ILLERSORNISSAQ PILLUGU ISUMAQATIGIISSUMMUT ILASSUT 2
Illersornissamut aningaasaliissutissat pillugit oqaloqatigiittoqalerneranut borgmesteri naammagisimaarinnippoq
Borgmester Avaaraq Olsen (IA) piumasaqarpoq illersornissamut suliassat aggersut innuttaasut toqqissisimanermik, ataqqineqarnermik ataatsimoorfeqarnermillu misigisimassagaat, aammalu Namminersorlutik Oqartussat, kommunip aammalu illersornissaqarfiup suleqatigiinnerat ammasumik peqataatitsinermillu tunngaveqassasoq. Maanna borgmesterip Naalakkersuisut ataatsimeeqatigereerlugit, naammagisimaarinnippoq kommunip innuttaasullu akuutinneqarnissaat neriorsuutigineqarmat.
Borgmesteri Avaaraq Olsen (IA) ernumassuteqarluni avammut nalunaarnikuuvoq illersornissaqarfiup Kalaallit Nunaanni sakkutooqarnikkut annertusineranut, tassanilu Arktisk Kommando Nuummi qullersaqarfeqarpoq. Borgmesteri Arktisk Kommandop umiarsuisa alapernaarsuutit nutaat tallimat immikkut talittarfittaartussanngornerat pillugu sakkortuumik qisuariarnikuuvoq peqataatitsisoqannginnerarlugu.
Assiliisoq: Jensine Berthelsen
Naalakkersuisooqatigiit siuliisa nalaannili Kalaallit Nunaata tungaaniit anguniagaavoq illersornissaqarfiup nunatsinniinnerata ineriartortinneqarnissaa pillugu annerpaamik nunarput sunniuteqassasoq.
Taamanikkut Danmarkip naalakkersuisui utaqqisinneqaqqaarallarput nunatsinni Naalakkersuisut aamma kalaallit partiivisa 2024-miit 2033-mut nunatta nunanut allanut, sillimaniarnermut illersornissamullu
Politikissaanut Periusissiamik piareersagaqarnerat pillugu.
NAALAKKERSUISOOQATIGIIT ISUMAQATIGIISSUTAANNI 16. APRIL 2025-MEERSUMI IMATUT ALLASSIMASOQARPOQ
Nunanut allanut-, sillimaniarnermut aamma illersornissamut politikkikkut periusissiaq 2024-miit 2033-mut ima oqaasertalik: "KALAAALLIT NUNAAT NUNARSUARMI - pineqartilluta ilaassaagut", naalakkersuisooqatigiit tunngaviatigut sulissutiginiarpaat. Nunarsuarmi politikkikkut pissutsit eqqarsaatigalugit periusissiap nutarterneqarnissaa siunertaralugu isumaqatigiissutigineqarsimasut suleqatigalugit uterfigeqqinneqartariaqarpoq.
Pilersaarut februaarimi 2024-mi saqqummiunneqarpoq, tamatumalu kingorna marsimi 2025-mi Inatsisartunut qinersinerup kingorna aalajangerpoq pilersaarut attatiinnarneqassasoq aammalu Danmarkip naalakkersuisuinik isumaqatigiinniarnerit nanginneqassasut.
Isumaqatigiinniarnerit matoqqasumik ingerlanneqartut
Taamaalillutik isumaqatigiinniarnerit ingerlaqqipput, illersornissaqarfiullu iluani pissutsit isertuussaanerpaanut ilaammata aammalu illersornissaqarfiup suliaanut tunngatillugu isumaqatigiinniarnerit matoqqasumik ingerlanneqartarmata, ilaatigut naalakkersuisooqatigiit partiivisa ilaasa isumaqatigiinniarnermi angusat tupaallaatigalugit qisiariarfigivaat.
Taakkununnga ilaavoq Kommuneqarfik Sermersuumi borgmesteri, Avaaraq Olsen (IA).
Oqaloqatigiinnerit aallartipput
Borgmesterillu Naalakkersuisut peqatigalugit ataatsimiinnerit aallartippai isumaqatigiissummi nutaami atuutilersussat pillugit, ilaatigut Issittumi Sakkutuut umiarsuassaanut nutaanut tallimanut talittarfittaassaq pillugu, taanna Nuummi sananeqassasoq pilersaarutaavoq, umiarsualivimmik annertusaanissamut pilersaarutaareersumut ilanngullugu.
- Oqaloqatigiinnissamut iliuuseqarsimanera Naalakkersuisunit tigulluarneqartoq nuannaarutigaara. Innuttaasugut toqqissisimasutut misigissapput – isiginngitsuusaarneqartutuunngitsoq. Illoqarfik pillugu taama pingaaruteqartigisunik aalajangiisoqassatillugu kommune suleqatigineqartariaqarpoq innuttaasullu isumaat ataqqineqarlutik, borgmester Avaaraq Olsen oqarpoq.
Isumannaallisaanikkut annertusaaneq pillugu paasinnillunilu akuersaarpoq
Borgmesterip isumannaallisaanerup annertusarneqarnissaa pisariaqartoq isumaqataaffigaa, aamma Kalaallit Nunaat nunarsuarmi pingaaruteqartutut inissisimasuusoq – taamaattorli suliniutit tamarmik innuttaasut inuiaqatigiillu ataqqillugit ingerlanneqartariaqartut erseqqissaatigalugu.
- Isumannaallisaaneq annertusarneqartariaqartoq paasilluarsinnaavarput, taamaattorli ungasinnerulersutut toqqissisimannginnermillu misigilersitsinata iliuuseqartariaqarpugut. Innuttaasunut maani najugaqartunut illoqarfitsinnullu ataqqinninnermut tunngavoq, borgmesteri oqarpoq.
Ataatsimiinnerni sakkutuut umiarsuaannut talittarfik nutaaq aamma Issittumi Sakkutooqarfiup qullersaqarfia nutaaq qanoq pilersinneqassanersut Nuuk illoqarfittut ammasutut, uummaarissutit peqataatitsisutullu tapersersorlugu – sakkutooqarnikkut sakkusiornertut ersersitsisuunngitsumik- oqaluuserineqarpoq.
Borgmesterip suliamik aallartitsinermi innuttaasut toqqissisimasutut, ataqqineqartutut aamma ataqatigiittutut misigisimanissaat pingaartinneqarlunilu Namminersorlutik Oqartussat, kommunip aamma Illersornissaqarfiup akornanni suleqatigiinneq ammasumik peqataatitsivillunilu ingerlanneqartariaqartoq erseqqissaatigaa.
