Kalaallit Nunaanni Politiit angallatertik Sisak tuniniarniaraat
Politiit angallataat Sisak ukiuni 36-ni aalajaalluni kiffartuereerluni, suliassanik eqaannerusumik sukkanerusumillu suliarinninnissamut piumasaqaatinik naammassinnissinnaajunnaarluni tuniniarneqassasoq Kalaallit Nunaanni Politiit aalajangerpaat.
Foto: Morten Okkels
- SISAK angallataavoq qajannaatsoq, kisiannili piffissaq sivisooq atorlugu piareersartariaqarlunilu, sukkavallaanngitsumik ingerlasarami taamaalilluni Kalaallit Nunaanni Politiit angallataannut allanut sanilliullugu piffissaq sivisunerusoq atorlugu ikiuisinnaasarpoq, Kalaallit Nunaanni Politiit taama aalajangernertik tusagassiuutinut nalunaarummi tunngavilersorpaat.
Sisak ukiuni kingullerni annaassiniarnermut atorneqarneq ajorpoq, angallassinermuinnarlu atorneqartarluni. Akissarsianut ingerlatsinermullu aningaasartuutit ukiumut 2,8 million koruunit angullugit annertussuseqarput, taamaattumillu politiit angallataata ingerlanneqarnera akisuvoq.
- Politiit angallataannut Sisammut aningaasartuutaasimasut angallatinut nutaanut maannakkut angallatinut tapertaasussanut atorneqarumaarput. Angallatit sorlerpiaat pisiarineqassanersut suli aalajangerneqanngitsoq ilisimatitsissutigineqarpoq.
Sulisut pingasut eqqugaasut
Tuniniarneqarnera pissutigalugu politiit angallataanni sulisut pingasut eqqorneqarput.
- SISAMMI inuttat ukiorpassuarni Kalaallit Nunaanni Politiinut annertuumik suliaqarsimapput, pissutsit ilungersunartut suliaminnik ilisimasaqarluarlutik iliuuseqarfigisarsimallugit, arlaleriarlutillu inuit inuunerannik annaasseqataasarsimallutik. Tamatumunnga inuttat qutsavigiumavakka, iliuuserisimasaat puiorneqassanngimmata, politiit pisortaata tullia Kunuk Frederiksen, politiini iliuuseqarnermut qitiusumik pisortaq oqarpoq.
Inuttat taakku pingasut Kalaallit Nunaanni Politiini allamik suliffittaarnissamik neqeroorfigineqarput, maannalu aaqqiissutissaq pillugu sulisut kattuffii isumaqatiginninniarfigineqarlutik.
Kalaallit Nunaanni Politiit angallatiminnik nutarterinerat ingerlaannassasoq aamma ilisimatitsissutigineqarpoq.
- Pingaartumik Nuup eqqaa Qeqertarsuup Tunualu qitiutillugit. Siunissami umiarsuarnik qanoq katitigaanissamik isumaliutissiissutini Sisami misilittakkat ilanngunneqassapput, Kalaallit Nunaanni Politiit ilisimatitsipput.
