KL

DK

INUIT INNARLUUTILLIT OQAASEQARTARTORTAAVAT

Inuit innarluutillit atugaat pillugit ilisimasat annertusarneqassapput

Ilisimasat maannamut katersorneqarsimasut atorluarlugit ineriartorteqqillugillu, aammalu inuit innarluutillit pillugit oqaaseqartartoqarfimmi Tilioq-mi suleqatigilikkani peqatigalugit Qivioq inuit innarluutillit pillugit oqaaseqartartutut allanngueqataanissaminut qilanaarpoq.

Qivioq Løvstrøm 33-nnarnik ukioqaraluarluni ilisimatusarnikkut inuiaqatigiilerinermilu annertuumik maannamut angusaqareerpoq sulilu anguniagaqarluni. Tamatuma saniatigut inuit pisinnaatitaaffii pillugit siunnersuisoqatigiinni siulittaasutut sulinermini misilittagareriikkani inuit innarluutillit pillugit oqaaseqartartutut atussamaarpai.
Jensine Berthelsen
Tusagassiortoq
Saqqummersinneqarpoq

Qivioq Løvstrømip pingaartippaa ilisimasat katersorneqareersimasut aallaavigalugit inuiaqatigiinni innarluutilittatta atugaat pitsanngorsarneqaqqullugit inuiaqatigiinnilu peqataanerat annertusarneqaqqullugu inuiaqatigiinni ilisimasat, paasisitsiniaanikkut oqallittarnerillu aqqutigalugit annertusarneqassasut siunnerfeqarpoq:

- Inuit innarluutillit inuiaqatigiinni saqqumilaarluarlutik akuulluarlutillu peqataanissaat pingaartippara, tamannalu iluatsilluarsinnaassappat inuiaqatigiinni inuit innarluutillit pillugit ilisimasat annertusarneqassasut pingaartippara, ilaatigut fjernsyni, radio internetsilu atorluarlugit ilisimasat annertusaannarnagit, inuilli innarluutillit oqallinnermi peqataalluarnissaat aqqutissiuukkusuppara, Qivioq Løvstrøm Sermitsiamut oqarpoq.

Oqartussaasut suleqatigilluarneqassapput

Maannamut maluginiarnartarpoq nunatsinni oqartussaasunik ilaatigut sakkortuumik Tiliup tungaanit isornartorsiuisarneq. Qiviorli qanoq suleriaaseqassava?

- Naalakkersuisut, kommunit allallu akisussaaffeqartut suleqatigilluarnissaat assut pingaartippara, taamaaliornikkut paasisitsisarneq paaseqatigiittarnerlu aqqutigalugit inunnut innarluutilittatsinnut atukkat pitsanngorsarnissaat anguniarneqassaaq, Qivioq Løvstrøm oqarpoq nangillunilu:

- Tamatta nalugunanngilarput inuit innarluutillit inuiaqatigiinni peqataanerat, sullinneqarnerat ulluinnarnilu inuuneqarnerat aporfinnik ulikkaartoq, taamaammat pingaaruteqarluinnarpoq aporfiit kisiisa isiginagit, qanorli ikioqatigiittoqarsinnaanersoq salliunneqartariaqarpoq.

Taamaattorli aamma Qivioq Løvstrømip erseqqissaatigaa soorunami pisariaqartitsiffimmi uparuaasarnissaq isornartorsiuisinnaanissarlu tungiminit takkuttarumaartut.

Inuit innarluutillit nalorninartumiitinneqassanngillat

Qivioq Løvstrømip ukiuni tulliuttuni pingasuni angorusutaasa ilagaat inuit innarluutillit pisortanit oqartussaasunillu sullinneqartarnerminni nalorninartumik inissisimatinneqartarnerat mumisinniarneqassasoq:

- Inuit innarluutillit pisortanut oqartussaasunullu saaffiginnittarnerminni ilaatigut nalaattarpaat nalornilersoortarneq, tassami takornartaanngilaq saaffiginnikkaangamik allamut saaffiginnissasut innersuunneqartarnerat. 

- Tamanna pinngitsoortinneqassappat aamma pingaaruteqartorujussuuvoq inunnik innarluutilinnik sullissisartut pisortani atorfillit suliaminnik pitsaasumik naammassinnittarnissaat siunertaralugu tapersersorluarneqarnissaat nalorninaatsumillu suleriaaseqartinneqarnissaat, tamatumunngalu annertusaaqataarusuppunga. 

Tamatta akisussaaffeqarpugut

Tassa pisortat inunnik innarluutilinnik sullissinerisa pitsanngorsarneqarnissaat oqaaseqartartunngortup pingaartitassa ilagilluinnarpaat, isummanimi malillugu ilaqutaasut qanigisaasullu isumalluutigiinnalerneqartarnerat pissusissamisuunngimmat:

- Isiginiagassatta ilagaat inuit innarluutillit sullinneqarneranni qanoq annertutigisumik ilaqutaasut qanigisaasullu isumalluutigineqartarneri. Paasinarluarpoq innarluutilittaminnut pitsaasumik atugaqartitserusullutik nukippassuarnik atuisarnerat, kisianni tamanna iliuuseqannginnissamut pissutissaqartitsilissanngilaq, Qivioq Løvstrøm oqarpoq nangillunilu:

- Tassami inuit innarluutillit pillugit inuiaqatigiittut tamatta pisussaaffeqarpugut, ilaatigullu inuit innarluutillit pillugit nunat tamalaat isumaqatigiissutaat aamma malittussaallutigu. Taamaammat ilaqutaasunik qanigisaasunillu pisortat isumalluusersortarnerat annikillisagassanut ilaavoq. Matumanilu pingaaruteqarpoq ilisimassallugu inuit innarluutillit pisortanit sullinneqarneranni qaqugukkut kikkut akisussaanersut.

1. februar Sisimiunut nuussaaq

Qivioq Løvstrøm Sisimiunut, Tiliup qitiusoqarfianut nuussamaarpoq februaarip aallaqqaataani, assullu pissanganerarpoq qilanaarlunilu suleqatigilikkani peqatigalugit sullissilernissaminut:

- Suleqatigilikkama tikillugit suleqatiginissaat assut qilanaarivara, aamma Sisimiunut nuunninni anaanannit ilaqutarpassuama najulernissaat assut qilanaarivara. Anaanamalu sorlaqarfigimmagu Sisimiut, Sisimiut avatanni inuunerma annersaa najugaqarnikuugaluarlunga Sisimiormiutut sumiorpaluuteqarnera anaanama erseqqissartarpaa, uangami isumaqarlunga Nuummiutut oqaloruloortarlunga, sunaaffa Sisimiormiuuvataarlunga oqaluttuarlunga, Qivioq Sisimiunut nuunnissaminut qilanaartoq naggataatigut oqaluttuarpoq.

tilioq oqaaseqartartoq qivioq løvstrøm inuiaqatigiit inuit innarluutillit

ATORFIIT Se alle jobs

Powered by Labrador CMS