MOTOORI
Biileerniat arlallit Facebookimi salloqittaatinik qupperniliorneqartut
Autonord Nuummiittoq Arctic Starilu Sisimiunittoq Facebookimi quppernertik assilineqarsimasoq qanittukkut misigaat. – Nukillalaarnarpoq qinngarnarlunilu. Pisisartut aningaasanik annaasaqaatigissappassuk aamma uggornassaqaaq, Arctic Starimeersoq Minik Sachse oqarpoq.
Sisimiuni pisiniarfiup Arctic Starip Nuummi Autonordi assigalugu Facebookimi quppernertik peqquserluttunit assilineqarsimariarluni pisisartunik kontomut aningaasanik nuussititsiniaasoqarnera nalaappaa.
Assi: Arctic Star
– Inuit taamaaliortarnerat nukillalaarnarpoq qinnganarpoq. Suliffeqarfipput tutsuiginartuuvoq ukiorpassuarni niuernermik ingerlatsisoq. Nunaqarfinni illoqarfinnilu pisisartoqarpugut, taakkulu peqquserluttunut aningaasanik nuussillutik eqqungaassagaluarpata uggornassaqaaq, Sisimiuni Arctic Starimik piginnittoq Minik Sachse oqarpoq.
Suliffeqarfiup Facebookimi qupperneq eqqunngitsoq namminneq quppernerminnut assingusoq marsip arferngani paasivaa, tassanilu UTV-t, trailerit nioqqutillu allarpassuit akikitsumik tuniniarneqarlutik.
Qupperneq eqqunngitsoq paatsuungatitsisoq
Qupperneq eqqunngitsoq 7.000-inik malinnaaffigineqarpoq, Arctic Starillu quppernera nammineq 3.800-nik malinnaaffigineqarluni.
- Pisisartut UTV-t trailerillu akikitsut Facebookitsinni takusimasatik pillugit saaffigisalerpaatigut. Saaffiginnissutillu paatsuungassutigaavut tuniniagarinnginnatsigimmi, Minik Sachse oqarpoq.
Qupperneq tamaat assit ikkunneqarsimasullut tamaasa ilanngullugit assilillugit salluliuummik sanasoqartarpoq, taava akilikkaminnik malinnaasorpassualersarlutik. Pisiniaq nioqqutissat pillugit apeqquteqarpat attaveqatigiinneq Messengerikkut ingerlanneqalertarpoq, tassanilu pisiniaq aningaasanik bankikkut nuussinikkut akileeqqullugu kajumissaarneqartarluni.
Arctic Starip Facebookimi quppernera 3.800-nik malinnaasoqarpoq, tassanilu kikkuunersut takuneqarsinnaallutik. Sisimiunilu pisiniarfimmut qanoq attaveqartoqarsinnaanera aamma takuneqarsinnaavoq.
Pisisartut nalunaarutiginnittaqqullugit kajumissaarneqartut
Minik Sachsep Facebookimi qupperneq eqqunngitsoq piginnittumut META-mut ingerlaannaq nalunaarutigaa, aamma Facebookimi quppernerup peqquserlunniarfiusup atuisut nioqqutissat assigiinngitsut pillugit apeqquteqaraangatta kontop paasissutissiissutigineqartartup aningaaserivianut saaffiginnissutigalugu.
– Aamma pisisartut tamaasa politiinut nalunaarutiginneqqullugit kajumissaarpavut. Ajoraluartumik allatut iliuuseqarsinnaanngilagut. Naluarput kina taamaaliornersoq. Kontoq ataaseq Jyske Bankimiippoq aappaalu Lunar Bankimut digitaliusumiilluni, Minik Sachse oqarpoq, taassumalu pisisartut peqquserluffigineqarsimassappata ajuusaarutigalugu.
Qupperneq eqqunngitsoq 7.000-inik malinnaasoqarpoq. Malinnaasut kikkuunerat takuneqarsinnaannginnerat maluginiagassaavoq. Aammattaaq suliffeqarfimmut attavissat misissoraanni NGO-mik allassimasoqarpoq, allanillu attaveqarfigineqarsinnaasut pillugit paasissutissaateqarani.
– Nunatsinni assersuutigalugu nunaqarfinni amerlasuut aningaasanik bankikkut nuussisarnertik sungiusimavaat, immaqalu qupperneq eqqunngitsuusoq maluginiarpallaarneq ajorlugu. Neqeroorut pitsaasoq takugunikku pisiarisarpaat. Taama pisoqarsinnaavoq, taamaattumik quppernerit eqqunngitsut eqqumaffiginissaat pingaaruteqarluinnarpoq, Minik Sachse oqarpoq. Neqeroorutit pitsaavallaaraangata maluginiartarnissaat sullitaminut aamma kaammattuutigaa. Tamatuma saniatigut Arctic Starip sullitani oqarasuaatikkut imaluunniit mailikkut attaveqarfigiuaannarai, aamma Messenger aqqutigalugu kontomut nuussinissamik qinnuiginngisaannaraat, oqarpoq.
Autonordimi assingusumik nalaataqartut
Nuummi Autonord pillugu Sermitsiami qanittukkut aamma allaaserisaqarpugut, taakkua januaarimi assingusumik misigisaqarput. Facebookimi qupperneq eqqunngitsoq nassaaraat, taannalu Autonord ApS-imik taaguuteqarpoq assinillu biilinik tuniniaasartunit allaneersunik ilioraasoqarsimalluni neqerooruteqarpassuaqarpoq.
Autonordimi pisortap Bo Eder-Jensenip Arctic Star assigalugu pisisartut peqquserlunneq pillugu paasitinniarsarai, kikkullu tamaasa META-mut peqquserluffigineqarsimasullu politiinut nalunaaruteqqullugit kajumissaarlugit. Autonordiusaarluni qupperneq eqqunngitsoq maanna peerneqareerpoq.
Politiit peqquserlunnerit tamatigut nalunaarutigineqartarnissaat kajumissaarutigaat.
