Ikummatissat akitsorneqaqqammertut allat
assigalugit timmisartunut orsussaq Jet A-1 akitsorpoq. Liiterimummi 1
koruunimik akisunerulerluni 6,18 koruuneqalerami.
Qaffaaneq Air Greenlandip sullitaanut
kinguneqarnerlussaaq.
Ikummatissat akitsorneqaqqammertut allat
assigalugit timmisartunut orsussaq Jet A-1 akitsorpoq. Liiterimummi 1
koruunimik akisunerulerluni 6,18 koruuneqalerami.
Qaffaaneq Air Greenlandip sullitaanut
kinguneqarnerlussaaq.
- Allanerusinnaanngilaq. Ikummatissaq aningaasartuutitsinni initoorujussuuvoq,
taamaammat akit qaffanneqarpata sullitagut bilitsinut akiliuteqarnerulissapput,
Air Greenlandip pisortaanera Jacob Nitter Sørensen oqarpoq.
Ikummatissat qaffanneqarnerat
timmisartuutileqatigiinnut malugineqangaatsiassaaq. Aasamut angalasussat
amerlanerpaartaat billetisereerput, billetimullu tassunga ikummatissap
qaffaataa nikingassutaa ilaanani.
- Billeterpassuit aasamut atorneqartussat
tunereerpagut. Taakkununngalu ikummatissamut akiliuterput qaffasinnerussaaq,
Jacob Nitter Sørensen taama nassuiaavoq.
Ikummatissanut tapi qanoq annertutigissanersoq misissorneqaleruttortoq Air Greenlandip pisortaatnerata oqaatigaa.
Assiliisoq: Oscar Scott Carl
Annaasat matussuseruminaatsut
Ikummatissap akitsornissaata naatsorsuutigineqannginnerani
billetisinikut aallerfigineqarsinnaannginnerat Air Greenlandimut
ajornartorsiutaavoq.
– Sullitagummi billetisereersut ima oqarfigiinnarsinnaanngilagut
“ikummatissanut tapimik pilersitsilerpugut”. Taamaammat qaffaaneq uagutsinnut
kinguneqarnerlungaatsiarpoq, pisortaq nassuiaavoq.
Ikummatissat qaffannerinut annaasat
matussuserniarlugit billetinut kingusinnerusukkut tunineqartussanut
ikummatissanut tapi ilanngunneqassaaq. Qaquguli tamanna pissanersoq nalunarpoq.
– Maannakkut oqaatigisinnaanngilara.
Kingunerisinnaasai misissuleruttorpagut, qanoq qaffaatiginissaq qanorlu
agguataarnissaat ilanngullugit. Taamaammat qaqugu akitsuisoqassanersoq
oqaatigisinnaanngilara.
Tapiliussaq peeruminaatsoq
Ikummatissanut akit taamaalluni
appaqqippata, qaffanneranut immikkut akiliutissatut tapi Air Greenlandip
atuutilersitassaa ingerlaannartumik peerneqarnavianngilaq.
Timmisartuutileqatiffiummi billetinut, ikummatissat qaffannginnerani
tuneriikkaminut annaasani matussuseqqaarniartussaavai.
- Qaffaasoqaqqaarnerani annaasaqaatigut
matussuserniarlugit ikummatissanut tapiliussaq atateqqaartariaqassavarput.
Taama pisoqakkajuttarpoq, Jacob Nitter Sørensen oqarpoq.
