KL

DK

Inuk Jørgensen Brasiliami nersornaaserneqartoq

Piviusulersaarusiortartoq Inuk Jørgensen filmiliaminik naatsumik Entropy-mik eqqumiitsuliorluni filmiliamut nersornaasiuttakkamik 32-ssaanik ingerlanneqartumi International Enviromental and Human Rights Festivalimi, EcoCinemi, Brasiliami tunineqarpoq.

Inuk Jørgensen Brasiliami nersornaaserneqarpoq.
Tusagassiortoq
Saqqummersinneqarpoq

Kalaallit filmiliaat Amerika Kujallermi nuannarineqarluarput, filmiliortartullu Inuk Jørgensenip filmi naatsoq Entropy Amerika Kujallermi isiginnaartartut angusimammagit nuannaarutigaa.

- Isiginnaagassiara festivalimi takutinneqarsimammat qujanaq, nersornaammullu kusanartumut qujanaq. Taoplay aqqutigalugu Amerika Kujallermi – pingaartumik Brasiliami – isiginnaartartut amerlasuut angusinnaagakkit uannut kalaallimut filmiliortartutut nuanneqaaq, Inuk Jørgensen qujassuteqarluni oqalugiarnermini oqarpoq. Teoplay Brasiliami nittartakkatigut isiginnaartarfiuvoq.

- Brasiliami avatangiisinik illersuiniaqatigiiffiit pisoqaanersaanni annersaannilu ukiumut ataatsimut meeqqanik siunissamillu sammisaqarfiusumi filminik eqqumiitsulianik pitsaanerpaatut nersornaaserneqarneq ataqqinaataangaarpoq, Inuk Jørgensen oqarpoq.

Sermeq aakkiartortoq oqaluttuatoqqallu

Isiginniaagassiami minutsinik qulinik sivisussuseqartumi pinngortitami immiussat kusanartut inuit oqaluttuatoqaannut akulerullugit takutinneqarput. Isiginnaagassiaq pillugu CPH:DOX-imi marsip qaammataani takuteqqaarneqartumi ima allassimavoq:

- Kalaallit Nunaanni sermersuaq angisooq ukiuni tusindikkaani alliartorsimavoq, nittaattarneranit nunamik ilusiliisoq, taannalu inuit angerlarsimaffimmittut taasarpaat. Sermeq taanna maanna aakkiartorpat imeq taama serminnguuteqqikkunnanngilaq. Kalaallip Inuk Jørgensenip pinngortitaq pillugu filmeeraliaani ‘Entropy’-mi sermeq ilitsersuisup nunaqqataanut takussutissanngorlugu suliarineqarpoq, inuit pinngortitamut ataqqinartumut atassuteqarlutik inuunerannut tunngassuteqarluni - atassut sermip aakkiartornerani tatineqartoq. Silap pissusiata allanngoriartornera filmeeqqami aarlerinarnerpaatut takutinneqarpoq, tassani aamma kalaallit oqaluttuatoqaat pinngortitamiit annaanngujuukkatsinniit aallaaveqartut nersorneqarlutik.

Entropy septembarip qaammataani Nuuk International Film Festivalimi Kalaallit Nunaanni takuteqqaarneqarpoq.

inuk jørgensen inuiaqatigiit grønlandsk filmkunst entropy taoplay kultur klimaforandringer

ATORFIIT Se alle jobs

Powered by Labrador CMS