PAUL WATSON PILLUGU SULIAQ
Justitsministeria aalajangiinissamut aalajangiisuusumut killikkiartuaarpoq
Kalaallit Nunaanni Politiit aamma Naalagaaffiup Eqqartuussissuserisuata oqaaseqaatitik tunniussimalereerpaat. Maanna Justitsministeriap aamma minnerunngitsumik Justitsministerip aalajangiiffigisassaraat arfernik illersuiniaq Paul Watson Japanimut tunniunneqassanersoq imaluunniit tunniunneqarani aniguisinneqassanersoq.
Una angut, Justitsiministeri, Peter Hummelgaard (Soc. Dem.) tassaavoq aalajangiisussaq Paul Watson Japanimut tunniunneqassanersoq.
Assiliisoq: Lars Svankjær
Paul Watson aniguisinneqassava imaluunniit Japanimut tunniunneqassava? Inatsisit atuutsinneqarnerannut ministeriaqarfimmit Sermitsiamut uppernarsarneqarpoq aalajangiinissamut piffissaliussaq qanilliartortoq.
Siullermik Justitsministeriamit erseqqissarneqarpoq Japanimi oqartussat Paul Watsonip tunniunneqarnissaanik qinnuiginnissimasut Japanimi eqqartuussivimmi unnerluutigineqarnissaa siunertaralugu.
- Naalagaaffiup Eqqartuussisuuneranit aammalu Kalaallit Nunaani Politiinit, tamarmik misissuereerlutik oqaaseqaataannik Justitsministeriamut tunniussisoqarpoq.
- Justitsministeriamit nalilersuineq massakkut ingerlanneqarpoq oqaaseqaatit tunniunneqarsimasut aammalu aalajangiinissamut tunngavisseeqataasut ilanngullugit nalilersorneqarlutik maanna nalilersuisoqarluni. Tunniussisoqarnissaanik aalajangiisoqassappat, aalajangiineq eqqartuussivinnut suliakkiissutigineqarsinnaavoq, Justitsministeriamit oqaatigineqarpoq.
Nunarsuaq tamakkerlugu tigusarinnittoqarnissaanik noqqaassummut tunngavik tassaavoq, Paul Watson Japanimi eqqartuussivimmut sassartinneqarnissaa piumasarineqarmat tillinniartarnermut, pigisanik aserorterinerit, suliffeqarnerup ingerlanneqarneranut akornusiinermut kiisalu inunnut ajoqusiinermut atatillugu suliat marluk ingerlanneqassammata, taakku pisut imartami Antarktisip eqqaani februaarimi 2010-mi pisut Japanimi umiarsuarmut akerliussutsimik takutitsisumut tunngassuteqarput.
