Asiaq sermip ilisimatusarfiginissaanut millionilikkaanik aningaasaliiffigineqartoq
Silap pissusaa pillugu ilisimatusarnermut suliniut nutaaq EU-p aningaasaliiffigaa. Ilisimatusarnermi silap pissusiata allanngoriartornerata Atlantikup avannaani serminut sikumullu qanoq sunniuteqartarnera misissuiffigineqassapput.
Sermeq
Assiliisoq: Asiaq
Asiaq sila pillugu ilisimatusarnermut Københavnip Universitetiani ingerlanneqartumut ilaavoq, tassanilu ilisimatusartut silap pissusiata allanngoriartornera Atlantikup avannaani sermip sikullu aakkiartorneranut qanoq sunniuteqartarnersoq paasiniarpaat.
Asiaq suliniummi ICELINK-imi ukiuni sisamani ingerlanneqartussami peqataanerminut 5 millionit koruunit missaannik aningaasaliiffigineqarpoq. EU-p ICELINK-imik suliniut ukiuni sisamani tulliuttuni 55 millionit koruuninik tapiiffigissavaa, aningaasallu ilisimatusarfiit peqataasut akornanni agguaanneqassapput.
- EU-p ICELINK-imik suliniuteqarnissatsinnut aningaasaliiniarnera angusaavoq angisoorujussuaq. Suliniut ilisimatusarnerup iluani suliniutaavoq annertooq, Asiaq-miillu ilisimatusarfiit Islandimeersut, Danmarkimeersut, Østrigimeersut, Belgiameersut, Spaniameersut Tysklandimeersullu peqatigalugit silap pissusiata allanngoriartornera Kalaallit Nunaannut Nunanullu avannarlernut qanoq sunniuteqarnersoq ilisimasaqarfigineqalissaaq, Asiaq-mi pisortaaneq Mette Skarregaard Pedersen oqarpoq.
ICELINK-imi paasissutissat katersorneqartut sermip kiannerulernerani qanoq pisarneranut paasisaqarnerunissamut paasissutissanik katersueriaatsinik nutaanik ineriartortitsinissamut atorneqarumaarput, Københavns Universitet nittartakkamini allappoq.
Siku pillugu ilisimasaqarnerulernissamik suleqatigiinneq
Ilisimatusarnermi, februaarip aallaqqaataani aallartittumi ukiunilu sisamani ingerlasussami, nunat arlallit peqataassapput.
Ilisimatuut assigiinngitsut tamarmik silap pissusiata allanngoriartornerani sermip sunnerneqarnerata paasisaqarfiginerunissaanut iluaqutaassapput, allassimavoq.
- Tulluusimaaqaanga Asiaq-mi ilisimatuunik taamak pikkoritsigisunik sulisoqaratta. Ilisimatusartartuutigut killiffitta angunissaannut EU-mullu qinnuteqaasiap iluatsinnissaanut sulilluarsimaqaat. Nuannaartorujussuuvugut. Nunatsinni silaannaap pissusaata ilisimatusarfigineqarnerani peqataanissarput pingaaruteqartorujussuuvoq, taamaaliornikkut ilisimatusarnerup Kalaallit Nunaannut iluaqutaanissaa qulakkeerinneqataaffigissavarput. EU-mit aningaasaliisoqarneratigut ilisimatuut suleqatigisagut amerlisinnaavagut, iliuuserisagullu pitsaanerulersissinnaallutigit, Mette
Skarregaard Pedersen oqarpoq.
Suliniutip ingerlanerani angusanik saqqummiisoqartarsinnaasoq Mette Skarregaard Pedersen oqarpoq.
