Kalaallit Nunaanni EU-p allaffiani pisortaq nutaaq atorfimmini sulilerpoq
EU-p Nuummi allaffittaavani Simon Bojsen-Møller pisortatut Europami ataatsimiititaliarsuarmit toqqarneqarpoq, pingasunngornermilu atorfittaamini sulerngaarpoq.
Kalaallit Nunaata EU-llu suleqatigiinnerulernissaat pillugu Múte B. Egede aamma Ursula von der Leyen imminnut assammittut. Maanna EU-p allaffeqarfia ammarneqarpoq, pisortarlu atorfimmini sulilerpoq.
Assiliisoq: EU
EU-p Nuummi allaffiani Europami ataatsimiititaliarsuup pisortatut inissitaa misilittagaqarluartuuvoq. 48-nik ukiulik Simon Bojsen-Møller ukiorpassuarni EU-p nunanut allanut tunngasunut allaffeqarfiani sulisimavoq.
Kingullermik Bruxellesimi sulisimavoq, aammali EU-p Kangiani Qiterlermi aallartitaqarfiini misilittagaqarluarpoq, taamaattumillu EU-p aallartitaqarfiisa nunarsuaq tamakkerlugu naalakkersuisuisa, inuussutissarsiortuisa innuttaaqatigiivisalu akornanni EU-llu aaqqissuussaaneranik ataqatigiinnerulersitsisinnaaneq ilisimasaqarfigaa, tusagassiuutinut nalunaarummi ilisimatitsissutaavoq.
Suleqatigiinnermik annertusaaneq
- Sulilernissatsinnut Kalaallit Nunaannilu suleqatitsinnik amerlasuunik naapitsinissannut qilanaaqaanga. Kalaallit Nunaat EU-lu ukiorpassuarni, pingaartumik aalisarnikkut ilinniartitaanikkullu qanimut suleqatigiipput, Nuummilu allaffiup nutaap ammarneqarnerata kingorna maanna suleqatigiinnerup annertusarneqarnissaanut piareersimavugut, ingammik mingutsitsinngitsumik ineriartortitsinissamut, nukissiornermut, silap pissusianut avatangiisinullu kiisalu aatsitassanut pingaarutilinnut tunngatillugu, Simon Bojsen-Møller oqarpoq.
- EU nunarsuarmi tamarmi sunniuteqartuuvoq tunniussassarpassuaqarluni, taamaattumik nunami angalanissannut tamanullu iluaqutaasumik attavinnik nutaanik pilersitsinissannut qilanaarpunga, Simon Bojsen-Møller oqarpoq.
Sulisut sisamat
Simon Bojsen-Møllerip toqqarneqarnerata kingorna Nuummi allaffimmi sulisut maanna marluupput, pilersaarutillu malillugit sulisut marluk allat atorfinitsinneqassapput. Simon Bojsen-Møller nuliani meeqqatillu pingasut Kalaallit Nunaannut nuupput.
Simon Bojsen-Møller Københavnip Universitetiani 2003-mi Oqaluttuarisaanermik Kangia Qiterlermillu ilisimatusarnermi kandidatitut ilinniagaqarsimavoq, 2004-milu Advanced Interdisciplinary European Studies College of Europe-mi masteritut ilinniagaqarsimalluni. 2004-miilli EU-mi atorfeqarpoq, kingullermik Europami ataatsimiititaliarsuup Nunanut Allanut Politikkimut Attaveqartitaani pisortap tulliatut atorfeqarluni, Afrikamut Kangia Qiterlermullu tunngatillugu sukkasuumik iliuuseqartarnermut akisussaasuulluni.
