Jens-Frederik: Namminersorneq pillugu inatsit sukumiisumik oqallisigisariaqarparput

Naalagaaffeqatigiinneq pillugu ataatsimiinneq attaveqaqatigiinnermullu ataatsimiititaliap ataatsimiinnerat savalimmiuni ingerlanneqartut maanna naammassineqarsimalereerput. 

Naalakkersuisut siulittaasuat, Jens-Frederik Nielsen (D) ataatsimiinnernut naammagisimaarinnippoq, sulinerullu ingerlaqqinnissaanut qilanaarluni:

- Ataatsimiinnerput naammagisimaarpara aamma nuannaarutialugu maluginiarpara, naligiinnerusumik akunnitsinni politikkikkut suleqatiiginnissatsinnut  piumassuseq annertusoq, tamannalu nuannaarutigaara, Naalakkersuisut siulittaasuat, Jens-Frederik Nielsen Sermitsiamut oqarpoq.

Ministeriunerup oqaatigaa namminersorneq pillugu inatsit Kalaallit Nunaata tungaanit allanngortinneqassasoq kissaatigineqarpat, naalagaaffiup tungaanit tamanna tusaaniarlugulu piumassuseqarfigineqartoq, namminersorneq pillugu inatsisip allanngortinneqarnissaanut tunngatillugu piumasaaqatit suut saqqummiunneqassappat nunatta tungaanit?

- Siullermik neriorsuut taanna tigulluarparput, kisianni erseqqissassavara Naalakkersuisunut pingaaruteqarmat namminersorneq pillugu inatsit allanngortinneqassappat, taava tamanna kalaallit innuttaasa kissaatigisaanik piumasaqaataanik aallaaveqartariaqarmat, Jens-Frederik Nielsen erseqqissaavoq nangillunilu:

- Taamaattumik pingaarutilerujussuuvoq politikkikkut ilutsinni oqallisigissagipput, tassanngaanniillu aallartissinnaavugut tunngavissanik erseqqissaassalluta namminersorneq pillugu inatsisip allanngortinneqarnissaanut, tamanna siunnerfigineqassappat.

Politikkikkut oqallinnissamik pisariaqartitsineq

Naalakkersuisut siulittaasuat innuttaasunut kaammattuuteqarpoq politikkikkut oqaluuserisassanut peqataaqqullugit:

- Politikkikkut anguniakkat anguniagassallu pillugit oqallinnissamik pisariaqartitsivugut, matumanimi pineqartumut tunngatillugu innersuussutigissavara namminersorneq pillugu inatsit tassaammat inatsit inuiaqatigiit kalaallit ilusilersuinermi peqataaffigisaat, allannguisoqassappallu, pingaaruteqarpoq tamanna innuttaasuni oqaluuserineqarnissaa, tassami ataatsimooruttariaqarparput.

Piffissamimi matumani assersuutinik innersuussisinnaavit? Assersuutigiinnarlugumi isertuussaanngilaq inatsimmi aatsitassarsiornermit isertitat pillugit allannguisoqarnissaa kissaatigineqartoq?

- Suliassaqarfiit arlallit namminersorneq pillugu inatsimmi allanngortinneqarnissaannik pisariaqartitsivugut, aatsitassarsiornermullu tunngasortaa aamma pingaaruteqarmat oqaluuserisariaqarpoq, soorlu aamma suliassaqarfiit allat erseqqissumik pitsanngorsarneqarsinnaasut. Kisianni kingumut oqaatigissavara, immikkoortunut ataasiakkaanut tunngatillugu sioqqutsillunga oqalulinnginninni, nunatsinni ilutsinni pitsaasumik oqaloqatigiinnissarput inuiaqatigiittut ineriartornitta ingerlaqqinnissaa pillugu oqaloqatigiinnissarput oqallinnissarpullu pisariaqarpoq, Naalakkersuisut siulittaasuat, Jens-Frederik Nielsen (D) naggataatigut oqarpoq.

AAMMA ATUARUK:

Mette F.-ip naalagaaffeqatigiit isumannaallisaanikkut ilungersunartumiinnera oqaatigaa