TIMMISARTUUSSINERIT ALLANNGUSSAPPUT
Kategori 2-mik Nuummi Paamiunilu tallimanngornermi anorersuarnissaanik aarlerisaarut
DMI-p kategori 2-mik anorersuaarnera Nuummi nalunaarutigaa. Kujasimmik anorersuassaaq 25-28 m/s-mik sakkortussusilimmik anoraasuarsuillu 33-38 m/s sakkortussuseqassasut naatsorsuutigineqarpoq. Air Greenlandip tallimanngornermi angallannermut pilersaarut allanngortiterpai Kommuneqarfik Sermersoorlu innuttaasunut kaammattuivoq atortut tinngutitissinnaasut qajannaarsoqqullugit.
Assiliisoq: Leiff Josefsen
Air Greenland nalunaarpoq Nuummi tallimanngornermi decembarip 13-iani anorersuarnissaanik aarlerisaaruteqartoqarnera pissutigalugu tallimanngornermi angallannisssamut pilersaarutit allanngortiterneqartut.
Nunatta iluani timmisartuussinissat tamarmik taamaatiinnarneqassapput. Københavnip Nuullu akornanni Atlantikup avannaani timmisartuussinissaq kingusinnerusukkut inissineqassalluni.
Atlantikukkut angallanneq unitsinneqassappat, ilaasussat eqqugaasut tamarmik ullunut tulliuttunnut, tassa arfininngornermut, sapaammut ataasinngornermulluunniit nuutsinneqassapput.
- Angalanissamut pilersaarutit nutaat suliarileruttorpavut. Angalanissamut pilersaarutit nutaat piaartumik nassiussorneqassapput. Taamaattumik kaammattuutigaarput, Club Timmisa app, mail imaluunniit Airgreenland.gl nakkutigissagitit, angalanissamut pilersaarut nutaaq piginissaa qulakkeerniarlugu. Neriuutigaarput sila ajunnginnerulissasoq, ilaasuttalu paasinninnerat pillugu qujavugut, Air Greenland taamak nalunaaruteqarpoq.
Kommuneqarfik Sermersooq innuttaasunut sillimaqqusilluni kaammattuuteqarpoq
Kommuneqarfik Sermersooq Paamiuni Nuummilu innuttaasunut kaammattuuteqarpoq isumannaallisaaqqusissummik.
- Paamiuni Nuummilu innuttaasut piumaffigineqarput pigisat tingissinnaasut aalajangersornissaat, tassani sanaartornermut atortut, umiatsiat assigisaallu pineqarput kiisalu anorersuarnerani ajoqusertoqaratarsinnaanera pinaveersaartinniarlugu illumiiginnarnissaaq kaammattuutigineqarpoq.
DMI naapertorlugu Nuummi Paamiunilu anorersuaq tallimanngornermi ullaakkut sakkortunerpaaffissaminiissaaq, kingornalu sapaatip akunnerata naanerani sakkukilliartulissalluni.
Assiliartaq: DMI
