Atassutip akileraarutinut politikkia:
– IA peqataassanngilaq
IA sinnerlugu sassartoq Naaja H. Nathanielsen Atassutip akileraartarnermut aaqqissuussinissamik siunnersuutaanut akerliuvoq, tassa isertitaqartut tamarmik 30 procentimik ilanngaatitaqanngitsumik akileraartalernissaanik siunnersuutaanut akerliulluni. - Taamaattoqasssappat inunnut aningaasaatilinnut taamaallaat iluaqutaassaaq, taamatuttaaq inuiaqatigiinni innuttaasut amerlanerpaartaat, akissarsiakinnerusutut inissisimasut, ilungersornerulissapput naligiinnginnerullu suli annertunerulernera misigissavaat.
- Isumaqarpunga Atassutip akileraartarnermut aaqqissuussinermut siunnersuutaa erseqqissumik saqqummiunneqarsimanngitsoq aammalu partii nassuiaateqartariaqartoq qanoq ililluni ukiumut 1 milliard koruunit sinnerlugit annaasaqaatit matussuserneqassanersut. Kisiannili qanorluunniit ikkaluarpat, taamatut aaqqissuussineq isertitakinnerusunut sunniuteqarnerluttussaavoq, tamannalu akuersaarsinnaanngilarput, Naaja H. Nathanielsen (IA) erseqqissaavoq.
Assi: Leiff Josefsen
Inatsisartunut qineqqusaarneq ataatsimut isigalugu oqartoqarsinnaarpasippoq innuttaasut aningaasanik kaasarfimmioqarnerulersinneqarnissaat pillugu partiit nutaanik siunnersuuteqartarnerat akuttusuujusoq.
Siunnersuulli nutaaq takkuppoq. Tassa Atassutip partiia siunnersuuteqarmat akileraartarnermut aaqqissuussamik nutaamik atuutilersitsisoqassasoq, "flad skat - flat tax"-imik taaneqartumik, kalaallisut taassagaanni akileraarut sukuluijakkamik taaneqarsinnaasumik.
Partiip siunnersuutigaa ilanngaatit tamarmik peerneqassasut akileraarullu 30 procentimut inissinneqassasoq.
Siunnersuulli taanna nunatta partiivini maannamut anginerpaajusup, Inuit Ataqatigiit, imaaliallaannaq iluaqutissarsiffigiuminaatsippaa.
Naaja: Siunnersuut erseqqissumik saqqummiunneqanngilaq
IA-p Inatsisartunut qinigassanngortitaa, Naaja H. Nathanielsen, arlaleriarluni nunatta karsiata imarisaanik, missingersuutaanik naatsorsuutaanillu suliaqartuusimasoq, isumaqarpoq siunnersuut piviusorsiortumik isigiuminaatsoq:
- Soorunami isumaqatigiinniarnernut ammasumik pissuseqartoqartussaavoq, kisianni aamma piviusorsiortoqartussaavoq. Atassutip siunnersuutaa qissimissagutsigu, maluginiarnarpoq erseqqissumik nassuiaatitaqaranilu saqqummiunneqangitsoq. Atassut nassuiaateqartariaqarpoq qanoq aningaasartuutinik matusinissartik eqqarsaatiginerlugu. Tassami 1,2 milliarder koruunit missaanni aningaasat ukiumut amigaatigineqalertussaapput, tamatumalu saniatigut ilisimavarput 1 milliard koruunit missaannik amigartooruteqartoqartartoq attassiinnarnissamut ajornartorsiutit pillugit.
Taakku saniatigut aamma inuiaqatigiinni milliardilikkaanik iluarsaassinissamut kinguaattooruteqartoqarneranik Naaja H. Nathanielsen (IA) innersuussivoq, isumaqarnerarlunilu suli ajornarnerulissasoq nunatta karsiata katillugit 25 milliardit koruuninik kaaviiartitsisartoq isumalluutigalugu aningaasartornerulernissamik kinguneqassammat, kaaviiartitammi ilarpassui inatsisitigut pituttugaareerlutik tiguinnarneqarsinnaanngimmata.
"Isertitakinnerpaat annerpaamik pilliuteqartinneqassapput"
Naaja H. Nathanielsen (IA) upperinngilaa aningaasat pisariaqartinneqalersussat pissarsiarineqarsinnaassasut ilanngaatinik piiaanikkut aammalu akileraartarnermut aqutsinerup annikillisarneqarneratigut:
- Tassa imaappoq, amerlasuunik ilanngaatissanik periarfissaqassaqarsimaguit, taava aningaasateqarsimassaatit naliliuteqarlutillu imaluunniit bankimi taarsigassarsiaqarsimassaatit, taakkualu nalillit amerlanerit pilersinneqartarput aalaakkaasumik isertitaqarluarnikkut. Taamaammat ilanngaatissanik atuisinnaasut tassaapput akunnattumik isertitaqartut qaffasinnerusulluunniit isertitaqartut, taakkualu Kalaallit Nunaanni ikittuinnaapput, tassami innuttaasut ilinniagaqassusaat qissimissagutsigu, affaat sinnerlugit meeqqat atuarfianni soraarummeersimanerat qaffasinnerpaajummat. Taamaammat, aap, aningaasaatillit iluaqutissarsissapput, illuatungaanilu inuiaqatigiinni naligiinnginneq akiorniarlugu suli ajornarnerulissaaq, Nathanielsen oqarpoq nangillunilu:
- Ilanngaateqarpat ilanngaateqanngippalluunniit akileraarut 30 procentiutinneqassappat, tamanna tassa isumaqarpoq aningaasallit iluaqutissarsissasut, illuatungaanilu pisortat ikiorsiissutaanik pisariaqartitsisut sakkortuumik eqqugaassasut. Assersuutigalugu utoqqaat eqqarsaatigissagutsigit, akileraarutitigut allannguineq pissutigalugu atugaat pitsanngorsaruminaatsorujussuussapput. Tamatuma saniatigut atugarissaarnerulernissamik sulissutiginninnermi isumaginninnikkut iliuusissanik, ilinniartitaanikkut iliuusissanik, aammalu inuiaqatigiit peqqissut, patajaatsut nukittuullu pilersinniarneranni qulakkeerinninnissamut pisariaqartunik iliuusissanut nukissaarutissaagut.
"Sipaarniaruloortoqareerpoq"
Naggataatigut Naaja H. Nathanielsen-ip naqissuserpaa allaffissornermut aningaasartuutinut sipaarniarnerit annertuut ingerlanneqareersut:
- Tamaviannguat allaffissornermut sipaarniuteqarnerit ingerlanneqartareerput, maannakkullu tamanna takussutissinneqarsinnaavoq aningaasartuutitta amerlanerpaartaat sumut atorneqarnersut qiviaannarlugit, tassalu peqqinnissaqarfimmi, atuarfeqarfinni, ilinniartitaanerni kiisalu inuiaqatigiinnut sullissinermut atorneqartarput. Sipaarniutissanik amerlanerusunik saqqummiussigutta kingunerisassai eqqarsaatigalugit mianersortumik iliuuseqartariaqarpugut, taamaattumik naagga, isumaqanngilanga akileraarutitigut isertitat annaasat milliarderpassuit aammalu iluarsartuussinernut kinguaattoorutinut milliardit arlalissuusunut, pisortat aningaasartuutaanik sipaarniarnikkut taamaallaat iluarsineqarsinnaasut. Taamaattumik Atassutip siunnersuutaa erseqqissarneqartariaqarpoq, tassami siunnersuummi ersarissumik oqaatigineqanngitsut amerlavallaarput.
