Inuussutissarsiortut
Nuummi mittarfittaap nutaap atorneqalerneranut atatillugu unnuisarfinnik
amigaateqartoqalernissaa ernummatigaat.
Aamma Qaqortumi Ilulissanilu
mittarfiliornerit naammassineqarpata, ukiunilu tulliuttuni nunanut allanut
timmisartuussisarnerit aallartippata assingusumik
ajornartorsiuteqartoqalernissaa ernummatigineqarluni.
Inuussutissarsiortut
Nuummi mittarfittaap nutaap atorneqalerneranut atatillugu unnuisarfinnik
amigaateqartoqalernissaa ernummatigaat.
Aamma Qaqortumi Ilulissanilu
mittarfiliornerit naammassineqarpata, ukiunilu tulliuttuni nunanut allanut
timmisartuussisarnerit aallartippata assingusumik
ajornartorsiuteqartoqalernissaa ernummatigineqarluni.
-
Illoqarfinni pineqartuni unnuisarfinnik naammattunik pilersitsinissaq
qulakkeerniarlugu allatut eqqarsartoqartariaqarpoq, taama isumaqarpoq Jens
Napaattooq, Naleraq, Inatsisartunut ilaasortaq Avannaata Kommunianilu
borgmesterip tullia siulleq.
Taamaattumik
paragraf 37 najoqqutaralugu Naalakkersuisunut apeqquteqarpoq, atuarfiit
upernaakkut aasakkut attartorneqarsinnaanersut, taamaalillunilu isertitat
nutarterinermut, kusassaanermut atuartitsinermilu atortunik nutaanik pisinermut
atorneqarsinnaaniassammata.
Pisariaqartitsisoqarnera
miserratiginngilarput
Ilinniartitaanermut,
Kultureqarnermut, Timersornermut Ilageeqarnermullu naalakkersuisup Nivi Olsenip
Demokraatineersup oqaatigaa, Naalakkersuisut miserratiginngikkaat inuiaqatigiit
ilaanni pisortat illuutaannik atuinermut ingerlatsinermullu aserfallatsaaliinermullu
aningaasanik pissarsinissamut tunngatillugu nutaaliorluni
eqqarsartoqartariaqartoq.
-
Atuartitsinerup avataani meeqqat atuarfiisa illutaasa qanoq atorneqartarnissaat
– soorlu upernaakkut aasaaneranilu unnuisarfittut atorneqarsinnaassanersut –
kommunit isummerfigisassaraat, tassa atuarfiit illutaat kommuninit
pigineqarmata, Nivi Olsen akivoq, tamatumunngalu peqatigitillugu
erseqqissarlugu arlalinnik eqqarsaatigisassartaqartoq.
Unammilleqatigiinnermut
inatsit
Nivi
Olsenip Jens NapãtôK’-mut akissummini ilaatigut oqaatigaa, kommunit tamarmik
immikkut nalilersussagaat, aalajangertariaqarlugulu atuarfiup illutai
atuartitsinerup avataatigut allanit qanoq atorneqarsinnaassanersut.
-
Ininik attartortitsisartut ataqqillugit taamaaliortoqartariaqarpoq,
namminersortunut attartortitsisartunut innarliisoqannginniassammat, oqarpoq.
Unammilleqatigiinnermut
inatsimmi ilaatigut allassimavoq, oqartussat namminersortunut
unammilleqatigiinnermik innarliisinnaasumik tapiissuteqartassanngitsut.
Pisortat
pigisaannik pioreersunik eqaannerusumik atuinissamik kissaateqartoqarnera
Naalakkersuisut paasilluaraat aamma ilisimatitsissutigaa, aamma aaqqiissutissat najukkami
ineriartornermut iluaqutaasinnaasut, soorlu takornariaqarnermut imaluunniit
pisussanut anginerusunut atatillugu, periarfissaqarsorai.
Aammali
erseqqissarlugu, atuarfiit allatut atorneqarnerisigut atuarfiit
pingaarnertut atuartitsinermut
atorneqartarnerat akornuserneqassanngitsoq.
Ullut
atuarfiusut ikilisinneqarnissaannut naaggaartoq
Jens
NapãtôK’ aamma ilinniartitsisuuvoq, taassumalu paaserusuppaa, Naalakkersuisut
atuartut ullunik atuarfigisassaannik ikilisaanissamik soqutiginnissinnaanersut.
Ilinniartitaanermulli Naalakkersuisup oqaatigaa, meeqqat atuarfianni atuartut
tamarmik ingerlalluarnissaat, ineriartornissaat sapinngisamillu
ilikkagaqarnerpaanissaat, Naalakkersuisut pingaarnerpaatikkaat.
-
Meeqqat atuarfianni suliamut atatillugu perorsaanikkullu patajaatsumik
tunngavilerneqarnertik tunngavigalugu atuartut – inuttut, inuiaqatigiinni
innuttaasutut aamma siunissami suliffeqarnermi peqataasussatut -
ingerlalluarnissaminnut ilisimasassat piginnaasallu pigilertarpaat.
-
Tamanna tunngavigalugu Naalakkersuisut meeqqat atuarfianni ullut atuarfiusut
ikilinissaat soqutiginartinngilaat. Paarlattuanik atuartut atuarfimmit
pissarsiaqarnerat nukittorsarniarlugu ilinniartitsinissamut piffissarititaasoq
sapinngisamik pitsaanerpaamik atorneqartariaqarpoq, Nivi Olsen oqarpoq.
Tassami
Naalakkersuisut naliliinerat naapertorlugu atuartunut perorsaanermullu
tunngasut aningaasaqarnermut imaluunniit pilersaaarusiornermut tunngasunit
pingaartinneqartuartassasut, tamatumani atuarfiit illutaat isertitaqarfigalugit
siunertanut allanut piffissaagallartumi atorneqarsinnaaneri ilanngullugit,
akissummi allassimavoq.
-
Isumaliutit taamaattut tunngavigalugit atuartut patajaatsumik, ataavartumik
suliassatigullu piukkunnassuseqartumit ilinniartinneqarnissaminnut
pisinnaatitaaffii pilliutigineqanngisaannassapput, taama erseqqissaavoq.
Meeqqat
atuarfiat pillugu inatsit atuuttoq naapertorlugu ukiumi atuarfiusumi ullut
atuarfiusut 200-t aamma 240-t akornanniissapput.
Naalakkersuisut
ilinniartitaanermut periusissiamut 2024-2030-mut atuuttussamut atatillugu
meeqqat atuarfianni pitsaassutsimik nalilersuisoqarnissaanik siorna
aalajangiipput.
