Arctic Umiaq Line 10 millionit koruuninik annaasaqarlunilu 5000-inik ilaasukinnerusoq

Arctic Umiaq Linep 2024-mi akileraarutit ilanngaatigereerlugit 10 millionit koruuninik amigartooruteqarpoq, tamanna naatsorsuutigineqareerpoq.

Nunaqavissut ikinnerusut angalanerat aamma umiarsuarmi ineeqqat paarnaartartut akiliiumanerusunut takornarianut siunniussat naatsorsuutigisamiit ikinnerusunit piumaneqarsinamanerat pissutaasut suliffeqarfik nassuiaavoq.

Angusat naammaginanngitsutut nalilerneqarput, tamanna Arctic Umiaq Linep naatsorsuutaani aqutsisut nalunaarusiaanni cvr-imi tamanut saqqummiunneqartumi atuarneqarsinnaavoq.

Ilaasut 5000-inik ikileriartut

Umiarsuaatileqatigiiffik Royal Arctic Linemut ilaasoq ukiup siulianut sanilliullugu 5000-inik ikinnerusunik ilaasoqarsimasoq nalunaarusiami aamma allassimavoq.

- Ilaasut 2023-mi 21.780-iusuniit 2024-mi 16.780-inut ikileriarsimapput, tassa ilaasut 5.000-nik ikinnerusimallutik.

- Nunaqavissut angalasartut timmisartukkut angalanissartik aalajangersimagaat annermik pissuteqarpoq, qularnanngitsumik bilitsit akisunerunerat angalaffiunerpaallu nalaani umiarsuarmik angallavigineqartartoq isorartussusaata annikinnerulernera pissutaallutik. Aammattaaq Uummannamut Nanortalimmullu tikittarnerit kiisalu Kujataani Qeqertarsuup Tunuanilu “mini cruise”-t naammattumik atorneqarsimannginnerat pissutaaqataallutik, umiarsuaatileqatigiiffik nalunaarusiami allappoq.

Nunalli avataaneersut amerliallalaarsimapput, tassalu 2023-mi 3.227-usut 2024-mi 3.807-iullutik.

Kiffartuussinissamik isumaqatigiissut nutaaq isumalluutaangaartoq

Ingerlatseqatigiiffiup amigartoorutini matussuserniarlugit Naalakkersuisunut tapiissutinik qinnuteqarsimasoq itigartinneqarlunili nalunaarusiami allassimavoq.

Aningaasaliissutissat 15 millionit koruunit angullugit amigartooruteqarnissamut qularnaveeqqut tunniunneqarput kiisalu ingerlatseqatigiiffiup aningaasatigut ingerlalluarnerulernissaa siunertaralugu 2025-mut kiffartuussinissamut isumaqatigiissummut akiligassat siusinaartumik akilerneqarnissaat akuerineqarput.

Kiffartuussinissamik isumaqatigiissutip 2025-p naanerani atorunnaartussap sivitsorneqarnissaa pillugu ingerlatseqatigiiffimmit Namminersorlutik Oqartussat oqaloqatigeqqinniarneqartut Arctic Umiaq Linep aqutsisui 2025 pillugu allapput.

- Isumaqatigiissut sivitsorneqanngippat ingerlatseqatigiiffik tunineqanngikkiuni maluunniit matuneqassasoq naatsorsuutigineqarpoq, nalunaarusiami allassimavoq.

Arctic Umiaq Linep 2024-mi politikkikkut kissaatigineqangaatsiarsimasoq timitalerniarlugu, tassalu sinersortaatikkut angalanermi innuttaasut pisariaqartitaat pingaarnerutinneqaqqilerlutik takornariartitsinermik annertusaasoqarnerata kingorna taama pisoqartoq Royal Arctic Linep ukiumoortumik naatsorsuutai pillugit qanittukkut tusagassiuutinut nalunaarummi RAL allappoq.

2024-p qiteqqunnerani Arctic Umiaq Linemi pisortaq taarserneqarpqo. Jens-Jakob Sandgreen tunuarluni maanna pisortaasoq Taitsianguaq Arne Holm Olsen pisortanngorpoq.