariaqarpoq. 

Nuummukatsiarneq

Nunatsinni illoqarfiit ilaanniit Nuummut sapaatip akunnerani aggersumi timmisartorluni angalaniarneq qanoq akeqarnersoq aamma misissorparput, akillu nassaarisavut quppernermi matumani takussutissiaraavut. Nunatsinnimi isorliunerusunik inoqarfeqarpoq, tamannalu nunatsinni illoqarfiit pingaarnersaata inuiaqatigiinni pisartunut qitiulluinnarneranik malitseqarpoq.

Nuuk 20.000-ngajannik inoqarluni suliffeqarfippassuaqarpoq, taamaammat nunatta inuisa amerlanerpaartaat ilaquttatik tikeraariartorlugit, ataatsimiigiarlutik pikkorissariarlutilluunniit ilaannikkut Nuuliartariaqartarput.

Tamannalu akisoqisoq, tassa SIK-mi isumaqatigiissutit malillugit akileraareerluni qaammammusiaritinneqartartut sinnerujussuarlugit akeqartoq, akinik misissuinitta aamma takutippaa.

Akit politikkikkut aalajangersarneqartartut

Timmisartornermut akit nammineq aalajangersarneqarnatik timmisartuutileqatigiiffiit oqartussallu isumaqatigiinnerisigut aalajangersarneqartarput. Nunarsuarmi sumiluunniit taamaappoq –nunatsinniinnaanngitsoq.

Nunatsinniit avammut angallavissatut akuerisatigoorluni timmisartornermut bilitsit silaannakkut angallannermut tunngasuni qullersaqarfimmit akisunerpaaffissalerneqartarput – nunatsinnilu sumiiffiit Air Greenlandip kiffartuussinissamik isumaqatigiissutaani ilanngunneqarsimasut akornanni timmisartornermut bilitsit Naalakkersuisunit akisunerpaaffissalerneqartarlutik.

Nunatsinni timmisartornermut bilitsit akisunerpaaffissalikkat, Air Greenlandip Standard Flexitut nittartakkamini taavai. Bilitsit taakkua allanngortinneqarsinnaallutillu utertinneqarsinnaapput.

Timmisartuutileqatigiiffiilli taamaattuinnarnik bilitseerniartarniarunik timmisartui ulikkaaqqajanngitsulluunniit timmisartuussisariaqartarneranik kinguneqarsinnaammat, pinngitsoqaratik akikillisanik bilitseerniartarput. Bilitsit nalinginnaasut Air Greenlandip tuniniagai Standard Flexininngarnit akikinnerupput, bilitsinilli taamaattunik allanngortinnerinut immikkut saniatigullu akiliuteqartitsisarluni.

Air Greenland timmisartuussinissat ilaannut aamma Takuss-bilitseerniartarpoq, tassa allanngortinneqarsinnaanngitsunik akikinnerungaatsiarsinnaasartunillu bilitseerniartarpoq. Bilitsilli taakku amerlassusii killilertarpai – nungunnissaasalu tungaannaannut neqeroorutigisarlugit.

- Timmisartuussinissamut ataatsimut nalinginnaasunik bilitseerniarluta aallartikkaangatta aamma Takuss-bilitseernialertarpugut – tamannalu ullup aallarfissap nallernissaanut ullut 350-it sioqqullugit pigajuppoq, Air Greenland Sermitsiamut ilisimatitsivoq.

Akit piumasaqaatitallit

Takuss-bilitseerniarnermi saniatigut nunatsinni angalanissamut allatigut aamma akikillisanik bilitseerniartarluni, Air Greenlandip erseqqissaatigaa. Bilitsilli taakkua piumasaqaatitaqarput, tassa aalajangersimasumik ukiulinnit aalajangersimasumillu siunertaqarlutik angalasunit taamaallaat pisiarineqarsinnaallutik.

Tassa bilitsit aalajangersimasumik ukiulinnit pisiarineqarsinnaasut 62-ileereersunut, inuussuttunut aqqaneq-marluk 28-llu akornanni ukiulinnut meeqqanullu aqqaneq-marluliisimanngitsunut taamaallaat atuupput. Bilitsit taakkua angalanissamut Air Greenlandip nittartagaani inniminniinikkut pisiarineqarsinnaapput.

Air Greenland aamma Ilik-bilitseerniartarpoq, tassa peqatigiiffinnit soorlu timersoqatigiiffinnit taamaallaat pisiarineqarsinnaasunik.

Taakkua immersugassamik Air Greenlandip nittartagaanit aaneqarsinnaasumik immersuinikkut qinnutigineqarsinnaapput.

Ilik-bilitsinik inniminniinermi ulluni aallarfissatut toqqakkani timmisartut ilaaffissat ulikkaarsimanngikkaangata bilitsinit nalinginnaasuninngarnit mittarfimmut akileraarut ilanngunnagu 75 procentit tungaannut akikinnerusinnaasarput. Tassa aallarnissamut siumungaaq pilersaarusiorneq aningaasarpassuarnik sipaarfiusinnaavoq, Air Greenland allappoq.

Akinik misissuinermi paasisat: Nunatsinni timmisartorluni siumut utimullu angalaneq

Illoqarfik aallarfissaq - Ullut aallarfissat - Akit

Qaanaaq - Narsarsuaq - 11/9 – 17/9 - 31.786*

Qaanaaq - Nuuk - 11/9 – 17/9 - 16.041**

Tasiilaq - Nuuk - 11/9 – 18/9 - 12.829

Nanortalik - Nuuk - 11/9 – 18/9 - 11.410***

* Siumut utimullu angalaneq Nuummi marloriarluni unnuinertaqassaaq

** Utimut angalaneq Ilulissani unnuinertaqassaaq

*** Siumut utimullu angalaneq Narsarsuarmi marloriarluni unnuinertaqassaaq

Ima iliorpugut:

Tikinniakkami sapaatip akunneranik uninngaarnertalimmik sapaatip akunnerani aggersumi timmisartorluni angalanissamut bilitsit qanoq akeqarnersut, Air Greenlandip nittartagaani ataasinngornermi septembarip aallaqqaataani misissorpavut. Akit misissukkavut tamarmik akikillisaapput – tassa allanngortinneqarsinnaanngitsuummata allanngortinnerinut immikkut saniatigullu akiliuteqartitsiffiusarput.