SIUMUT SIULITAASUNNGORNIUNNEQ
Ineqi Kielsen Siumut Inuusuttaasa kaammattuutaanut qujaannarallarpoq
Ineqi Kielsen, Siumut Inuusuttaanit partiip siulittaasussaatut sassaqqullugu kaammattorneqarlunilu innersuunneqarsimasoq maanna aalajangerpoq. - Nuannaarutigeqaara tatiginninnermik taamak annertutigisumik ersersitsiffigineqarama, kisianni ilaqutariinnermut tunngasut pissutigalugit maannakkuugallartoq qujaannartariaqarpunga.
31-nik ukiulik Ineqi Kielsen Siumup sulinerani pingaarutilimmik inissisimavoq. Kisianni ukiuni makkunani ilaquttani salliukkini, taanna Sermitsiamut oqarpoq.
Assiliisoq: Jensine Berthelsen
Maanna nalunarunnaarpoq, Ineqi Kielsen, 31-iinnarnik ukioqaraluarluni Siumup oqaluttuarisaanerani sivisuumik annertuumillu peqataavoq.
Tamannalumi pissutigalugu Siumup Inuusuttaasa siulittaasunngorniaqqullugu kaammattorlugulu innersuuppaat. Taakkulu ilanngullugu tunngavilersuutigivaat Ineqip siulittaasunngorneratigut piginnaasai piukkunnartut aammalu Siumup inuusuttumik siulittaasoqalernatigut tannna inuusuttunut peqataarusulersitsillunilu kajumissaarutaasinnaasoq.
Taamaakkaluartoq Ineqi Kielsen meeqqaminilu maanna Danmarkimi najugaqartoq Sermitsiamut oqarpoq piumassuseqaraluarluni qinersinissamut, ilaquttani salliutittariaqarini:
- Ukiut qulit qaangiuppata periarfissaq taamaattoq pinissaa neriuutigisimagaluarpara, maannakkoqqissaarmi uannut periarfissaanngilaq, ilaqutariitut ataqatigiissitsiniarnitinnut ajornarmat.
Tamatuma malitsigisaanik arnat marluk qinigassanngortittut, Vivian Motzfeldt Aleqa Hammondilu, angummik unammillerneqassagunanngillat, siulittaasussarsiornissarlu uninngatsiarnerup kingorna aallartinneqassaaq.
