KL

DK

Angallammik angalanermi inuunermini siullerpaamik nangiartoq

Erna Heilmann Nielsen ilaquttanilu Maniitsumit Ilulissanut katittuliartussaapput. Nammineq angallamminnik angalarusunnerupput. Ilisimanngisaalli tassaavoq anorersuartumi angalanialerlutik.

Erna Heilmann Nielsen ilaquttanilu.
Paornánguaq Kleist Tusagassiortoq
Saqqummersinneqarpoq

Erna Heilmann Nielsen peroriartorpoq angallammik angalasarluni. Angajoqqaavi angallateqarput, sumorsuarlu angalasarput. Ileqqoq taanna inersimasunngorami ingerlatiinnarpaa, tamannalu toqqissisimanarilluinnarpaa 1998-mi aasaanera tikillugu. Taamani nammineq angallatiminnik Maniitsumiit Ilulissiartussaapput.

ARNANUT

Allaaserisaq una atuagassiami Arnanuni saqqummersuni kingullermeersuuvoq.

Atuagassiaq tamaat uani atuarneqarsinnaavoq: Arnanut

– Katittunukartussaavugut, anaanaga qatanngutikkalu sinersortaammik aallareersimallutik. Taamaaaliorusunngilagut uagut nammineq angallammik angalarusunnerugatta. Atuartut qulinut inuulluaqqoqqaalaartussaavakka aaallarlutalu, Erna Nielsen oqaluttuarpoq.

Erna isumaginninnermi ikiortitut ilinniarsimavoq ukiorpassuarnilu Maniitsumi atuarfimmi sulilluni. Tallimanngorneruvoq – aasaanerani atuanngiffeqarnissamut ulloq kingulliulluni, Ilulissani ilaqutaa sapaammi katittussaalluni.

– Ataataga eqqarsarsimagaluarpoq Ikkamiuni saperngussassugut, oqanngilarli. Mallersorsuusorlu tamakkersorluta ingerlaannarpugut.

Ernap angutaa aquttuuvoq. Ernap nammineq panini nukarleq angisoorsuunngitsoq sarliarpaa uiatalu angajua ulapeqisoq isumagalugu.

Annilaanngarmik nilliasoq

Angallatip aquttuata misilittagartuup mallit nakkutigai malillugillu ingerlalluni. Ernap panini nukarleq issiaqatigaa annilaangaqalunilu. Angallammik angalagaangami taamatut misigineq takornarpaa.

– Paniga qallorniarsarivoq tassangaannarlu aalaqigatta nakkarluni. Takusinnaavara savimineq qaamigut eqqussagaa, nilliasinnaaneralu tamaat nillerpunga. Qaamigut savimineq eqqoqinammagu annilaangaqaanga. Ataatama isikkani illuartippaa eqqunnginniassammagu. Tassani paasivara tamatta nakkutigigaatigut saniatigut mallit sianigeqqissaarlugit. Taava annilaangajunnaavippunga. Ersiunnaarpunga, Erna oqaluttuarpoq.

Sila ima ajortigaaq ilaqutariit angallamminnik tikimmata Sisimiuni inuit tupigusoqalutik. Umiartortut angerlarsimaffiani unnuipput aqaguanilu ingerlaqqillutik.

– Aperineqarpugut ilumut sila taama ajortigisoq aallanniarnersugut. Ippassaammagu annilaanganermik qiavunga. Uima annilaangaqalunga issiasunga takuaanga. Imami ajortigaaq tikikkatta angallammit anisinnaanata. Aallarpugulli.

Ilulissanut angalaneq allanngorluinnarpoq Aasiaat qanittuannut pigamik.

– Qatsunganersuuvoq, allaaqqilluinnarluni. Allaannginnami mallersimanngivissoq.

Annilaanganeq susinnaannginnermiippoq

Erna angallammik angalanermik misilittagartuujuvoq, sorpassuit misigisimallugit. Taamaattumik tupinnarpoq aasaq taanna anorersuartumi annilaanganermit tiguartimmat.

– Arlaanik pisoqarpat susinnaavugut? Nunamut ungasippoq taamaattumik nunamut anngunnaviarunarnata. Anaananngornerma kingornagut siullermeertumik taama ungasitsigisumut angalasussaavugut, taamaattumik isumaqarpunga tamanna peqqutaasoq.

– Qaangiummat oqiliallaqaanga. Ingammik paniga nakkarmat ajorusernanilu. Eqqissilluinnarpunga. Nuannernerpaavoq katittut angumerigatsigit, piareersaanermullu peqataasinnaallunga, Erna naggasiivoq.

sejltur inuiaqatigiit arnanut storm samfund

ATORFIIT Se alle jobs

Powered by Labrador CMS