Franskit nunanut allanut ministeriat sapaatip akunnerata naanerani tikeraassaaq

Kalaallit franskillu attaveqaqatigiinnerat piffissami sivikitsuinnarmi annertuumik nukittorsarneqarpoq. 

Siullermik nunanut allanut tunngasunut Naalakkersuisoq, Vivian Motzfeldt (S) Frankrigimut pisortatigoortumik tikeraarpoq tikeraarnerminilu maajip 20-ani 2025 Parisimi naapippaa Frankrigip nunanut allanut tunngasunut ministeria Jean-Noël Barrot.

Motzfeldtip angalanini nangippaa: Frankrigimi ministeri qutsavigaa

Tamanna pivoq Naalakkersuisut nutaat ivertinneqarnerisa kinguninngua, ilisimaneqartutullu Vivian Motzfeldt nunanut allanut tunngasunut naalakkersuisutut ingerlaqqippoq, aammalu siuttuulluni sulissutigaa Kalaallit Nunaat periarfissaqartinneqassasoq nunat allat akornanni attaveqaatinik pilersitsisinnaassasoq Danmarkimut saaffiginneqqaanngikkaluarluni.

Tassami Kalaallit Nunaata Frankrigimi ikinngutaalluartoq paasivaa, USA-p præsidentiata Kalaallit Nunaat USA-mit pigineqassasoq aqunneqassasorlu piumasarimmagu, tamatumalu kingunerisaanik ajornartorsiortoqarnerani Frankrig tapersersuilluarmat.

- Frankrig nunat tamat akornanni naapitsinissanik siunertalinni nunatut siullertut tikeraarparput, maanilu Naalakkersuisut sinnerlugit Frankrigip piffissami ajornarkusoorfiusumi tapersersuineranut qujaniarnerput oqaatigaara, Vivian Motzfeldtip nunanut allanut ministereqatini fraskeq taanna naapereerlugu taamak oqarpoq.

Taava Macron Kalaallit Nunaannut tikiuppoq

Qaammataanngitsorluunniit qaangiummat Motzfeldt Frankrigimut tikeraareersorlu, Frankrigip præsidentia nammineq Kalaallit Nunaannut tikiuppoq juunip 15-iani Nuummut tikeraarluni.

Macron Nuummi: Macron mittarfimmeeqqilereerpoq

Macronip Kalaallit Nunaannut ersarissumik oqariartuutaa tassaavoq, kalaallit nunaanni innuttaasunut nunarsuarmilu nalorninartorsiorfiusumi kalaallinik tapersersuilluni, aamma ersarissumik oqaatigaa (USA-mut tunngatitamik) Kalaallit Nunaata Kunngeqarfiullu nunatut kiffaanngissuseqarnerat ataqqineqartariaqartoq.

Macronip Kalaallit Nunaannut tikeraarnerata kingorna Frankrigip Danmarkimi aallartitaa, Christophe Parisot, aggustip qeqqani ulluni arlalinni tikeraarpoq, tassanilu Nuummiippoq kingornalu Ilulissaniilluni.

Maanna Frankrigip nunanut allanut tunngasunut ministeria tikeraassaaq

Frankrigimi tikeraarnermini Vivian Motzfeldt Frankrigip nunanut allanut tunngasunut ministerianut Barrotimut qaaqqusivoq, qaaqqusaatalu Kalaallit Nunaannut qaaqquneqarnini uummammik pisumik qujassutigalugu.

Ambassadøri Chistophe Parisot: Kalaallit Nunaata suleqatiginissaa Præsident Macronip pingaartippaa

Maanna taanna Kalaallit Nunaannut tikeraassaartussanngorpoq, tikeraarnerminilu peqatigissavaa Danmarkimi nunanut allanut tunngasunut ministereqarfimmi pisortaq, Jeppe Tranholm-Mikkelsen. 

Jean-Noël Barrot arfininngornermi unnukkut Nuummut tikissaaq,  sapaat ilanngullugu Nuummiissalluni. Sermitsiamit tikeraarnera malinnaaffigissavarput,  Vivian Motzfeldtip tikeraartitsisup taassumalu oqariartuutaat suussanersut pillugit alaatsinaassavarput.

Frankrigip præsidentiata Emmanuel Macronip Nuummi tikeraarnermini generalkonsulatimik ammaasoqassasoq tunuliaquttaminut piumasaqarpoq, tamannalu piaarnerpaamik piviusunngortinneqartariaqartoq kissaateqarluni. Nunanut allanut tunngasunut ministerit taakku marluk suliaq pillugu nutaarsiassaqarumaarnersut paasissavarput sapaammi tusagassiortunik katersortitsisoqarnerani.