Kalaallit Nunaanni nalunaaquttat ingerlaaqatigiiffii pillugit aalajangiinissaq kinguartinneqartoq
Inatsisartut nalunaaquttap ingerlaarfianut tunngasoq februaarimi ataatsimiilerunik aatsaat aalajangiiffigissavaat.
Kalaallit Nunaanni nalunaaqquttat ingerlaaqatigiiffii allanngorteqqinneqassaneranut aalajangiinissaq ukiuunerani ataatsimiinnissamut kinguartinneqarpoq.
Assi: Jesper Hansen
NUNATSINNI NALUNAAQUTTAT INGERLAAQATIGIIFFII
Kalaallit Nunaanni nalunaaquttap ingerlaaqatigiiffii assigiinngitsut pingasuupput.
Nunap annersaani UTC-2-uvoq.
Pituffimmi sakkutooqarfik Amerikap kangiata nalunaaqutaa malillugu UTC -4-miippoq.
Tunumi Nationalparkimi silasiorfik Danmarkshavn UTC +0-miippoq.
Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.
Ittoqqortoormiit 2024-mi marsimi UTC-1-imit UTC-2-mut aamma nuuppoq.
Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.
Kalaallit Nunaata nalunaaqutaa Europamiit akunnernik sisamanik nikingaqqilernissaa – taamaalillutalu UTC-3-mut uteqqissanersoq – innuttaasunit assigiinngitsunik isumaqarfigineqarpoq.
Politikerit aamma isumaqatigiissutigigunanngilaat.
Inatsisartut nalunaaquttap ingerlaarffiata allanngortinnissaanut siunnersuut sisamanngornermi novembarip arfernani aappassaaneertussaagaluarpaat, taamaalillunilu Kalaallit Nunaata annersaa UTC -3-mut uteqqittussanngussagaluarluni. Aalajangiinissarli kinguartinneqarpoq.
Siunnersuutip aappassaaneerneqarnissaa 2026-mi februaarip pingajuanni pissasoq, pingajussaaneerneqarnissaalu februaarip aqqarngani pissasoq, Inatsisartut nittartagaanni maanna takuneqarsinnaavoq. Tassa ukiuunerani ataatsimiinnermi.
Nalunaaqutaq akunnermik ataatsimik kinguartinneqassasoq, Siumut Naleqqallu siunnersuutigaat. Siunnersuutit oktobarip 14-iani siullermeerlugit oqaluuserineqarmata partiinit tamanit taperserneqarput, Inatsisartunilu Ataatsimiititaliamut ingerlateqqinneqarlutik.
Siunnersuutillu ukiuunerani ataatsimiinnissamut sooq kinguartinneqarsimanersut paasissutissiissutigineqanngilaq.
Siunnersuutit tusarniaassutigineqarmata amerlasuut akissuteqarput, ilaatigut Air Greenlandimiit nalunaaquttat ingerlaaqatigiiffii maannakkut atuuttut periarfissarpassuarnik ammaassisutut eqqaaneqarluni.
Immikkulli ilisimasalik Islandimeersoq seqerngup nuinerani makittarneq peqqissutsimut iluaqutaanerpaasoq oqarpoq.
Qanoq aalajangiisoqassanera pillugu februaarimut utaqqimaaqqaartariaqarparput.
