ASK suli ammatinneqassaaq – misissuinermi akissutit sapaatip-akunnerata tulliani naatsorsuutigineqarput
Nuummi atuarfik ASK ataasinngorpat ammaqqissasoq, Kommuneqarfik Sermersuullu atuarfiup silaannaata misissorneqarneranit akissutit suli utaqqigai kommuni ilisimatitsivoq. Atuartitsineq nalinginnaasumik ingerlassasoq, kommuni ilisimatitsivoq.
Nuummi atuarfimmi Samuel Kleinschmidtip Atuarfiani atuartut ataasinngornermi klassinut uteqqissinnaasut kommuni nalunaarpoq.
Assiliisoq: Leiff Josefsen
Kommuneqarfik Sermersuup Atuarfik Samuel Kleinschmidtimi (ASK) illup iluani silaannaata misissorneqarnerata inernerisa nalunaarusiaat suli utaqqivaa. Avataaniit misissuititsinerup inernerisa nalunaarusiaat sapaatip akunnerata tulliani piariissangatinneqarpoq.
Taamaattumik atuarneq nalinginnaasumik ingerlaannassaaq, atuartullu ukiaanerani atuanngiffeqareerunik inimut atuartitsiviusumut sungiusimasaminnut ataasinngorpat uteqqissasut Kommuneqarfik Sermersooq nittartakkamini ilisimatitsivoq.
Kommunep aamma nalunaarutigaa atuartut ilinniartitsisullu illersorneqarsinnaasumik atuarfimmiissinnaanerat pingaartinneqartoq:
- Avammut attaveqarnitsinni ammasumik eqqortumillu attaveqaqateqarusuppugut. Pingaarnerpaavorlu meeqqat ulluinnarni toqqissisimanissaat, paasisaqarnissatta tungaanut, meeqqanut atuarfeqarnermullu ingerlatsivimmi pisortaq Lone Nukaaraq Møller oqarpoq.
Tallimanngormalli misissuisoqalertoq
Atuartup angajoqqaavi isumaginnittuilu nalunaarfigineqarsimapput atuartut tallimanngornermi 10. oktober atuartinneqassanngitsut, pigisatilli aassagaat atuarfimmi oqoqartoqarsinnaaneranut misissuineq aallartissammat.
Atuartitsineq illersorneqarsinnaasumik ingerlanneqarsinnaajunnaassagaluarpat, taava kommuni atuartitsivissanik pilersaarusioreersoq, kommuni ilisimatitsivoq. Pilersaarut piffissap sivikitsup iluani atuutilersinneqarsinnaavoq aamma angajoqqaat inuiaqatigiillu toqqaannartumik kingusinaarnertaqanngitsumik paasitinneqarnissaat piareersimatinneqarluni.
- Mianersornissamik tunngaveqarluni sulineq ingerlapparput pisariaqalissappallu iliuseqariataarnissamut piareersimalluta. Meeqqat sulisullu peqqissusaat pingaarnerpaavoq taamaattumillu nalunaarusiap takutissagaluarpagu pilersaarusiaq erngertumik atuutilersinnaasoq piareersimasuutigaarput, meeqqanut atuarfeqarnermullu ingerlatsivimmi pisortaq Lone Nukaaraq Møller oqarpoq.
Illoqarfiup qeqqani atuarfik alla, USK, oqoqartoqarneranik nassaartoqareersorlu septembarip 23-ani matuneqarpoq. Atuarfittaassaq, Inussuk, USK-imi aamma ASK-imi atuartut atuarfigiligassaat suli atulersinneqarsimanngilaq.
