Jens-Frederik Greenland Airports pillugu: Kinguneqartitsisoqassaaq
Naalakkersuisut naammagiliipput Greenland Airports ajornartorsiutinik aaqqiiumaataarnera pillugu. Naalakkersuisut siulittaasuata maanna ilimasaarutigaa ingerlatseqatigiiffik immikkut ittumik ataatsimeersuartinneqarpat kinguneqartitsisoqassasoq.
Naalakkersuisut siulittaasuat, Jens-Frederik Nielsen (D) naammaginninngilluinnarpoq Greenland Airportsip ajornartorsiutinik aaqqiiumaataarnera pillugu. - siorna ingerlatseqatigiiffimmut piumasaqarsimavugut ajornartorsiuteerarpassuit aaqqinneqassasut. Taamaakkaluartoq ingerlatseqatigiiffik Naalakkersuisut piumasaqaatinik naammassinnissimanngilaq, taamaattumik ingerlatseqatigiiffimmi immikkut ittumik ataatsimeersuartitsisoqalerpat kinguneqartitsisoqarnissaa naatsorsuutigineqassaaq, taanna nalunaarpoq.
Adssiliisoq: Jensine Berthelsen
Maanna Naalakkersuisut naammagiliipput Greenland Airports-imi ajornartorsiuterpassuit taakkulu uteqattaarneri pillugit. Naalakkersuisut siulittaasuat, Jens-Frederik Nielsen (D) maanna ilimasaarivoq kinguneqartitsisoqassasoq:
- Eqqaamassavarput, mittarfimmik ammaanissaq ajornaatsuinnaanngimmat, kisianni ajornartorsiutit arlallit pinngitsoorneqarsinnaagaluarput imaluunniit sukkasuumik aaqqinneqarsinnaagaluartut suli ajornartorsiutaapput, soorunami Naalakkersuisutut iliuuseqartariaqarpugut.
- Tassunga ilanngullugu erseqqissassavara, Greenland Airports-imi pissutsit naammaginanngitsutut isigigatsigit. Uani innersuussutigissavara, siornali ingerlatseqatigiiffimmut piumasaqarsimagatta, ajornartorsiuterpassuit aaqqinneqartariaqartut, uteqqissanngitsullu. Kisianni maanna ukioq ataaseq sinnerlugu qaangiummat, ajornartorsiutit taakku suli aaqqinneqanngillat.
Siulersuisut Naalakkersuisunit piumasaqaatinik naammassinnissimanngillat
- Naalakkersuisutut uagut pisussaaffigaarput ingerlatseqatigiiffimmut siulersuisut toqqassallugit, siulersuisullu pisussaaffigaat aqutsisut atorfinitsissallugit. Naalakkersuisutut ingerlatseqatigiiffimmut nalunaarutigereerparput, ingerlatseqatigiiffimmi pissutsit naammaginanngitsutut isigigatsigit, ingerlatseqatigiiffillu piumasaqaatitsinnik naammassinnissimanngitsoq, tassungalu tunngatillugu iliuuseqartariaqarpugut.
Qanoq iliuuseqassavisi?
- Oqareernittut Naalakkersuisut pisussaaffigaat siulersuisut toqqarnissaat, tamannalu siulliullugu inissittariaqarparput, tamanna pinngitsoorneqarsinnaanngilaq.
Naalakkersuisut siulittaasuat erseqqissaavoq, tassani sulisut nalinginnaasut Naalakkersuisut naammaginnikkunnaarneranni pissutaanngitsut:
- Nalunngilarput sulisut nalinginnaasut qanoq ilungersortigalutik nukippassuillu atorlugit sulitiginersut, suliassatillu naammassiniarlugit qanoq ulapitsiginersut. Kisianni suliffeqarfiup aaqqissuussaanera isigalugu, pinngitsoorsinnaanngilarput aqutsisut nutarterinissamik pisariaqartitsinerat, aammalu siulersuisut tamanna naammaginartumik isumagisinnaanngikkaangat paasereerlugu pisussaaffigaarput iliuuseqartariaqarluta, tassanilu sulisut nalinginnaasut pineqanngillat, kisianni aqutsisut aaqqissuussaanerat tamaat pineqarpoq.
Inatsisartut ataatsimiilinnginneranni ataatsimeersuarneq
Naalakkersuisut siulittaasuat Sermitsiamut oqaluttuarpoq Naalakkersuisut maanna immikkut ittumik ataatsimeersuartitsinissaq piariilivikkaat.
Siulersuisunut kinguneqartitsinissap saniatigut Jens-Frederik Nielsen erseqqissaavoq ingerlatseqatigiiffimmut sakkortunerusumik Naalakkersuisut piumasaqaateqassasut, taakkulu siulersuisut nutaat naammassiniagassarissagaat:
- Naalakkersuisut pingaaruteqarnerpaatut isigaat, ajornartorsiuterpassuit uteqqiasullu aaqqinneqassasut, aamma mittarfiit nutaat marluk ammarneqannginneranni. Taakku ajornartorsiutit assinginik nalaataqartinneqassanngillat maanna aqqusaariikkanik. Tamanna pingaaruteqarluinnarpoq! Akisuallaarujussuarpoq, ilaasut kisimik pineqaratik, kisiannili aamma nunatsinni inuiaqatigiinnut akisuallaarujussuarpoq, minnerunngitsumillu nunap tatiginassusianut innarliigaluttuarpoq, tamannalu akuerineqarsinnaanngilaq!
Naalakkersuisut siulittaasuat, Jens-Frederik Nielsen (D) taamatut ersarissuliorpoq, ilanngullugulu erseqqissaavoq, nammineq paasisinnaalluarlugu inupparujussuit nunatsinni innuttaasut aammalumi nunatta avataaneersut naammagittaalliortarmata, amerlasuummi angalanerminni kinguaattoortinneqartarmata akimmiffeqartinneqartarlutillu. Qaqugumi taava ataatsimeersuartoqassava?
- Piffissaq qaninnerpaami tamanna isumagisariaqarparput, neriuppungalu Inatsisartut ukiakkut ataatsimiinnerat aallartinnginnerani naammassisinnaassallutigu, Jens-Frederik Nielsen naggasiivoq.
Inatsisartut ukiakkut ataatsimiinnerat aallartissaaq tallimanngornermi septembarip 19-ani.
