Biili inuusuttunit tillinneqartoq – angut imaanut nakkartoq

Nuummi biili tillitaq politiit tallimanngornerup unnuaani ujaaraat. Biili unitsinneqarsinnaasimasoq pigaartut pisortaat Carl Sværd oqarpoq, tassani inuit sisamat — tamarmik 18-it inorlugit ukiullit — qimaasimallutik.

Pigaartut pisortaat naapertorlugu politiit inuusuttut marluk tiguaat, aappaalu politiit qimmiat ikiortigalugu tigusarineqarluni.

Biilit taakkua atugaat sisamanngornermi nal. 17.11 tillinneqarsimasutut nalunaarutigineqarpoq, tallimanngornerullu unnuaani nal. 02.47 tigusarinninneq pivoq.

Biilillit biiliminnik isumannaallisaaqqullugit Carl Sværd kajumissaarivoq:

- Biili ikumatiinnarlugu ilaasa qimattarpaat. Biilip aallarunnissaa ajornanngippallaartarpoq. Biili paarnaarneqartussaavoq. Matuersaatit biilinut atatiinnarlugit qimakkaanni unnerluutigineqarsinnaavoq, Carl Sværd oqarpoq.

Qaammatini kingullerni illoqarfiit pingaarnersaanni inuusuttut 18-it inorlugit ukiullit biilinik aallarussisarnerat politiit arlaleriarlutik nalunaarutigisarpaat.

Angut umiatsiamit nakkartoq

Politiit innuttaasunit arlalinnit angallammik Nuummi Nuutoqqami kassumut aportumik takunnissimasunit sisamanngornermi ualikkut nalunaaqutaq 14.10 missaani nalunaarfigineqarput.

Angallat apormat umiatsiaaqqamik aquttoq imaanut nakkarsimavoq.

Politiit angallataat, qatserisartut ambulancellu angut annaanniarlugu aallartinneqarsimasut Carl Sværd oqarpoq.

Sivitsunngitsorli nalunaarutigineqarpoq angut taanna imminut qaqisimasoq namminerlu umiarsualivimmut utersimalluni.

Angut ambulancenik aaneqarpoq napparsimmavimmullu kissassimaartikkiartorneqarluni.