Kalaallit Nunaanni erngup nukinganik suliniut annerpaaq pingaarutilimmut killittoq

Erngup nukinganik innaallagissiorfiup allilernissaa aappaagu aallartissasoq naatsorsuutigineqarpoq.

Utoqqarmiut Kangerluarsunnguanni nukissiorfiup allilikkap piujuartumik atuinerup annertusiartornera ilutigalugu Nuup siunissami aalaakkaasumik nukissiamik pilersorneqarnissaa qulakkiissavaa – peqatigisaanillu Kalaallit Nunaata mingutsitsinngitsumut ikaarsaarneranut peqataaqataassalluni.

Ungasinnerusoq isigalugu Nukissiorfiit nukissiamik sinneqartoorummik tuniniaasinnaassaaq.

Pilersaarut piviusunngortissinnaajumallugu pisortat nukissiamik pilersuisuianut Nukissiorfinnut kiisalu erngup nukinganik pilersaarummut sanaartortitsisumut, NunaGreen A/S-mut akuersissummik tunniussisimanertik Naalakkersuisut nalunaarutigaat. Ingerlatseqatigiiffiit marluk ataatsimoorlutik ukiuni 40-ni tullerni Utoqqarmiut Kangerluarsunnguanni erngup nukinganik isumalluutinik atuinissamut pisinnaatitaaffilerneqarput.

Pilersaarut pingasoqiusaq

Alliliineq Kalaallit Nunaata mingutsitsinngitsumut ikaarsaarneranut nukissiamillu imminut pilersorsinnaaneranut pingaaruteqartoq, NunaGreen A/S tusagassiuutinut nalunaarummi nassuiaavoq, taamatullu pilersaarutip immikkoortunik pingasunik imaqarnera nassuiaatigalugu:

1. Sullorsuaq nutaaq 16 kilometerisut takitigisoq, maanna imermik atugassamik tatsimut qatsinnerusumiittumut atassusiisussaq.

2. Erngup nukinganik innaallagissiorfik nutaaq 76 megawattinik naammassinnissinnaassusilik.

3. Innaallagissap aqqutaa nutaaq 35 kilometerisut takitigisoq, innaallagissiorfimmik nutaamik pioreersumut attaviliisussaq.

“Innaallagissiorfik naammassippat ukiuni qulikkaani amerlasuuni Nuup nukissiamik pisariaqartitaanut naammattumik pilersuisinnaassaaq- tamannalu nukissiamik mingutsitsinngitsumik taamaallaat toqqammaveqassaaq”, NunaGreen A/S tusagassiuutinut nalunaarummini allappoq.

Kalaallit Nunaata mingutsitsinngitsumut ikaarsaarnera

NunaGreenimi pisortaaneq Aviaaja Karlshøj Knudsenip pilersaarutip pingaarutaa annertooq erseqqissarpaa:

"Akuersissut pilersaarutip piviusunngortinneqarnissaanut pingaaruteqarluinnartuuvoq, peqatigisaanillu angusamik pingaarutilimmik ersersitsilluni. Piffissami mingutsitsinngitsumut ikaarsaarnerup Naalakkersuisunut nunarsuullu sinneranut pingaaruteqarfiani – uuliallu akiata annertusiartortumik nalorninartorsiorfiunerani – attaveqaatitigut pilersaarummik taama pingaaruteqartigisumik piviusunngortitsineq immikkut pingaaruteqarpoq."

Tamannalu Nukissiorfiit pisortaata Johan Danielsenip isumaqatigaa:

”Utoqqarmiut Kangerluarsunnguanni erngup nukinganik innaallagissiorfimmik allilerineq nunatsinni sanaartukkanik suliniutit annersaraat, inuiaqatigiinnullu kalaallinut mingutsitsinngitsumullu ikaarsaarnermut pingaarutilimmik inissisimassaaq. Akuersissut suliniummik piviusunngortitsisinnaanermi alloriarneruvoq pingaarutilik, taamaammallu Naalakkersuisut tassannga akuersinerat nuannaarutigaara.”

NunaGreen sanaartornermik ingerlatsissaaq, Nukissiorfiillu innaallagissiorfik piareerpat ingerlatsineq tigussavaat. Ingerlatseqatigiiffiit marluk taakku pilersaarusiornermik, suliariumannittussarsiuussinermik oqartussanillu akuersissutinut qanimut suleqatigiipput.

Sanaartornerit siulliit aallartittut

Pilersaarutip immikkoortuanik siullermik sanaartorneq aallartereerpoq. NunaGreen nunatsinni sanaartornermik ingerlatsisumik GNC-mik isumaqatigiissusiorpoq, taakkulu ukiumi sanaartorfimmi 2025-mi umiarsualivimmit erngup nukinganik innaallagissiorfimmut maanna atortumut kiisalu innaallagissiorfissap tungaanut aqqusinniussapput. Tamatuma saniatigut maanna aqqusineq pioreersoq silinnerusunngortillugulu tatsinut erngup nukinganik innaallagissiorfimmut pilersuisunut anngullugu tallissavaat.

Peqatigisaanillu sanaqatigiit marluiit suliassamut tamakkiisumut neqeroorusiuleruttorput. Inaarutaasumik isumaqatigiissut 2025-p naannginnerani atsiorneqassasoq ilimagineqarpoq, sanaartornerlu 2026-mi aallartissasoq ilimagineqarpoq. Innaallagissiorfissarsuaq 2032-mi naammassilluni atulissasoq ilimagineqarpoq.

Tikeqqusaanngikkallarnera

NunaGreen A/S-p aamma sapaatip akunnerani uani Utoqqarmiut Kangerluarsunnguat piffissami sanaartornerup ingerlanneqarnerata nalaani tamanut matoqqatikkallarneqarnissaa nalunaarutigaat. Tamanna aqqusinernut, umiarsualiveqarfimmut sanaartorfimmullu atuuppoq – aamma pisuinnarnut, aallaaniartunut imaatigullu angallattunut. Qaartiterisoqassaaq, maskiinat oqimaatsut atorneqarlutik kiisalu sanaartornermi atortussiat annertuut angallanneqassallutik. Taamaammallu tikeqqusaanngikkallarneq pisariaqarpoq.

Aviaaja Karlshøj Knudsen ima oqarpoq:

“Utoqqarmiut Kangerluarsunnguat amerlasuunut qasuersaariartarfittut piniariarfittullu pingaaruteqarpoq, taamaammallu tikeqqusiunnaarallarnerit persaqusersuisinnaanerat paasilluarsinnaavarput. Tamanulli kiisalu sanaartorfimmi sulisussarpassuarnut isumannaallisaaneq pingaarnerutipparput.”

Siunissaq mingutsitsiffiunngitsoq

Innaallagissiorfittaaq 2032-mi piareerpat Nuuk siunissami ukiuni qulikkaani arlalinni aalaakkaasumik mingutsitsiffiunngitsumillu innaallagissamik qulakkeerinniffigineqassaaq. Pilersaarut orsussanik imerpalasunik atuinerup annikillinissaanut ilaavoq pingaarutilik, Kalaalillu Nunaanni pilersuinermi isumannaatsuuneq nukittorsaavigineqassaaq. Peqatigisaanik tamanna suliffinnik sanaartortitsisunilu suliassanik qulakkeerinnissaaq.

Kalaallit Nunaanni erngup nukinganik pilersaarut annerpaaq maanna pisortatigoortumik aallartinneqarpoq – peqatigisaanillu tamanna piujuartitsinerusumut imminullu pilersuiffiunerusumut alloriarneruvoq pingaarutilik.