Inuusuttunik suliffissarsioratillu ilinnianngitsunik ujaasineq annertusineqarpoq
Naalakkersuisut isumaqarput "Pilersitsiviit" Ilulissani, Aasianni, Sisimiuni, Paamiuni Narsamilu 2025-mi pilersinneqarsinnaasut. Tamatumunnga atatillugu Naalakkersuisut aningaasaliissutissanik qinnuteqarput.
Kalaallit Nunaanni Naatsorsueqqissaartarfiup kingullermik naatsorsuinera malillugu inuusuttut 2.700-nit amerlanerusut suliffeqanngitsut ilinniagaqanngitsullu nalunaarsorneqarsimapput. Suliniut nutaaq aqqutigalugu Namminersorlutik Oqartussat Kommunillu inuusuttut periarfissaannik annertusaapput sinerissami atuarfinnik produktionsskoletut ingerlaasilinnik pilersitsiortornissamik pilersaaruteqarnikkut, taamaaliornikkut inuusuttut pisariaqartitsinerat naapertorlugu ilinniagaqarnissamut suliffeqalernissamullu piareersaasoqarsinnaaqqullugu.
Assiliisoq: Leiff Josefsen
Inuusuttut 2.000-it sinnerlugit suliffeqaratillu ilinniakkamik ingerlataqanngillat. Taakkunannga amerlasuut aamma pisortanit ikiorserneqanngillat, taamaammallu ilimatsaanneqaannarsinnaavoq angajoqqaaminnit qanitaminnilluunniit allanit pilersorneqartut.
Tamanna pivoq Kalaallit Nunaanni sulisussaaleqisoqarnerata aatsaat taamak annertutigileruttorfiani, maannalu qitiusumik aqutsisut kommunillu suleqatigiillutik tamanna allanngortinniarlugu sulissutiginnipput.
2022-miilli suliniut "Pilersitsiviit" piviusunngortinneqarnissaanut suliaqarnerit ingerlanneqarput, taakku sannavittut atuarfiussapput. Taakku tunisassiorluni sanaartornermut assingusumik aaqqissuussaassapput, aningaasanut inatsimmi Majoriaq-p kontoata pingaarnerup ataani aaqqissuussaassallutik, taakkunanngaaginnarlugit Pilersitsivinnut ataasiakkaanut agguataarneqartarlutik.
Kommunillu suleqatigalugit angusaqarnissamut isumaqatigiissutinik pilersitsisoqassaaq, tunisassiassanik sanaartorfittut aaqqissuussanut taakkununnga pilersitsinermi ingerlatsinermilu pilersaarut naapertorlugu 10 millionit koruunit aningaasaliissuteqartoqassaaq 2025-mi aningaasanut inatsimmi ukiunilu missingersuusiorfiusuni agguataarneqassallutik, taamaalilluni kommunit tamarmik siunertamut 2 millionit koruunit pissarsiarissavaat, taakkulu kommuninit 2025-miit agguataarneqassapput.
- Produktionsskolenut assigusunik ingerlatsinernik pilersitsinermut kaammattuutinik arlalinnik
suliaqartoqarpoq, tamannalu tunuliaqutaralugu Pilersitsivinnut ilinniartitsisunik pikkorissaanernut
kiisalu Ilulissani, Aasianni, Sisimiuni, Paamiuni Narsamilu Pilersitsivinnut ineriartortitsinermut
aningaasartuutinut 1,2 millioner koruuninik aningaasaliisoqarnissaa siunnersuutigineqarpoq, Naalakkersuisut aningaasanut inatsisissatut siunnersuummi tunngavilersuipput.
Siullermik misilinneqassaaq
Suliffeqarnermut periusissiami 2022-2024-mi Naalakkersuisuni politikkikkut anguniakkat tunngavigalugit sinerissami atuarfinnik produktionsskoletut ingerlaasilinnik pilersitsiortortoqarnissaa aalajangiunneqarpoq.
- Taakkua Pilersitsivinnik taaguuserlugit aallartinnissaanut piareersarnerit ingerlarsorput, inuusuttullu sulliviini ilinniartitsisut aqutsisullu pikkorissaqatigiissinneqarput 23. – 25. september 2024-imi Majoriaq Nuup sannaviani Piorsaavimmi, Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik tusagassiuutitigut nalunaaruteqarpoq.
Kommunit tallimat peqatigalugit Majoriaqarfiit ataanni Pilersitsivinnik inuusuttunut sullivinni atuartitsisarnermik inerisaaneq ingerlavoq.
Kommuneqarfiit illoqarfiit aallarnisaaffioqqaartussat toqqarpaat tassaasut: Ilulissat, Aasiaat, Sisimiut, Paamiut Narsarlu aallaqqaasiutigalugit inerisaaffigineqassasut.
Illoqarfiit taasat ilaatigut inuusuttunut sulliveqarfioreerput, ilaallu massakkut illlutassaannik ujartuileruttorlutik.Inuussutissarsiutinik ilinniarfeqarfiit qanimut suleqatigineqarnerannut pissutaavoq, siunertaammat inuusuttut Pilersitsiviit aqqutigalugit ingerlasimasut ajornannginnerusumik inuussutissarsiutigalugu ilinniarfeqarfinnut ikaarsaarsinnaalernissaat.
Pilersitsiviit ukioq 1 missaannik ingerlareersimalerpata aallarnisaaneq naliliiffigineqassaaq isummerfigineqarlunilu illoqarfinnut allanut Majoriap ataani sulliveqarfioreersunut siammarsinnaanersoq.
Pilersitsiviinni sulisussanut pikkorissartitsineq
Sullivinni timi atorlugu atuartitseriuseqarneq pillugu, sullivinni ilikkarfiulluartumik atuartitsinerup pitsaanerusumik aaqqissuussinnaalernissaa atuartitsissutinillu assigiinngiiaartunik periuseqarfiusinnaanissaa siunertaralugu atuartitsiseriuseq PBL (Projekt Baseret Læring, suliassamik aaliangersimasumik aallaaveqarluni sullivimmi atuartitsineq) Pilersitsivinni ilinniartitsisunut aqutsinullu pikkorissaassutigineqarpoq.
PBL-imi atuartitseriaatsimi pingaartuuvoq inuk tamakkiisoq isigalugu atuartitsinissaq. Taamaasilluni sullivimmi atuartitsinermi suliatigut ilikkagassat piinnarnagit aamma inuup ileqqui, suliaqarnerminullu tunngasutigut isumaliortaasii ilanngullugit atuartitsinermi sammineqartarput.
Naalakkersuisoqarfik naggataatigut erseqqissaavoq, PBL-imik ilinniartitsisussanut pikkorissartitsineq marlunnik immikkoortortalik maanna ingerlanneqartoq. Immikkoortoq siulleq naammassineqarpoq, Nuummi ulluni 23-25. septembarimi, pikkorissartitsinerullu immikkoortuisa aappaat pissaaq 15. - 18. novembari 2024 aamma Nuummi.
