Sara Maria
Kreutzmann Atuarfik Inussummilu angajoqqaat allat atuarfittaassap
akuerineqarnissaanut Kommuneqarfik Sermersuup paasissutissiisannginnera
qatsuppaat.
“Qaquguuna
Atuarfik Inussuk ammarniartoq?” Sara Marie Kreutzmann Atuarfik Inussummi
atuartut angajoqqaavi arlallit sinnerlugit decembarip aallartinnerani
Fecebookimi allappoq.
Sara Maria
Kreutzmann Atuarfik Inussummilu angajoqqaat allat atuarfittaassap
akuerineqarnissaanut Kommuneqarfik Sermersuup paasissutissiisannginnera
qatsuppaat.
“Qaquguuna
Atuarfik Inussuk ammarniartoq?” Sara Marie Kreutzmann Atuarfik Inussummi
atuartut angajoqqaavi arlallit sinnerlugit decembarip aallartinnerani
Fecebookimi allappoq.
- Kommune aasaq 2024 neriorsuivoq meeqqagut
atuarfik nutaamut pissasut, matulli suli matoqqapput. Angajoqqaatut
ernumassuteqarluta saaffiginnippugut piffissanngormat Kommunemiit suliap
ingerlarnganut ammasumik paasititsiniaanissaq, Sara Maria Kreutzmann allappoq,
noqqaassullu taanna atuarfiup siulersuisuisa taperserlugu Atuarfik Inussuup
killiffia pillugu Kommuneqarfik Sermersooq ataatsimeeqatigiumavaa.
- Angajoqqaatut
ernummassuteqartutut Atuarfik Inussuup akuerineqarnissaanik suliaq sumullu
killinnera pillugu ammanerusumik aaqqissuussaanerusumillu pisariaqartitsineq
naqissuserniarlugu saaffiginnippugut, atiarfimmi siulersuisut Sermersuumut
taama allapput.
Attaveqatigiinneq
pitsaanerusoq ujartoraat
Sara Maria Kreutzmann angajoqqaallu allat kiisalu
atuarfimmi siulersuisut Kommuneqarfik Sermersooq pitsaanerusumik
attaveqartaqqullugu kajumissaarpaat.
- Kommunip attaveqannginnera
angajoqqaanut atuarfiullu siulersuisuinut eqquivoq. Oqartussat tatigeqqilissagutsigit
aalajangiinerni akisussaassuseqarnissaq ammasumillu periuseqarnissaq
kajumissaarutigaarput, Sara Maria Kreutzmann oqarpoq.
- Atuarfik Inussummi atuartunut
angajoqqaatut atuarfiup akuerineqarnissaanut tunngatillugu ammasumik periuseqarnissaq
kajumissaarutigaarput. Angajoqqaat nalornigaluttuinnarput, paasissutissiisannginnerlu
erloqinarsivoq. Atuarfiliornerup akuerineqarnissaanut suna amigaataanersoq
ersarissumik akissutissarserusuppugut. Sooruna kinguaattoortoq? Kommunillu
iliuusissat aalajangersimasut suut pilersaarutigai? Kommuni suliaq
sukkatisinniarlugu qanoq iliorp?
Paasissutissanik amigaateqarneq isornartorsioraa
Atuartut ilinniartitsisullu suli atuarfitoqqaniinnerat Sara Maria
Kreutzmannip angajoqqaaqataasalu ernumassutigaat.
- Atuarfitoqqat peqqissutsimut ulorianarsinnaasunik assigiinngitsunik,
soorlu oqoqarneranik sunnerneqarsimapput. Taamaammat aaqqiissutissap
nassaarinissaa suli nukinginnarnerulerpoq. Meeqqatta isumannaatsuunissaat
atugarissaarnissaallu pingaarnerpaatittariaqarparput, Sara Maria Kreutzmann
oqarpoq nangillunilu suliaq una Atuarfik Inussumut tunngaannanngitsoq,
kommunimili aalajangiinerni innuttaasut peqataatinneqarnissaannik
unammillernartoq siammasinnerusoq.
- Kommuni ersarissumik ammasumillu
attaveqatigiissinnaanngikkaangat oqartussaasunut akisussaasunut
tatiginnikkunnaartoqartarpoq. Ammasuuneq akuutitsinerlu innuttaasut tusarneqartutut
ataqqineqartutullu misiginissaannut pingaaruteqarput. Kommuni iliuuseqaqqullugu
innuttaasunillu attuumassuteqartunik oqaloqateqarnissanik salliusseqqullugu
kajumissaarutigaarput. Meeqqatta atugarissaarnerat isumannaatsuunerallu
tunulliunneqartussaanngillat, Sara Maria Kreutzmann oqarpoq.
Atuarfimmi
siulersuisut peqqissutsimut tunngasunik isumakuluuteqartut
Angajoqqaat
atuarfitoqqani meeqqat peqqissusaat ernummatigaat, taamaammallu kommuni
innuttaasunik ataatsimiisitsissasoq siunnersuuteqarput. – Minnerpaatut kommuni innuttaasunik ataatsimiititsissasoq siunnersuutigaarput,
tassani meeqqat atuarfiillu ataatsimiititaliaata imaluunniit ingerlatsiviup
atuarfiit qanoq innerat, suliap qanoq innera unammilligassallu
saqqummiutissavai. Ataatsimiinnermi taamaattumi angajoqqaat tunngavilersukkanik
apeqquteqarsinnaassapput. Tamanna aamma kommunip innuttaasullu attuumassuteqartut
akornanni tatiginninnerulernermik ammanerulernermillu pilersitsissaaq,
atuarfiup siulersuisui kommunimut allapput.
Paasissutissat
amigaataasut
Kommuneqarfik Sermersooq
angajoqqaat pitsaanerusumik paasissutissinneqarnissamik ujartuinerat
atuarfimmilu siulersuisut ataatsimiigiaqqusinera tunngavigalugu
ataasinngornermi decembarip 16-ianni atuarfimmi siulersuisunik
ataatsimiisitsivoq.
Ataatsimiinnermi
Meeqqanut Atuarfeqarnermullu Ataatsimiititami siulittaasoq Poul Petersen,
Kommuneqarfik Sermersuumi atorfilittat kiisalu Atuarfik Inussumi siulersuisut
peqataapput. Angajoqqaat Sara Maria Kreutzmannilu ataatsimiinnermut
qaaqquneqarsimanngillat.
Ataatsimeereernerup
kingorna ataatsimut tusagassiutitigut nalunaarummik nassiussinissaq
Kommuneqarfik Sermersuumi sulisoqarnermut attaveqaqatigiinnermullu pisortap
Rosannguaq Rossenip neriorsuutigaa. Taannali aviisi naammassitinnagu
nassiunneqarsimanngilaq.
- Ataatsimiinnerup
kingorna angajoqqaat nittartagaannut nalunaaruteqartoqarpoq, ataatsimiinnermili
Atuarfik Inussuk qaqugu atulersinneqarumaartoq ilisimatitsissutigineqanngilaq,
kisiannili atuarfimmi ikuallattoqartillugu kalerrisaarutit suliarineqartut, aamma
atuarfitoqqat ASK aamma USK oqoqarnerannik misissuisoqassasoq,
nalunaarutigineqarpoq, Sara Maria Kreutzmann oqarpoq, taassumali
ataatsimiinnermiilli imaqarniliaq tusagassiutitigullu nalunaarut suli
takunngilaa.
