Naalakkersuisut Kommune Kujallermi meeqqat inuusuttullu aamma innarluutillit pillugit ingerlatsineq tiguniarlugu 2024-mi novembarip arfineq-aappaanni aalajangerput. Tamanna Kommune Kujalliup suliassaminik naammassinninniarnermini ajornartorsiungaartup ikiorneqarnissamik saaffiginnereernerata kingorna pivoq.
– Akisussaaffik kommunimut utertinneqassaaq, taamanikkut meeqqanut inuusuttunullu naalakkersuisoq Aqqaluaq B. Egede (IA) erseqqissaavoq.
Naalakkersuisut Kommune Kujallermi meeqqat inuusuttullu aamma innarluutillit pillugit ingerlatsineq tiguniarlugu 2024-mi novembarip arfineq-aappaanni aalajangerput. Tamanna Kommune Kujalliup suliassaminik naammassinninniarnermini ajornartorsiungaartup ikiorneqarnissamik saaffiginnereernerata kingorna pivoq.
– Akisussaaffik kommunimut utertinneqassaaq, taamanikkut meeqqanut inuusuttunullu naalakkersuisoq Aqqaluaq B. Egede (IA) erseqqissaavoq.
Kisianni atorunnaarallartitsineq qanoq sivisutigissanersoq oqaatiginngilaa. Tamatumalu kingorna Naalakkersuisunit naalakkersuisoqarfimminngaanneersunilluunniit piffissamik killiliussamik nalunaaruteqartoqanngilaq.
Taamanikkut illuatungiliuttutut politikeriusoq kingusinnerusukkullu naalakkersuisunngortoq Anna Wangenheim (D) tamanna qanoq sivisutigissanersoq 2024-mi novembarimili apeqquteqarpoq.
Inatsisartunili § 37 naapertorlugu apeqqutai kikkunnilluunniit takuneqarsinnaasumik akineqarsimanngillat.
Taamaammat ukiut marluk qaangiukkaluartut suli akissutissaqanngilaq.
SULIASSANIK TIGUSINERUP ISUMAA SUUA?
Naalakkersuisut 7. november 2024 aalajangerput Kommune Kujalleq meeqqanut tapersiinermut inatsisip aammalu innarluutillit pillugit inatsisip aqutsivigineqarneranik tigusissasut. Tamanna suliassanik tigusineruvoq.
Tamatuma kingunerivaa Namminersorlutik Oqartussat piffissami aalajangersimasumi immikkoortuni marlunni oqartussaasutut akisussaaffik tigummassagaat. Tassa suliassanik ingerlatsinermut aalajangiinernullu, nalinginnaasumik kommunimit aalajangiiffigineqartartunut, ataatsimut akisussaaffik tiguneqarluni.
Pisumi matumani Isumaginninnermut Aqutsisoqarfiup sulisut Kommune Kujalleq-mi suliaqarnermut peqataapput. Kommunilli nammineq sulisut allaffeqarfiillu aamma suli suliaqarnermut peqataapput.
Sulisut suliassanik tigusinerup iluaniittunik suliaqaraangamik Naalakkersuisunit ilitsersorneqartarput. Kommuni suli immikkoortumi aningaasartuutinik akiliisassaaq.
“Utertitsisoqarnissaanik suliaqarneq aallartittoq” Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfik Sermitsiamut allappoq, qaquguli tamanna pissanersoq oqaatiginngilaa.
– Tunniussinissamut piareersarnerit maannakkut ingerlapput, Kommune Kujallermi oqartussaaffiup atorunnaarallartinneqartup aqutsisui qanimut oqaloqatigineqarlutillu suliassat aalajangersimasut kommunip piginnaanngorsaanissaanut tulluarnerpaatut nalilerneqartut ukkatarineqarput.
Suliassaqarfik atorunnaarallartinneqartoq “pisinnaasat atorneqarsinnaasut tunngavigalugit annertuumik qaffanneqartussaasoq” Naalakkersuisoqarfik Sermitsiamut aamma ilisimatitsivoq.
Naalakkersuisoqarfik Isumaginninnermullu Aqutsisoqarfik naapertorlugit meeqqat inuusuttullu pillugit suliat ammasut 2024-mi novembarimi 954-iniit 2026-mi oktobarimi 594-inut ikilisimapput – kisitsisilli nalornissutigineqarsinnaapput. Aaqqissuussineq torersaanerlu suliat ikilinerinut pissutaasut naalakkersuisoqarfimmi aqutsisut oqarput.
Kommuuni: Naammattumik ilisimasaqanngilagut
Suliaqarfiit qaqugu utertinneqassanersut Kujataani kommunimi pisortaanerup aamma oqaatigisinnaanngilaa:
– Ullumikkut pissutsit naapertorlugit unitsitsinerup siunertaa anguneqarnersoq utertitsinissarluunnit qaqugu piviusorsiorsinnaanersoq nalilersinnaajumallugu naammattumik ilisimasaqanngilagut, Randi Vestergaard Evaldsen Sermitsiamut allappoq.
Nunatta Karsiata 2025-mut naatsorsuutai naapertorlugit qaqugukkut Kommune Kujalleq oqartussaassuseqalissasoq siunnersortit avataaneersut piffissaq killiliussaq aalajangertariaqarpaat. Tamanna isumasioqatigiittarfimmut BDO-mut suliassiissutigineqarpoq.
BDO-p nalunaarusiaa 2026-mi juunip 12-ianeersoq pillugu Sermitsiaq takunnissinnaanermik pisinnaatitaavoq. Utertitsinissaq 2027-mi qaammatini pingasuni siullerni aallartissinnaaniassammat anguniagassatut allattorsimasut anguniarneqassasut BDO piffissami tassani siunnersuuteqarpoq.
Tamanna sivisunerusariaqanngitsoq siunnersuisartut isumaqarput. Taamanikkussamullu atorunnaarallartitsinermi ukiut marluk qaangiutereersimanissaat eqqarsaatigineqarpoq:
- (...) Isumaginninnermut Aqutsisoqarfimmi Kommune Kujallermilu sulisut piumassuseqarnerannut atugarissaarnerannullu tamanna ajortumik sunniuteqassaaq, BDO-mit ilisimatitsissutigineqarpoq.
Siunnersuisartut nalunaarusiaannut pituttorsimanngitsoq
BDO-p piumasaqaatit qulit, soorlu „sulisussarsiornermik aallartitsinissaq“ aamma „ilinniartitsinissamik pisariaqartitsinerup nalilerneqarnera“, minnerpaamik naammassineqartariaqartut allaaserai.
Ilaat kommunimit, allat naalakkersuisoqarfimmit allallu taakkunannga marlunnit aqunneqarput. 2027-mi qaammatini siullerni pingasuni tunniunneqarnissaat ilimanaateqarpoq. Nukissallu pisariaqartinneqartut atorneqarpata tamanna piviusunngorsinnaasutut BDO-p 2026-mi juunimi nalilerpaa.
Piumasaqaatit taaneqartut naapertorlugit suliaq ullumikkut qanoq ingerlasimanersoq Sermitsiap apeqqutigaa. Naalakkersuisusoqarfik ima akivoq:
– Kommuni Kujallermut tunniussineq BDO-p nalunaarusiaani 2026-mi juunip aappaaneersumi minnerpaaffiusumik piumasaqaatinut pituttorsimanngilaq. BDO-p nalunaarusiaa tunniusseqqinnissamik ingerlatsinermi innersuussutinik ilitsersuutinillu suliaqarfimmi atorneqartussanik siunertaqarluni suliarineqarpoq.
– Utertitsineq ingerlaavartumik suleqatigiinnermik kommunillu suliassaqarfinni pineqartuni suliassanik isumaginnissinnaaneranik nalilersuiuarnermik tunngaveqarpoq.
Tunniussinissaq pillugu nassuiaat Naalakkersuisuni juulip naanerani tusarniaassutigineqarpoq. Tusarniaaneq juulip 30-aniit aggustip sisamaanut ingerlanneqartussatut pilersaarutigineqarpoq, naalakkersuisoqarfiillu pineqartunut attuumassuteqartut kisimik peqataanissamut qaaqquneqarput.
Sermitsiaq nalunaarusiamik takunnissinnaanermut itigartinneqarlunilu tusarniaanermi akissutinik ilisimasaqanngilaq.