Naleqqap oqaaseqartartua Jens Napaattooq partiit
illuatungiliuttut annersaat maannamullu kisiartaasut naalakkersuisooqatigiit
ullut 100-t siulliit eqqissillutik sulisinnaassasut Inatsisartut
ataasinngornermi apriilip arfineq-aappaanni ivertinneqarneranni neriorsuivoq.
Ullut hunnorujut maanna ingerlareerput, eqqissinerlu qaangiuppoq.
Naleqqap oqaaseqartartua Jens Napaattooq partiit
illuatungiliuttut annersaat maannamullu kisiartaasut naalakkersuisooqatigiit
ullut 100-t siulliit eqqissillutik sulisinnaassasut Inatsisartut
ataasinngornermi apriilip arfineq-aappaanni ivertinneqarneranni neriorsuivoq.
Ullut hunnorujut maanna ingerlareerput, eqqissinerlu qaangiuppoq.
– Naalakkersuisooqatigiit nutaat ullut 100-t siulliit sulinerisa ingerlaneranni
amerlasuut ernumagisaat uppernarsineqarpoq. Namminiilivinnissaq politikkikkut
oqaluuserineqangaatsiarpoq, oqaluuserineqaannarlunili. Piviusumi Atlantikumi
umiaaqqatut pullattakkatut tissukarpugut. Ipuuteqarata. Pujorsiuteqarata.
Aquttoqarnata, Naleqqap siulittaasua Pele Broberg Sermitsiamut oqarpoq.
– Inuiaqatigiit ineriartortinneqarnissaat kiffaanngissuseqarnissarlu pillugu
takorluukkat nipituumik oqaluuserisarpagut, kisiannili siunnerfeqanngilagut,
pilersaaruteqanngilagut pingaarnerpaamillu politikkikkut piumassuseqarnata.
Naammi isumassarsiat? Naak iliuuseqarsinnaaneq? Takorluukkallu naak?
Naalakkersuisut
siulittaasuata Jens-Frederik Nielsenip partiit sisamat namminiilivinnissamut
assigiinngitsunik isumaqartut ataatsimut kattutissavai. Demokraatit, Atassut,
Siumut aamma Inuit Ataqatigiit ataqatigiissaarniarlugit sulorartartoq oqilasooq
oqariartaatsimik »arriitsumik tuaviornermik« oqariartariaaseqarpoq.
– Naalakkersuisut namminiilivinnissaq sulissutiginerarpaat, kisiannili aamma
ingerlavissamik aalajangersaajumaneq ajorput, piffissaliussaqannginnamik
innuttaasunillu peqataatitsiumaneq ajoramik, taamaammallu unittooqqajaapput,
Pele Broberg oqarpoq.
– Namminersornermut ataatsimiititaliarsuaq ukiuni sisamani sulivoq,
taamaammat naalakkersuisooqatigiit aamma piffissaqartittariaqarpagut?
– Oqariartaaseq „arriitsumik tuaviorpugut“ isumalluarnarpoq, piviusumilli
iliuuseqanngilluinnarnermut tunngavoq. Inimi taartumi – qulliit ikitinnagit –
ullup qaammariartornissaanik utaqqinermut assersuunneqarsinnaavoq.
Namminiilivinnissaq tunissutaanngilaq ullut ilaanni iterutta
atulersimasassarput. Qaqqaavoq qaqinneqartussaq. Alloriarnerit
ataasiakkaarlugit. Nunap assinga najoqqutaralugu, pujorsiut ataatsimullu
piumassuseqarneq atorlugit, Pele Broberg oqarpoq.
Oqaasipiluk
Ullut 100-t matuma siorna naalakkersuisooqatigiit pilersinneqarnerat
sioqqullugu partiit sisamat akornanni assigiinngissuseqarneq malunnarpoq.
Tunngaviusumik inatsisissatut siunnersuut eqqarsaatiginneqqissaarnermi
atorneqaruni pitsaanerpaamik iluaqutaassasoq Atassutip siulittaasua Aqqalu C.
Jerimiassen Sermitsiamut oqarpoq. Siumup namminiilivinnissamut naalakkersuisua
Vivian Motzfeldt soqutiginnilersitsiniarluni peqataatitsilerniarlunilu
innuttaasunik ataatsimiititsivoq.
– Ullut 100-t qaangiuttut naalakkersuisooqatigiit taakkua ingerlavissartik
aalajangersimanngikkaat erseqqippoq. Partiit naalakkersuisuusut sisamaasut
arlaannaalluunniit Kalaallit Nunaanni naalagaaffiup qanoq ingerlanissaanik
pilersaarummik saqqummiussisimanngillat. Innuttaasut siammasissumik
peqataatinneqanngillat.
Akisussaaffiit
agguataarneqanngillat. Tunngaviusumik inatsisiliornermut atatillugu nutaamik
suliniuteqartoqanngilaq. Akerlianik namminiilivinnissaq
oqaapilunngortinniarsaraat; nipituumik oqaluuserineqartussaanngilat.
Anguniagaanngilaq, amusartumulli toqqorneqassaaq, Pele Broberg oqarpoq.
– Namminiilivinnissaq pillugu siulersuinani sapiissuseqanngitsumik oqalunneq
unneqqaserlunnerusoq Naleraq isumaqarpoq. Kalaallit erseqqissumik
paasisaqartariaqarput, oqariartaatsit neriorsuutillu kisiisa pinnagit.
Inuiaqatigiit ineriartortinnissaat nammineerluni pinavianngilaq.
Sapiissuseqartoqartariaqarpoq. Aalajangiisoqartariaqarpoq.
Siulersuisoqartariaqarpoq.
Namminersornerulerneq sukkatsissasoq
Naalakkersuisooqatigiit namminersulernissamut inatsimmi suliassat
naleqqunnerpaat akisussaaffigilernerisigut namminersulernissaq
sulissutiginiarpaat.
Naleqqamilli akerlerluinnaanik iliortoqartariaqartoq
oqaatigineqarpoq.
– Namminiilivinnissaq pillugu aalajangiitinnata qallunaat
oqartussaanerat atorlugu nunat tigusariaqarivut ajornartorsiutillu
aaqqittariaqarivut Naalakkersuisut oqarmata paatsuuineruvoq. Tamanna umiarsuaq
piginagu ullut ilaanni angalasinnaalissalluni iluarsaanniarlugu
neriuuteqarnermut assersuunneqarsinnaavoq. Nammineq umiarsualiornissaq, taavalu
sananeqarneranik akisussaasuunissaq aalajangereersimasariaqarparput, Pele
Broberg oqarpoq.
