Ikummatissat akitsortut: Kiassarneq aamma akisunerulissaaq
Najukkat kiassarnissaat maanna akisunerulissaaq. Nukissiorfiit kiassarnermut akigititaminnik 1. juli aallarnerfigalugu qaffaanissartik ilisimatitsissutigaat.
Nukissiorfiit
Arkivfoto: Leiff Josefsen
Maajip qeqqani Polaroilip nalunaarutigaa orsussamut akinik literimut 85 øre-mik akitsuissallutik. Akitsuinissaq Polaroilip pisariaqartissimavaa, suliffeqarfiup akigititaasa qulakkeerneqarnissaat pisariaqarmat.
Akitsuinerup kingunerisaanik Nukissiorfiit aamma sunnerneqarput.
Nukissiorfiit Facebookimini nalunaarpoq kiassarneq juulip aallaqqaataani akitsorneqassasoq. Innaallagissamik kiassarnermut aammalu ungasianiit kiassarnermut akigititat ikummatissat akiisa qaffanneqarsimanerisa kingunerisaanik ulloq 1. juli 2025 atuutilersussamik 90 kr./MWh-mut qaffanneqarnissaat Naalakkersuisut akuersissutigisimavaat.
- Tamanna tunngaveqarpoq kiassarnermut akigititat uuliap akia tunngavigalugu aaliangersarneqartarmata. Taamatut akitigut naleqqussaanermi atuisut Nukissiorfimmit kiassarnermik pilersorneqartut taamalillutik kingumut atuisunut namminneerlutik kiassaatilinnut/uuliatortumik kiassateqartunut naligiissumik inissisimaleqqissapput, Nukissiorfiit nassuiaapput.
Juulip aallaqqaataani 2025-mit akit:
- Ungasianit aaliangersimasumillu kiassarnermut 920 kr. pr MWh. -mut qaffanneqassaaq.
- Innaallagissamik kiassarneq qaminneqarsinnaasoq 650 kr. pr. MWh.-mut qaffanneqassaaq.
Nukissiorfiit ilisimatitsissutigaat, akigititat allanngornerat atuisut akiligassaanni augustimi tunniunneqartussami takuneqarsinnaassasoq, tassani juulimi atuisimanermut naatsorsuutit saqqummiunneqassammata.
Air Greenland aamma billetit akiinik akitsuisariaqarsimavoq, orsussap akitsornera pissutigalugu. Tamanna pivoq juunip aallartinnerani.
