KL

DK

Allagartartaartitsinissaq qallivoq

Aasamik tikilluaqqusisutullusooq nunatsinni ilinniarfiit arlallit soraarummeertunut allagartartaartitsissapput, taakkualu ilagaat Greenland Business School, allagartartaartussat nalliuttorsiutiginissaannut piareeqqasoq.

Siorna Greenland Business Schoolimi soraarummeertut. Toqqorsivimmit
KASSAALUK KRISTENSEN
Digitalimik aaqqissuisoq
Saqqummersinneqarpoq

Soraarummeertut nalliuttorsiutiginissaannut Greenland Business School piareerpoq. Sisamanngornermi juunip 20-anni kulturip illorsuani Katuami nalliuttorsiornermi ilinniartut allagartartaartinneqassapput. 

- Ulloq allagartartaartitsineq nuannaarnermik tulluusimaarnermillu ulikkaartoq. Pisoq immikkut ittuuvoq, ilinniartut naammassisimasaannik nalliuttorsiutiginniffiusoq siunissamilu misigisassaannik qilanaarinniffiusoq, Christel Lund Bøjler oqarpoq nangillunilu:

- Ulloq manna ilinniarnerminnik naammassinninnerannik takussutissiiginnanngilaq, aammali periarfissat unammillernartullu nutaat aallartinnerannik takussutissaassaaq. Piginnaasaqalersillugit inuttullu pissarsitillugit ingerlateqqinnialeratsigit tulluusimaarutigaarput.

Greenland Business Schoolimit Aqqusinersuarmiittumit Katuap tungaanut nal. 11 ilinniartut ingerlaaqatigiinnerinik ulloq aallartissaaq. Pisarnertut ilinniartut kalaallisooqassapput, ilinniarfik nalunaarpoq.

Nalliuttorsiornermut ileqquusumut Katuami Hans Lyngep inersua qitiussaaq, tassanilu soraarummeertut sisamanngornermi nal. 12 allagartassatik tigussavaat.

uddannelse dimission inuiaqatigiit samfund nuuk greenland business school

ATORFIIT Se alle jobs

Powered by Labrador CMS