Unnuakkut 15 knobitut sakkortutigisumik
anorlertillugu Nunatta kitaata sineriaani nunap iluatigut ingerlaarneq
illersorneqarsinnaanngilaq.
Københavnimi Imarsiornermut Niuernermullu
Eqqartuussivik qanittukkut taama aalajangiivoq.
Unnuakkut 15 knobitut sakkortutigisumik
anorlertillugu Nunatta kitaata sineriaani nunap iluatigut ingerlaarneq
illersorneqarsinnaanngilaq.
Københavnimi Imarsiornermut Niuernermullu
Eqqartuussivik qanittukkut taama aalajangiivoq.
Tamatumani sillimmasiisarfik
Chubb European Group umiatsiaq kivisimasoq pillugu sillimmasiissutinik
akiliisussanngortinneqarpoq, sillimmasiisarfilli umiatsiaq illersorneqarsinnaanngitsumik
ingerlaarsimasutut tunngavilersuutigalugu akiliiumasimanngilaq.
- Suliaq pineqartoq Kalaallit Nunaanni
umiartortunut tamanut pingaaruteqarluinnarpoq, eqqartuussinermimi Kalaallit
Nunaanni pissutsit immikkut ittut atuuttut akuerineqarmata, eqqartuussissuserisoq Jannik Isidor eqqartuussissuserisut
suliffeqarfiannit Arctic Law Greenlandimeersoq, Hans Kristian Jensen Høj
sinnerlugu suliamik ingerlatsisoq oqarpoq.
Unnuakkut ikkarlittoq
Hans Jensen septembarip 16-ianni 2022-mi
unnuakkut Nuup kujataani ikkarlummut ikkarlippoq. Ikkarlunnerup kinguninngua umiatsiaq kivivoq.
Qujanartumik Hans Jensen umiatsiamiittullu allat tallimat annanniummut ikillutik
nunamut annassinnaasimapput, tassanilu nalunaaquttap akunneri marlussuit
qaangiummata umiatsiamit allamit annaanneqarlutik, umiatsiap ajunaalernermi
kalerrisaarutaa takusimagamikku. Umiatsiap kivinnginnerani Hans Kristian Jensen
Mayday-imik kalerrisaarisimavoq.
Umiatsiaq nunap iluatigut aqqummik
taaneqartartukkut politiit angallataasa aqqutigisartagaatigut – immakkullu
angalasunit allanit aqqutigineqartarpoq, aqqummi tamanna isumannaannerusutut
isigineqartarmat. Ajutoornerup nalaani qatsungavoq, taarluni iserialluni 5
meterimit 7 meterimut
erseqqarissuseqarluni. 15 knobit missaannik sukkassuseqarlutik
ingerlaarput.
Umiatsiaq radarimik GPS-imillu
atortorissaaruteqarpoq Hans Jensenillu nassuiaatigaa, nunap iluatigut
aqqutigineqartartoq qimannaveersaarlugu ingerlaarsimalluni. Umiatsiaq ukiuni
qulingiluani pigisimavaa – Nunattalu sineriaani imaatigut angalanermik ukiorpassuarnik
misilittagaqarluni.
Ajutoortoqarnerata kingorna Kalaallit Nunaanni
Politiit nalunaarusiorput, tassanilu allassimalluni ajutoorneq
nalaatsornerinnaammat, annaassiniarnermi aningaasartuutit
taarsiiffigineqarnissaat piumasarineqarnavianngitsoq.
Taarsiisoqarnissaa
itigartitsissutigineqartoq
Sillimmasiisarfiup pisup kingorna umiatsiaq
taarsiissuteqarfigiumanngilaa, tamatumani innersuussutigalugu umiatsiaq
akisussaaffeqanngitsumik ingerlaarsimasoq. Sukkavallaamik ingerlaarsimavoq,
aamma ikkarlissimanera sillimmasiisarfiup uppernarsarneqarsinnaanngitsutut
isigaa.
Aalajangiineq tamanna Sillimmasiisarnermut
Maalaaruteqartarfimmut maalaarutigineqarmat, tassani aggustip 30-anni 2023-mi
aalajangiunneqarluni sillimmasiisarfik pisussaaffilerneqassasoq,
taarsiissuteqarnissamut piumasaqaatigineqartut 876.000 koruuniusut akuerineqarnissaannik.
Chubb European Group
akiliiumanngittuarsinnarmat, suliaq Københavnimi Sø- og Handelsrettenimut
ingerlateqqinneqarpoq, tassanilu ukioq manna oktobarip 11-anni
sillimmasiisarfik taarsiissutissanik ernianillu akiliisussanngortinneqarluni,
suliamilu aningaasartuutit katillugit 101.750 koruuniusut akilissallugit.
„Hans Kristian Jensen Højip ikkarlummut, ullup
qaamanerani pissutsini immikkut pitsaanerusuni aatsaat takuneqarsinnaasumut,
ikkarlinngitsoorsimasinnaanera qularnarpoq. Tamatumani qularnaateqarluni Hans
Kristian Jensen Høj arriinnerusumik ingerlaarsimasuuguni ikkarlummut
apunngitsoorsimasinnaanera, soorlumi aamma qularnaateqartoq arriinnerusumik
ingerlaarsimasuuppat, ajoqusinnginnerusimassagaluartoq, Sø- og Handelsrettenimi
eqqartuussivimmi aalajangiunneqartumi ilaatigut taama allassimavoq.
Imaatigut angalasartunut
tamanut eqqartuussut pingaarutilik
Eqqartuussissuserisup Jannik Isidor-ip
eqqartuussineq soorunami naammagisimaarluinnarpaa, isumaqarporlu Kalaallit Nunaanni imaatigut
angalasartunut tamanut tunngaviusumik pingaaruteqartoq.
- Eqqartuussinermi erseqqissarneqarpoq
illersugara illersorneqarsinnaanngitsumik sukkavallaartumillu
ingerlaarsimanngitsoq, taamatullu Kalaallit Nunaanni pissutsini pineqartuni
nalinginnaasumik sukkassuseqarsimasoq, Jannik Isidor oqarpoq.
- Eqqartuussinermi akuersaarneqarpoq,
Kalaallit Nunaanni immakkut ingerlaarfissat, soorlu nunap iluatigut aqqutit,
siunnersuutaannaasut. Tassami Kalaallit Nunaata imartaa
uuttortarneqarsimanngimmat, aqqutit taakku nangaassuteqarani
ingerlavigiinnarneqarsinnaanngillat. Kalaallit Nunaanni imaatigut angalaarnermi
nalinginnaavoq silaqassuseq malussarniutillu tamaasa atornissaat pissutsillu
isiginiarnissaat – taamatullu aamma ingerlasoqartariaqarpoq.
- Sullissara taperserneqarsimanngikkaluarpat,
Kalaallit Nunaanni illoqarfiit akornanni imaatigut angallanneq
ajornarsilluinnarsimassagaluarpoq. Taamaalilluni imaatigut angallannermi
taamaallaat 2-3 knobimik sukkassuseqarluni pisinnaalissaaq, tamannalu illoqarfiit
akornanni imaatigut angallannermik ima ajornakusoornerulersitsissagaluarluni
taama angalasoqartarunnaassagaluarluni, eqqartuussissuserisoq oqarpoq.
Sermitsiap allaaserisaq una Chubb European
Groupimut saqqummiuppaa oqaaseqarfigineqaqqullugu, sillimmasiisarfilli
saaffiginnissummut akissuteqanngilaq.
