Sullivinnik nakkutilliisoqarfik Nuup mittarfissuani nakkutilliisut atugaannik misissueqquneqartoq
Angallannermik Aqutsisoqarfiup Nuup mittarfiani sulinermi avatangiisit pillugit inatsit unioqqutinneqarsimasinnaanera Kalaallit Nunaanni Sullivinnik Nakkutilliisoqarfimmut nalunaarutigaa. Angalasunik nakkutilliisut qaangiuttoortariaqartarnerat Greenland Airportsip nassuerutigaa. Malittarisassalli malinneqartut, pisortaaneq oqarpoq.
Nuummi mittarfimmi angalasunik nakkutilliisukippallaarnera angalasunit atorfilittanillu maluginiarneqarpoq.
Assi: Morten Okkels
Nuummi mittarfimmi angalasunik nakkutilliisut angummanniarsarinerat, ilaatigut arlaleriarluni kinguaattoornernik kinguneqartoq inuppassuarnit ilisimaneqareerpoq.
Sulisut naammannginnerisa kingunerisaa alla, suli tamanut saqqummiunneqanngitsoq, Sermitsiap maanna oqaluttuarisinnaavaa: Sulisussaaleqisoqarnerata sulisut amerlanersaannut qaangiuttoorutaasarnera.
Oqaluttuaq atuartartutta ilaata siunnersuutigisaa Sermitsiap sammivaa. Qaangiuttoortarnerit oqartussanit maluginiarneqarlersimasut paasivarput.
Mittarfinnik nakkutilliisup Angallannermut aqutsisoqarfiup, sulinermi avatangiisit pillugit inatsit unioqqutitsinneqarunarnera pillugu, Kalaallit Nunaanni Sullivinnik Nakkutilliisoqarfik 2025-mi juunip 26-ani ilisimatippaa.
Angallannermut aqutsisoqarfimmi siunnersortiunerup e-mailimi ima allappoq:
– Silaannakkut angallannerup isumannaatsuuneranik nakkutilliinitsinni Nuummi mittarfimmi angalasunik nakkutilliisut qaangiuttoortarnerat maluginiarparput, sulisullu ulluni tulleriinni arlalinni qaangiuttoortarlutik sulisinnaasarlutik. Sulinermi avatangiisit pillugit inatsimmut naapertuunnersoq qularutigigatsigu, atugassarititat nalilersorniassagassigit attaveqarfigaatsigit.
Mianersortunnguamik isumalluartut
"Qaangiuttoortarnerit“ pineqartut akunnerni qanoq sivisutigisuni pisarnersut Greenland Airportsimi pisortaaneq Jens R. Lauridsen Sermitsiamit aperaarput.
– Qanoq qaangiuttoortoqartigisimanera pillugu maanna akisinnaanngikkallarpakkit, aamma suliffiusussanut pilersaarutit paarinnginnakkit. Sulernermili avatangiisit pillugit inatsit, aningaasarsianullu Namminersorlutik Oqartussanut isumaqatigiissutit soorunami malippagut, oqarpoq.
- Sulisoqarniarnikkulli maanna inissisimanerput pissutaalluni, sulisugut sapaatip-akunneranut akunnerit 40-t suliffiusussat sipporlugit sulisarnerat ilumoorpoq. Akunnerit suliffiusussat atuutilersikkusuppavut.
Greenland Airports naapertorlugu sulisussanik nutaanik isumannaallisaanermut akuersissummik pissarsiniarneq sivisuallaartartoq aamma ajornartorsiutaavoq. Tamanna siunissami aaqqinneqarnissaanut "mianersortunnguamik isumalluarnertik" Jens R. Lauridsenip allaaserisap siuliani apersorneqarnermini eqqaavaa.
- Akuerineqartut amerliartorneranni soorunami pitsaaneruleriartussaaq, oqarpoq.
Qaangiuttoornerit tassaasarput sulisut suliffigisassami saniatigut amerlanerusunik sulisarnerat, Greenland Airports paasissutissiivoq. Timmisartuussinerit ullormi tassani kingulliup naammasinissaannut suliffissat pilersaarusiorneqartarput, kinguaattoornernilu sivisunerusumik aamma sulisoqarsinnaasarluni.
Mittarfeqarfinni sulisut ilaat ullormut akunnerit suliffiusussat marloriaatinngorlugit ilaatigut sulisartut, pisortaanerup uppernarsarpaa.
– Pinngitsaaliissutaanngilaq. Namminnerlu aalajangertarpaat sulerusunnerlutik, sulisitsisulli isumaqatigiissutaat malittarisassallu atuuttut malinneqartarput, Jens R. Lauridsen oqarpoq.
Angallannermut aqutsisoqarfiup 2025-mi juunip 26-ant saaffiginninnerata kingorna, Nuummi Mittarfimmi nakkutilliisoqarsimanngitsoq Sullivinnik Nakkutilliisoqarfik Sermitsiamut ilisimatitsivoq.
Oqartussat oqaloqatigiinnissamut pisariaqartitsippata Greenland Airportsip pisortaanera piareersimavoq.
